Свет
Нетанјаху повика да се затвори Агенцијата на ОН за помош на палестинските бегалци, според шефот на ОН, тоа ќе биде катастрофа

Шефот на Светската здравствена организација (СЗО) и шефот за хуманитарна помош на ОН апелираа за продолжување на исплатите на главната агенција за помош во Газа велејќи дека ќе има катастрофа ако средствата останат замрзнати. „Ниту еден друг ентитет нема капацитет да обезбеди обем и широчина на помош која им е итно потребна на 2,2 милиона луѓе во Газа“, рече шефот на СЗО, Тедрос Аданом Гебрејсус на мрежата Х, порано „Твитер“.
Тој ги повика сите да продолжат со плаќањето до Агенцијата на Обединетите нации за помош и работа за палестинските бегалци (UNRWA). „Одлуките на разни земји да го замрзнат финансирањето на УНРВА, најголемиот снабдувач на хуманитарна помош во оваа криза, ќе имаат катастрофални последици за луѓето во Газа“, рече тој.
САД, Велика Британија, Германија, Канада, Австралија и неколку други земји ги суспендираа исплатите по обвинувањата дека неколку вработени во УНРВА биле директно или индиректно вмешани во терористичките акти извршени од Хамас во Израел на 7 октомври.
Шефот на СЗО повика на ослободување на заложниците киднапирани од Израел на 7 октомври, да не се запираат конвоите со хуманитарна помош за Појасот Газа и здравствените установи да бидат поштедени од напади и употреба од страна на милитантите.
„И ние продолжуваме да повикуваме на прекин на огнот“, рече тој. Координаторот на ОН за вонредни состојби, Мартин Грифитс, го нарече UNRWA „чукање на срцето“ на Газа. Говорејќи во Советот за безбедност на ОН во Њујорк, тој рече дека се чувствува ужасено од тврдењата, но дека „услугите за спасување живот не треба да бидат загрозени од наводните постапки на неколку поединци“.
Израелскиот премиер Бенјамин Нетанјаху во средата изјави дека агенцијата на ОН за палестинските бегалци мора да биде затворена бидејќи, според израелските сознанија, некои нејзини вработени учествувале во нападот на Хамас врз јужен Израел минатиот октомври.
„Време е меѓународната заедница и самите ОН да разберат дека мисијата на УНРВА мора да заврши“, рече Нетанјаху. Шефот на ОН, Антонио Гутереш, во неделата изјави дека од 12-те инволвирани лица, девет се отпуштени, еден е мртов, а идентитетот на другите двајца се разјаснува.
Палестинците го обвинија Израел за фалсификување информации за да ја дискредитира УНРВА. УНРВА вработува 13.000 луѓе во Газа, раководи со училишта, клиники за примарна здравствена заштита и други социјални услуги и дистрибуира хуманитарна помош.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Франција почна со достава на хуманитарна помош од воздух во Газа

Франција започна да испушта 40 тони хуманитарна помош од воздух во Газа, повикувајќи го Израел да дозволи целосен пристап до областа.
„Соочени со апсолутна итност, штотуку спроведовме операција на испуштање хуманитарна помош од воздух во Газа. Благодарност до нашите јордански, емиратски и германски партнери за нивната поддршка и до нашиот воен персонал за нивната посветеност“, напиша францускиот претседател Емануел Макрон на социјалната платформа X.
„Испуштањето хуманитарна помош од воздух не е доволно. Израел мора да дозволи целосен хуманитарен пристап за да се намали ризикот од глад“, додаде тој.
Италија, пак, има намера да евакуира болни палестински деца од Појасот Газа за да им обезбеди медицинска помош, изјави министерот за надворешни работи Антонио Тајани.
Тајани рече дека Рим подготвува план за воздушен транспорт на 50 лица, вклучувајќи возрасни кои ќе ги придружуваат децата.
Тој, исто така, објави планови според кои Италија ќе им се придружи на земјите што доставија помош од воздух во Газа, но не прецизираше конкретен датум за нивно спроведување.
Авиони управувани од Израел, Јордан и Обединетите Арапски Емирати од неделата, кога Израел почна да дозволува повеќе помош во затворените територии по месеци речиси целосна блокада, испуштаат палети со хуманитарна помош од воздух.
Германија и Франција, исто така, денесја почнаа да испуштаат помош од воздух, поради предупредувањата за претстојниот глад во Газа, иако Обединетите нации и другите агенции за помош ги критикуваа таквите мерки како во голема мера симболични, тврдејќи дека е многу поевтино и поефикасно да се достави помош по копно.
Покрај тоа што дозволува испуштања од воздух, Израел, исто така, дозволи влез на 200 камиони дневно од ОН и други агенции од неделата.
Фото: ЕПА
Свет
Путин: Првиот сериски ракетен систем „Орешник“ е во рацете на армијата

