Свет
Најново истражување: „Фајзер“ штити повеќе од 95 проценти од коронавирус
Најголемата студија за ефикасноста на „Фајзер/Бионтек“ против коронавирусот кај општата популација покажа дека вакцината обезбедува повеќе од 95 проценти заштита против Ковид-19, а во исто време покажа дека оваа заштита значително паѓа ако некое лице се вакцинира само еднаш, наместо препорачаните две дози.
Авторите на студијата од националната кампања за вакцинација во Израел изјавија дека ова обезбедува докази од реалниот живот дека пандемијата може да заврши со брзи, глобални програми за вакцинирање.
Анализата на податоците за јавното здравство од Израел – една од земјите со најголем процент на целосно вакцинирани возрасни лица, покажа дека вакцината исто така ги заштити старите лица исклучително ефикасно во време кога доминираше позаразниот англиски вид.
До почетокот на април речиси 5 милиони луѓе во Израел добија две дози на „Фајзер/Бионтек“, или повеќе од 70 проценти од населението.
Студијата покажа дека двете дози обезбедуваат 95,3 проценти заштита од заразата со Ковид-19 и 96,7 проценти заштита од смрт седум дена по втората доза. По 14 дена, таа заштита се зголемила на 96,5 проценти, односно 98 проценти, укажуваат најновите истражувања.
Според овие анализи, заштитата била значително помала кога луѓето примиле само една доза на вакцина.
Авторите велат дека единечна доза може да обезбеди пократок период на заштита, особено во средина каде што се појавуваат нови вирусни видови.
„Важно е, како што покажува студијата, дека двете дози на вакцината значително го зголемуваат нивото на имунитет и заштита“.
Затоа според експертите многу е важно луѓето да ги добијат две дози од вакцината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Израелската војска: Од понеделникот погодени повеќе од 250 цели на Хезболах во Либан
Израелската војска соопшти дека почнала нов бран воздушни напади врз инфраструктура на Хезболах во либанската престолнина Бејрут.
Израелските одбранбени сили (ИДФ) најавија дека дополнителни детали за нападите ќе бидат објавени подоцна. Пред ударите биле издадени предупредувања за евакуација на две згради во Бејрут.
Според ИДФ, од понеделникот, кога Хезболах се вклучил во конфликтот, израелските сили погодиле повеќе од 250 цели во Либан, од кои околу 100 во последните 24 часа.
Меѓу целите, како што тврди израелската војска, биле оперативци на милитантни групи, ракетни лансери, складишта за оружје и командни центри на Хезболах.
Во јужен Либан, според израелските процени, околу 300.000 цивили ги напуштиле своите села по наредбите за евакуација издадени од ИДФ. Во текот на ноќта биле издадени и нови предупредувања за евакуација за повеќе од десет населени места.
Фото: Depositphotos
Регион
(Видео) Српска инфлуенсерка од Дубаи: Се слушаат удари, некои луѓе не сфаќаат што се случува
Српските инфлуенсерки Сара и Ања Дамњановиќ се наоѓаат во Дубаи, каде, како што велат, изминатите денови се слушаат експлозии по нападите во регионот.
Сара во видео објава раскажа дека тие биле евакуирани од стан и се преселиле во хотел на понизок кат поради безбедност, пренесе „Б92“.
View this post on Instagram
„Последниот силен удар го слушнав вчера наутро и ме разбуди. Кога бевме на 24. кат, зградата се тресеше и се слушаше силен звук“, изјави таа.
Додава дека ситуацијата е различна во зависност од делот на градот – додека некаде се активираат аларми и има евакуации, на други места луѓето седат во кафулиња и сè изгледа нормално.
Инфлуенсерката вели дека лично не паничи, но е загрижена поради големиот број информации и лажни видеа што се шират на социјалните мрежи.
Таа опиша и момент кога, трчајќи кон гаража, видела што се случува на небото и дека хотел на околу два километри од нив бил погоден. И покрај тензијата, вели дека градот функционира релативно нормално, иако понекогаш сообраќајот кратко се прекинува по нападите.
Фото: Depositphotos
Свет
Франција испрати борбени авиони „Рафал“ во своите бази на Емиратите
Франција распореди борбени авиони „Рафал“ во своите воени бази во Обединетите Арапски Емирати со задача да го обезбедуваат воздушниот простор над базите, изјави францускиот министер за надворешни работи Жан-Ноел Баро.
Тој за телевизијата „БФМТВ“ изјави дека авионите спровеле операции за обезбедување на воздушниот простор, но не изнесе дополнителни детали за мисијата.
Распоредувањето доаѓа во време на ескалација на конфликтот на Блискиот Исток.

