Свет
Нетанјаху е против палестинска држава во секое повоено сценарио

Израелскиот премиер Бенјамин Нетанјаху изјави дека ги информирал САД дека се противи на формирање палестинска држава како дел од секое повоено сценарио, пишува Гардијан.
„Израел ќе се согласи само на договор со кој земјата би добила безбедносна контрола врз целиот Појас Газа“, изјави израелскиот премиер на денешната прес-конференција.
„Во секој иден договор, на Израел му е потребна безбедносна контрола на целата територија западно од Јордан. Тоа е во спротивност со идејата за палестинскиот суверенитет. Што да правиме?“, рече тој, додавајќи дека истото им го повторил и на Американците.
„Премиерот мора да биде способен да им каже не на нашите пријатели“, изјави тој.
Нетанјаху најави дека ќе ја продолжи израелската офанзива додека Израел не постигне „решавачка победа над Хамас“.
За победата ќе бидат потребни „уште многу месеци, но ние сме решени да ја постигнеме“, додаде израелскиот лидер.
„Ќе продолжиме да се бориме со полна сила додека не ги постигнеме сите наши цели, враќање на сите заложници и повторувам, само воен притисок ќе доведе до нивно ослободување и елиминација на Хамас и гаранција дека Газа никогаш повеќе нема да претставува закана за Израел“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Таткото на Илон Маск: Тешко е да немаш почит кон Путин како човек

Ерол Маск, таткото на американскиот милијардер Илон Маск, изјави дека неговото семејство има одредено воодушевување од рускиот претседател Владимир Путин.
„Ако го гледаме Путин едноставно како човек, а не во контекст на меѓународната политика, тешко е да немаме почит кон него“, рече Ерол Маск во интервју за Би-Би-Си на руски јазик.
На прашањето дали Илон, кој е на чело на американското Министерство за владина ефикасност, рекол нешто слично за Путин, Ерол Маск потврди дека нивните ставови се слични.
Ерол Маск изјави дека луѓето околу него често се обидуваат да ги убедат другите да не му веруваат на Путин, но дека тој самиот го смета рускиот претседател за пример за силен лидер.
На забелешката дека Путин ја започнал војната во Украина, Ерол возвратил дека „само со текот на времето ќе може да се разбере кој навистина ја започнал“.
Зборувајќи за ставот на Илон Маск за Украина, Ерол Маск рече дека обезбедувањето пристап на Украина до сателитската интернет мрежа Старлинк на самиот почеток на војната изгледало како правилна одлука, но како што конфликтот се одолговлекува, ставовите на Илон за тоа се менуваат.
Тој категорично ја отфрли сугестијата дека пресвртот на Илон е поврзан со бизнис интереси, велејќи дека нивното семејство има се и не им требаат повеќе пари.
На прашањето дали може да каже нешто за неговиот син што пошироката јавност не го знае, но што смета дека е важно да се знае, Ерол Маск рече дека Илон е срамежлива личност и нема самодоверба кога зборува во јавност, пренесува Танјуг.
Свет
Рубио: Пазарите пропаѓаат, но мораме да го ресетираме светскиот трговски поредок

Американскиот државен секретар Марко Рубио денеска призна дека пазарите пропаѓаат откако администрацијата на претседателот Доналд Трамп воведе глобални царини, но рече дека пазарите ќе се прилагодат со текот на времето.
„На компаниите ширум светот, вклучително и оние во трговскиот сектор и меѓународната размена, едноставно треба јасно да им се каже какви се условите. Кога ќе го знаат тоа, ќе се прилагодат“, им рече Рубио на новинарите на состанокот на министрите за надворешни работи на НАТО во Брисел, одговарајќи на прашање за високите американски царини кои ги изненадија европските економии.
„Мислам дека не е фер да се каже дека економиите пропаѓаат. Пазарите пропаѓаат бидејќи се засноваат на вредноста на акциите на компаниите кои моментално се длабоко во режим на производство што е штетен за САД“, додаде тој.
„Мораме да го ресетираме глобалниот трговски поредок“, рече Рубио, а потоа додаде: „Најлошото нешто би било да го оставиме како што е. Ова не може да трае вечно. Не можеме да останеме земја која повеќе не произведува ништо“.
Како пример ја наведе Кина. „Тоа е безобразно. Тие не трошат ништо. Сè што прават е да извезуваат, да го преплават пазарот и да го нарушат, со сите царини и бариери што ги воведуваат“, рече тој.
Коментарите на Рубио дојдоа откако Кина објави реципрочна царина од 34 отсто за целиот увоз од САД, која ќе стапи на сила на 10 април.
„Претседателот правилно заклучи дека моменталната состојба на глобалната трговија е лоша за Америка и добра за еден куп други. Тој е решен да го промени тоа, и тој е апсолутно во право“, заклучи Рубио.
Свет
„Тоа не ви требаше“: Трамп до Кина за царините

Претседателот на Соединетите Американски Држави, Доналд Трамп, на својата социјална мрежа „Truth social“ со објава по најавата на Народна Република Кина дека ќе воведе реципрочни мерки како одговор на високите американски царини.
Њујоршката берза доживеа пад по отворањето, а Доналд Трамп набрзо на својот профил објави за потегот на Кина, кој се очекува од 10 април.
„Народна Република Кина направи лош потег, ги фати паника. Тоа е единственото нешто што не можеа да си го дозволат“, напиша Трамп.
„Потегот на администрацијата на Доналд Трамп не е во согласност со правилата на меѓународната трговија, сериозно ги поткопува кинеските интереси и го загрозува глобалниот економски развој и стабилноста на синџирот на производство и снабдување“, се наведува во соопштението од Пекинг.
Кинеското Министерство за надворешни работи апелираше до САД веднаш да ги укинат едностраните царини. Тие апелираат „итно да се решат сите трговски прашања на заемно корисен начин“.
Американски Волстрит падна веднаш по отворањето, според светските агенции.
Што се однесува до нафтата, цената на барелот е во „слободен пад“. Утрово цената беше 67 долари, а моментално е на 62 – пад од шест отсто.