Европа
На протестите во Франција повредени 24 лица, меѓу кои и петмина полицајци

Најмалку 24 лица, меѓу кои и петмина полицајци, беа повредени во саботата во Париз во судирите меѓу полицијата и демонстрантите кои се бунтуваат против зголемувањето на цените на горивото. Едно лице е потешко повредено.
На протестите низ цела Франција поради зголемувањето на цените на горивото во саботата учествувале околу 106.300 луѓе, рече францускиот министер Кристоф Кастанер.
„Во екот на протестите, некаде околу пладне, имаше околу 106.300 луѓе кои протестираа. Ова е многу помалку во споредба со претходната сабота, кога бројот на учесници во протестите беше речиси 244.000. Во Франција се одржаа 1.619 протести, а 130 луѓе се приведени“, соопшти Кастанер.
Тој наведе дека на некои места конфликтите во текот на вчерашниот ден биле понасилни во споредба со претходната недела, пренесе агенцијата „Тасс“.
Францускиот претседател Емануел Макрон го осуди насилството од демонстрантите, наведувајќи дека во републиката нема место за такво насилство.
Во саботата особено жестоки демонстрации имаше во центарот на Париз каде полицијата со солзавец и водени топови ги растеруваше најупорните демонстранти кои имаа намера да стигнат до Шанзелизе.
Gilets jaunes: tensions on the Champs-Elysees, the police use tear gas
The sling born in October on social networks against the rise of fuels, without leader or structure, continues to shake France with a large gathering in Paris and actions in the regions.https://t.co/CrVJFt7LvV pic.twitter.com/JY7feflLpB— Vlad Fabian (@vlafbi) November 24, 2018
Демонстрантите го повикаа Макрон да поднесе оставка, откако цената на дизелот скокна за 23% во последните 12 месеци. Некои демонстранти ја пееја националната химна, додека други носеа знамиња и извукаваа: “Макрон, Оставка” и “Макрон, крадец”.
Францускиот претседател застана во одбрана на одлуката за зголемување на цените на бензинот, во која се наведува дека оваа мерка е неопходнa со цел да се намали зависноста од фосилни горива на Франција и најави дека на почетокот на следната недела ќе претстави нови планови за да се олесни „енергетската транзиција“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Бројот на кардинали кои ќе го изберат новиот папа е намален

Бројот на кардинални електори кои ќе го изберат наследникот на починатиот папа Францискo се намали на 133 откако двајца кардинали изјавија дека не можат да дојдат во Рим поради здравствени проблеми, изјави портпаролот на Ватикан, Матео Бруни.
Бруни, директор на прес-службата на Ватикан, не ги објави имињата на двајцата отсутни кардинали бидејќи тие се борат со здравствени проблеми.
Италијанскиот кардинал Анџело Бечиу, кој денес објави дека дефинитивно нема да биде на конклавата бидејќи првично бил осуден за проневера, не бил ниту вброен меѓу 135-те кардинални електори.
Конклавата ќе почне на 7 мај. За избор на нов папа е потребно двотретинско мнозинство.
Европа
Објавени мапи: како би изгледала Украина според планот на Трамп за завршување на војната

