Свет
Нетанјаху: Срамна одлука, без или со британско оружје, Израел ќе победи во оваа војна
Израелскиот премиер Бенјамин Нетанјаху денеска изјави дека британската влада донела „срамна одлука“ да суспендира дел од дозволите за извоз на оружје наменето за Израел.
Шефот на британската дипломатија Дејвид Лами вчера најави дека Велика Британија ќе суспендира 30 од вкупно 350 дозволи за извоз на оружје наменето за Израел.
Одлуката уследи откако новата лабуристичка влада соопшти дека открила дека постои „јасен ризик“ британското оружје да се користи за сериозно прекршување на меѓународното право поврзано со третманот на палестинските затвореници и испораката на помош во Газа.
Овој потег дојде еден ден откако израелските сили ги открија телата на шестмина заложници убиени во тунел во Газа, објави Ројтерс.
Нетанјаху додаде дека одлуката нема да ја промени решеноста на Израел да го победи Хамас.
Израелскиот премиер додаде дека оваа погрешна британска одлука само ќе го охрабри Хамас.
„Без или со британско оружје, Израел ќе победи во оваа војна и ќе ја обезбеди нашата заедничка иднина“, рече тој.
Лами по победата на општите избори на лабуристите рече дека ќе ја разгледа продажбата на оружје на сојузникот Израел за да се осигура дека тие се усогласени со меѓународното право.
Британскиот извоз на оружје изнесува помалку од еден процент од вкупниот износ на оружје што го добива Израел, а Лами рече дека оваа суспензија на дозволите за извоз нема да има материјално влијание врз безбедноста на Израел и дека Британија продолжува да го поддржува правото на Израел на самоодбрана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Министерот за одбрана на Израел: Времето за договор со Хезболах истекува
Израелскиот министер за одбрана Јоав Галант денеска изјави дека истекува времето за договор со Хезболах за запирање на судирите долж израелско-либанската граница.
Во разговор со неговиот американски колега Лојд Остин, Галант истакна дека „можноста за договор во северната арена е при крај бидејќи Хезболах продолжува да се „здружува“ со Хамас“, пренесува Тајмс оф Израел.
Галант, исто така, му рекол на американскиот министер за одбрана дека „какво и да е сценариото, израелските одбранбени сили ќе продолжат да дејствуваат со цел да го уништат Хамас и да обезбедат враќање на заложниците што Хамас ги држи во Газа“, објави кабинетот на Галант, пренесува Танјуг.
Хезболах истрела ракети и беспилотни летала кон северен Израел по избувнувањето на конфликтот во Газа по нападот врз Израел од страна на палестинската милитантна група Хамас на 7 октомври минатата година, пренесуваат медиумите.
Хезболах најави дека ќе ги запре нападите доколку се постигне прекин на огнот во Газа, но, според написите, повеќемесечните преговори со посредство на САД, Катар и Египет се во застој.
Свет
Осомничениот за обидот за убиство рекол дека Трамп го разочарал како претседател и дека сака да ги направи Американците робови
Рајан Весли Раут (58), кој беше уапсен поради безбедносен инцидент на Флорида, што ФБИ го истражува како обид за убиство на републиканскиот претседателски кандидат Доналд Трамп, има богато криминално минато и исклучиво ги поддржува демократските кандидати од 2019 година, јавуваат американските медиуми.
Според „Њујорк пост“, Раут, кој е од Северна Каролина, често објавувал коментари за политиката на социјалните мрежи, а во април на мрежата Х напишал дека „демократијата е на гласачкото ливче“ оваа година.
„Не можеме да загубиме“, напиша тој повторувајќи ја реториката против Трамп, според весникот.
За Трамп рече дека го разочарал како претседател и дека „сака да ги направи Американците робови“.
Свет
Едно лице загина во поплавите во Чешка, седум се водат за исчезнати
Поплавите во Чешка ја однесоа првата жртва, жената што се удави во реката Красовка кај селото Крашов, во областа Брунтал, а седум лица се водат за исчезнати.
„Местото беше отсечено од многу силна струја на водата, но полицијата работи на самото место“, изјавила портпаролката на полицијата, Соња Штетинска, а пренесува порталот Idnes.cz.
Шефот на полицијата, Мартин Вондрашек, изјави дека седум лица се водат за исчезнати, три повеќе отколку во неделата.