Рускиот претседател Владимир Путин објави дека првиот сериски произведен ракетен систем со среден дострел, „Орешник“, заедно со првата ракета од оваа серија, официјално е доставен до руските вооружени сили. Станува збор за нов стратешки систем што Москва го претставува како одговор на сè поизразените закани од Западот.
„Го произведовме првиот сериски комплекс ‘Орешник’, првата сериска ракета, и таа веќе е во рацете на армијата“, рече Путин за време на состанокот со белорускиот претседател Александар Лукашенко додавајќи дека се очекува постепено проширување на овој систем, вклучително и распоредување во Белорусија во текот на 2025 година.
Употребата на „Орешник“ првпат беше откриена на 21 ноември 2024 година кога Русија изврши напад врз воениот објект Јужмаш во Днепар (поранешен Днепропетровск) како одговор на нападите на украинските сили со американски ракети ATACMS и британски ракети Storm Shadow. Путин потоа истакна дека ниеден современ противвоздушен систем не може да пресретне ваков тип ракета и најави дека во иднина населението ќе биде однапред информирано за евакуација.
Според достапните информации, „Орешник“ е хиперсоничен ракетен систем со можност за носење повеќе независно водени бојни глави (MIRV), базиран на технологиите на претходниот систем RS-26 „Рубеж“. Ракетата достигнува брзина над 10 маха, што ја прави речиси невидлива од повеќето постојни системи за воздушна одбрана.
Додека официјална Москва истакнува дека станува збор за оружје што ги гарантира безбедноста и територијалниот интегритет на Русија, воените аналитичари истакнуваат дека системот не е наменет за прецизни удари врз тактички цели, туку првенствено има улога на стратешко одвраќање и демонстрација на сила. Сепак, симболичната и психолошката вредност на системот, особено во контекст на сегашните геополитички тензии, останува значајна.
Масовното производство на комплексот „Орешник“ треба да се забрза во текот на 2025 и 2026 година, а најавено е дека значителен број единици ќе бидат оперативно распоредени и во Русија и на територијата на сојузничката Белорусија, според написите во медиумите.
Фото: принтскрин
Свет
Рубио за Путин: Трамп нема да чека вечно

Американскиот државен секретар Марко Рубио изјави дека администрацијата на претседателот на Соединетите Американски Држави, Доналд Трамп, го губи трпението со рускиот претседател Владимир Путин во врска со завршувањето на војната во Украина.
„Она што најмногу го мачи претседателот се овие одлични телефонски разговори, каде што сите велат, знаете, би сакале да завршиме со ова и да најдеме начин да продолжиме напред. Потоа тој ги вклучува вестите и гледа како уште еден град е бомбардиран“, изјави Рубио за „Фокс њуз“.
Тој додаде дека САД истражуваат нови начини за постигнување напредок во мировните преговори, но предупреди дека трпението на Трамп истекува.
„Досега, барем како што го перципираме, немаше искрен интерес од руска страна за постигнување на оваа цел. Но, очигледно е дека претседателот нема да чека вечно“, заклучи Рубио.
Во вторникот Трамп му даде на Путин 10 дена да се согласи на договор за прекин на огнот или ќе се соочи со нови, сурови санкции.
Фото: принтскрин