Администрацијата на американскиот претседател Доналд Трамп предложи мировен план за Украина, кој вклучува промена на статусот на Крим и замрзнување на територијалните линии на бојното поле.
Иако деталите од планот сè уште не се целосно јасни, коментарите на американскиот потпретседател Џеј-Ди Венс за замрзнување на сегашните граници алудираат на можноста значителен дел од украинската територија формално да ѝ биде отстапен на Русија.
Украинскиот претседател Володимир Зеленски нагласи дека украинскиот устав јасно го дефинира Крим како составен дел од Украина. Но, Трамп одговори критикувајќи го Зеленски тврдејќи дека тој го отежнува постигнувањето мир. Војната во Украина трае од руската инвазија на 24 февруари 2022 година.
Администрацијата на Трамп предупреди дека ќе се повлече од разговорите доколку Москва и Киев набргу не постигнат договор. По неколку недели одделни преговори со двете страни, САД предложија договор што се чини дека ѝ се допаѓа на Москва, но Киев досега го отфрла.
Што предвидува планот?
Планот предвидува Украина да се откаже од членството во НАТО, да ги ублажи санкциите против Русија и да прифати дека Крим е под руска контрола. Иако Трамп тврди дека Украина формално нема да мора да го промени својот устав за да го признае губењето на Крим, останува нејасно дали Русија ќе се согласи со тоа.
Венс рече дека новите територијални демаркации ќе бидат блиску до сегашните фронтовски линии, што би значело дека Украина ќе изгуби големи делови од територијата што се обидува да ја врати – вклучувајќи ги Крим и делови од регионите Донецк, Луганск, Херсон и Запорожје. Во ова сценарио Русија, веројатно, би морала да се откаже само од помалите делови од Харковскиот регион што ги контролира и да се откаже од целосната анексија на четирите покраини.
Јуриј Бојечко, основач на хуманитарната организација „Надеж за Украина“, предупреди за „Њузвик“ дека еден милион Украинци во овие области ќе бидат принудени да ги напуштат своите домови за да го исчистат теренот за руска власт.
Олга Оликер од Меѓународната кризна група истакна дека предложениот договор би можел да ги запре руските напади врз нови области, но дека прекинот на огнот би значел одржување на контролата врз веќе окупираните територии.
„Неправеден компромис“
Кремљ во среда објави дека за прекин на непријателствата е потребно Украина целосно да се повлече од териториите што ги поседува Русија. Сепак, според Оликер, не е јасно дали предложениот договор ја обврзува Украина да направи таков потег.
Реториката на Трамп предизвикува дополнителни загрижености. Потпретседателот Џеј-Ди Венс отворено изјави дека ќе бидат повлечени нови линии блиски до сегашните, а самиот Трамп рече дека Крим останува со Русија наведувајќи дека сите го знаат ова долго време.
Иако Зеленски постојано јавно ја отфрла идејата за предавање на Крим, некои други украински лидери, како што е градоначалникот на Киев, Виталиј Кличко, посочија дека за привремен мир би можел да се постигне компромис, иако нефер. Таквото решение би можело да значи привремено откажување од територија, но речиси е сигурно дека Киев никогаш нема правно да го признае запленувањето на кој било дел од својата територија.
Признавањето на Крим е опасен преседан
Де јуре признавањето на руската анексија на Крим од страна на САД би било очигледно кршење на меѓународното право и договорите, како што е Будимпештанскиот меморандум од 1994 година, во кој САД ветија дека ќе го заштитат украинскиот суверенитет во замена за откажување од нуклеарно оружје.
Таквиот потег би бил опасен преседан што би значел драматично слабеење на меѓународниот правен поредок.
Аналитичарите предупредуваат дека дозволувањето на Путин да го задржи Крим би значело враќање на светот во ерата кога правото на најсилните ги одредувало границите, што дополнително би ги дестабилизирало глобалните односи.
Што ако САД се откажат?
Доколку САД, како што се заканува администрацијата на Трамп, ја прекинат својата поддршка за Украина, не е јасно дали тоа ќе значи само крај на дипломатскиот ангажман или и прекин на воената помош.
Андреа Кендал-Тејлор, поранешна службеничка на американското разузнавање, предупреди за „Њузвик“ дека Украина ќе ја продолжи борбата, дури и без американска помош, иако тоа би било многу потешко. Украина веќе се потпира сè повеќе на сопствените сили и на европските сојузници.
Поранешниот дипломат Мајкл Кимаге истакнува дека Германија бргу ги зголемува инвестициите во одбраната, делумно за да компензира за потенцијалното повлекување на САД од украинскиот конфликт. Сепак, тој забележува дека таквата транзиција ќе бара време, кое Украина го има сè помалку.
Европа
Москва порача: Подготвени сме за директни преговори, чекаме Киев да се јави

Москва чека сигнал од Киев за продолжување на директните преговори, изјави портпаролот на Кремљ, Дмитриј Песков, објави „Киев пост“.
Сигнал за подготвеноста на Украина да продолжи со директните преговори со Русија мора да дојде од Киев, изјави Песков пред новинарите одговарајќи на прашање од агенцијата ТАСС.
„Сигналот мора да дојде од Киев. Тие барем треба да преземат некаков чекор во таа насока. Сè уште постои законска забрана за тоа. Досега не видовме никакви конкретни дејства“, рече Песков одговарајќи на прашањето дали Русија очекува сигнал од Вашингтон или директно од Киев.
Русија и САД делат многу точки на контакт во своите позиции за Украина, но е прерано да се зборува за какви било конкретни услови од договорот, изјави вчера портпаролот на Кремљ, Дмитриј Песков, пренесува „Анадолија“.
„Постојат многу позиции што навистина се совпаѓаат со нашите“, рече Песков нагласувајќи дека иако напорите за решавање на украинскиот конфликт се во тек, сè уште не е можно да се зборува за конкретни услови.
Тој додаде дека преговорите не може да се водат јавно сигнализирајќи дека разговорите се водат зад затворени врати.
Песков исто така нагласи дека ставовите на американскиот претседател Доналд Трамп за Украина се преклопуваат со руските во многу аспекти.