Свет
Најмалку шест лица загинаа во ураганот Оскар на Куба, во Хавана протести поради струјата
Најмалку шест лица загинаа во ураганот Оскар на Куба, кој го парализираше главниот град додека земјата се подготвува за четврта ноќ на прекини на електрична енергија.
Во урбаните средини избувнаа протести, а демонстрантите удираа со саксии и фрлаа ѓубре по улиците, изразувајќи незадоволство од недостигот на вода и струја, пренесува АП.
Кубанскиот претседател Мигел Дијаз-Канел истакна дека граѓанската непослушност нема да се толерира и вети дека ќе го одржува редот.
Со оглед на тоа што побарувачката за струја достигнува три гигавати, а владата произведува само 700 мегавати, многу граѓани се сомневаат во тврдењата на надлежните дека состојбата наскоро ќе се стабилизира.
Министерот за енергетика Висенте де ла О’Леви истакна дека училиштата ќе останат затворени најмалку до четврток, додека воведени се итни мерки за намалување на потрошувачката на електрична енергија.
Додека многумина се свртуваат кон импровизирани печки на дрва, недостигот од субвенционирана храна и гориво доведе до долги редици пред пекарите и бензинските пумпи.
Куба доби помош од неколку земји, вклучувајќи ги Мексико и Венецуела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
ОН: Популацијата на Украина се намали за 10 милиони по руската инвазија
Популацијата на Украина се намали за повеќе од 10 милиони луѓе од руската инвазија во февруари 2022 година, што предизвика егзодус и пад на наталитетот, соопштија ОН.
„Генерално, гледаме дека населението во Украина е намалено за повеќе од 10 милиони луѓе од почетокот на војната“, рече регионалната директорка на Фондот за население на Обединетите нации (УНФПА), Флоренс Бауер, за време на брифингот со новинарите во Женева, повикувајќи се на податоци од украинската влада.
Таа објасни дека овој пад е поврзан со „комбинација на фактори“ и нагласи дека „уште пред ескалацијата на војната, Украина се соочувала со значителни демографски предизвици“.
„Земјата ја имаше една од најниските стапки на наталитет во Европа. Голем број луѓе веќе ја напуштија земјата за да ги испробаат сите можности што им беа достапни. Населението старее, а целокупното население се намалуваше“, рече Бауер.
„Оваа ситуација не е нетипична за Источна Европа, бидејќи многу земји доживуваат слични демографски трендови“, додаде таа. „Но, со големата инвазија на Русија која започна во 2022 година, ситуацијата стана многу полоша“, објасни таа.
Таа истакна дека стапката на фертилитет е намалена и во моментов изнесува околу едно дете по жена, „што е едно од најниските во светот“ и е „многу под“ прагот за обновување на населението од 2,1 дете по жена.
„Исто така, 6,7 милиони луѓе ја напуштија Украина и значителен број луѓе загинаа поради конфликтот“, додаде претставникот на ОН.
Свет
Американскиот шеф на дипломатијата во Израел ќе се обиде да ги заживее мировните преговори
Американскиот државен секретар, Eнтони Блинкен, денеска пристигна во Израел на средби со израелските лидери, што е прва станица на пошироката турнеја на Блискиот Исток за да започне уште еден притисок за прекин на огнот.
Последната посета на највисокиот американски дипломат – 11-та во регионот откако палестинските милитанти на Хамас го нападнаа јужниот дел на Израел на 7 октомври, предизвикувајќи војна во Газа – доаѓа кога израелската војска ги засилува нападите врз палестинската енклава и Либан против Хезболах поддржан од Иран.
Блинкен ќе се сретне со израелскиот премиер Бенјамин Нетанјаху, министерот за одбрана Јоав Галант и други официјални претставници подоцна во текот на денот, како дел од еднонеделната посета на Блискиот Исток, која ги вклучува Јордан и Катар.
Дипломатските напори досега не успеаја да стават крај на едногодишната војна во Газа и конфликтот меѓу Хезболах и Израел, кој драматично се интензивираше во последните недели по една година размена на оган главно преку јужната граница на Либан.
Хезболах во вторникот рано наутро соопшти дека истрелал ракети врз две израелски воени бази во близина на Тел Авив и поморска база западно од Хаифа.
Регион
Шефот на дипломатијата на Босна и Херцеговина: Мора постојано да внимаваме на малигното руско влијание
Босна и Херцеговина мора да биде во постојана готовност поради малигното руско влијание, а наводите за обука на лица кои требаше да предизвикаат немири во Молдавија за време на минатонеделниот референдум и претседателските избори треба да бидат темелно истражени, предупреди министерот за надворешни работи на БиХ, Елмедин Конаковиќ.
Молдавската полиција извести дека минатата недела извршила рации низ целата земја и уапсила неколку лица под сомнение дека подготвувале немири по инструкции од Русија кои требало да го попречат референдумот.
Истрагата на молдавската полиција претходно доведе до информации дека Русија вложила значителни ресурси и пари за да не го попречува референдумот и да влијае на претседателските избори, па затоа организирале специјална обука на своја територија, но и во Србија и Босна и Херцеговина. Според собраните информации, таму биле обучувани млади луѓе кои требало да учествуваат во проруски демонстрации.
Во исто време кога оваа информација беше објавена од Министерството за безбедност на БиХ, на чело со Ненад Нешиќ, коалициониот партнер на лидерот на босанските Срби, Милорад Додик, имаше експресен демант во кој тие ги обвинија медиумите за ширење неточни информации „кои апсолутно немаат врска со Босна и Херцеговина“.
Нема потврда за постоењето на некои кампови за обука, но ОСА утврди дека пред два месеци во БиХ престојувале странски државјани „од исток“ кои може да се поврзат со обиди за организирање групи чија цел е да ги нарушат јавните собири.
После тоа, министерот за надворешни работи Конаковиќ најави дека лично ќе инсистира на Советот на министри на БиХ целата работа да се расчисти до крај, бидејќи е сигурен дека во неговата земја има луѓе кои се занимаваат со „конкретни задачи“ поврзани со руско влијание, а сега има информации и од ОСА, пренесуваат локални медиуми.
„Ова укажува и повикува на претпазливост која мора да биде постојана кај нас кои живееме во Босна и Херцеговина“, рече Конаковиќ.