Свет
Научничка од Вухан го демантира тврдењето дека коронавирусот потекнува од нивната лабораторија
Научничката од Институтот за вирологија во Вухан, д-р Ши Зенгли, позната како жена лилјак, ги демантира новите тврдења дека Ковид-19 можеби избегал од нивната лабораторија и ги нарече тажни и неприфатливи.
Група од 18 научници, вклучително и еден од најистакнатите светски истражувачи на коронавирусот, ја почнаа дебатата дали Ковид-19 избегал од лабораторијата во Вухан преку ноќ.
Предупредувајќи дека нема доволно докази за да се исклучи таа можност, групата му напишала на престижното списание „Сајанс“, повикувајќи на понатамошно истражување за потеклото на Ковид-19, одговорен за глобалната пандемија.
„Мораме сериозно да ги сфатиме хипотезите за природна и лабораториска прелевање сѐ додека не добиеме доволно податоци“, се вели во писмото.
Правилната истрага треба да биде транспарентна, објективна, базирана на податоци, вклучувајќи широка експертиза, независен надзор и одговорно водена за да се минимизира влијанието на судирот на интереси. Агенциите за јавно здравје и лабораториите за истражување мора да ги отворат своите евиденции за јавноста, се наведува понатаму.
Писмото е потпишано од почитувани научници кои се експерти за истражување на САРС-КоВ-2 вклучувајќи го и Џеси Блум, биолог од Центарот за истражување рак во Сиетл, Ралф Барик, истражувач на коронвируси, кој работел со научници на Институтот „Вухан“ во Кина, и Дејвид Релман, микробиолог и имунолог од „Стенфорд“.
Сепак, вирологот од Вухан, Ши Зенгли, одговори преку имејл во петокот наутро на поканата да ги достави своите лабораториски документи.
„Тоа, дефинитивно, е неприфатливо. Кој може да обезбеди докази што не постојат? Многу е тажно да го прочитате ова писмо напишано од 18 научници“, одговорила научничката позната како жена лилјак.
Таа додаде дека хипотезата за излегување од лабораторијата се заснова само на експертиза во лабораторија што долго време работи на коронавирус на лилјаци, кои се филогенетски поврзани со САРС-КоВ-2, пренесува News.com.au.
„Таквото тврдење, дефинитивно, ќе им наштети на угледот и на ентузијазмот на научниците, кои се посветени на работата на нови животински вируси што имаат потенцијален ризик да се прелеат на човечката популација и на крајот да ја ослабат способноста на луѓето да ја спречат следната пандемија“, рече таа.
Светската здравствена организација испрати тим научници во Вухан, од каде што потекна вирусот во декември 2019 година, за да го испита потеклото на Ковид-19.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп воведе санкции врз колумбискиот претседател и неговото семејство
Соединетите Американски Држави воведоа санкции врз колумбискиот претседател Густаво Петро, објави Канцеларијата за контрола на странски средства на Министерството за финансии на САД. Неговата сопруга Вероника Алкосер, синот Николас Петро и министерот за внатрешни работи Армандо Бенедети се исто така на списокот на санкционираните, што дополнително ги затегнува односите меѓу САД и Колумбија.
Санкциите се засноваат на претседателскиот декрет EO14059, кој е насочен кон меѓународната трговија со дрога и организираниот криминал. Ова значи дека сите средства на Петро и неговите најблиски роднини во САД ќе бидат замрзнати, а на граѓаните и компаниите на САД им е забрането да соработуваат со нив.
САД го обвинуваат Петро дека дозволил производството на кокаин во Колумбија да порасне на највисоко ниво за една деценија за време на неговиот мандат, преплавувајќи го американскиот пазар и штетејќи му на американското општество.
Министерот за финансии Скот Бесент изјави дека претседателот Петро им дозволил на нарко-картелите да цветаат и одбил да ја запре оваа активност, поради што администрацијата на претседателот Доналд Трамп презема строги мерки за заштита на земјата од трговија со дрога.
Свет
Франција осуди жена на доживотен затвор првпат во историјата
Француски суд ја осуди Алжирката Дабија Бенкиред на доживотен затвор без можност за условна слобода во петокот за силување, тортура и убиство на 12-годишната Лола Давиет. Со оваа пресуда, Бенкиред стана првата жена во Франција на која ѝ е изречена најстрогата можна казна.
Случајот што ја потресе земјата во 2022 година, предизвика и жестока дебата за имиграцијата, со оглед на тоа што осудената немала важечка дозвола за престој, пишува Le Monde. Бенкиред, која сега има 27 години, беше уапсена кратко откако девојчето исчезна во североисточен Париз. Телото на Лола Давиет беше пронајдено во ковчег во лобито на зградата каде што нејзините родители работеа како чистачи.
Претседавачкиот судија, во своето образложение за пресудата, ја истакна „исклучителната суровост на злосторствата“, опишувајќи ги како „вистинска тортура“.
„При одредувањето на соодветната казна, судот ја зеде предвид неописливата психолошка штета врз жртвата и нејзиното семејство во такви насилни и речиси неописливи околности“, рече тој.
На почетокот на судењето минатата недела, Бенкиред се извини за своите ужасни постапки. Сепак, тројца форензички психијатри сведочеа дека забележале психопатски тенденции кај обвинетата и дека не веруваат дека таа страда од ментално нарушување што може да се лекува.
Случајот го искористија конзервативните и крајно десничарските политичари за да побараат построго спроведување на законите за имиграција, откако беше откриено дека Бенкиред го пречекорила рокот на нејзината студентска виза и го игнорирала налогот да ја напушти Франција. Мајката на жртвата апелираше до политичарите да престанат да ја експлоатираат смртта на нејзината ќерка за политички цели.
Свет
Турција го обвинува Израел за кршење на примирјето, бара одговор од САД
Турција ги повика САД да дејствуваат, обвинувајќи го Израел за кршење на договорот за прекин на огнот во Газа. Турскиот претседател Реџеп Таип Ердоган изјави дека Вашингтон и сојузниците треба да размислат за санкции и запирање на продажбата на оружје за да го принудат Израел да го почитува договорот.
Турција, членка на НАТО, беше вклучена во разговорите за прекин на огнот како посредник, а нејзината улога беше зајакната по средбата минатиот месец меѓу Ердоган и Доналд Трамп во Белата куќа.
„Страната на Хамас се придржува до прекинот на огнот. Всушност, отворено ја изразува својата посветеност кон него. Израел, во меѓувреме, продолжува да го крши прекинот на огнот“, изјави Ердоган пред новинарите.
„Меѓународната заедница, т.е. САД, мора да направи повеќе за да обезбеди целосно почитување на прекинот на огнот и договорот од страна на Израел“, додаде тој.
Од друга страна, Израел го обвини Хамас за кршење на примирјето, велејќи дека неодамнешните воени акции во Газа биле дизајнирани токму за одржување на договорот.
Кога беше прашан за коментарите на израелскиот премиер Бенјамин Нетанјаху, кој се спротивставува на каква било мировна улога на турските сили во Појасот Газа, Ердоган одговори дека разговорите сè уште се во тек.
„Бидејќи ова е повеќеслојно прашање, во тек се сеопфатни преговори. Ние сме подготвени да ѝ пружиме на Газа каква било форма на поддршка по ова прашање“, рече тој.
Односите меѓу поранешните сојузници Израел и Турција го достигнаа дното за време на војната во Газа, при што Анкара ја обвини владата на Нетанјаху за геноцид, што Израел постојано го негира.

