Свет
„Ние не сме ‘Амазон’“, министерот за одбрана на Обединетото Кралство ја критикува Украина по барањата за дополнително оружје
Министерот за одбрана на Обединето Кралство, Бен Валас, е обвинет дека ги критикувал Украинците кога им рекол дека Британија не е малопродажниот гигант „Амазон“ откога му ја претставиле листата на барања за оружје.
На НАТО-самитот, што се одржа во Вилнус, Валас исто така рече дека ја советувал Украина дека меѓународната заедница сака да види благодарност за нејзината поддршка во војната со Русија.
„Без разлика дали ни се допаѓа или не, луѓето сакаат да видат благодарност. Вие ги убедувате земјите да се откажат од сопствените акции и, да, вашата војна е благородна војна и ние ја гледаме како војна што не ја водите само за себе, туку и за нашите слободи. Но, понекогаш треба да ги убедите пратениците во Америка, сомнителните политичари во други земји дека вреди тоа што го прават и дека добиваат нешто за тоа. Без разлика дали тоа ви се допаѓа или не, тоа е само реалноста. Сојузниците ѝ дадоа огромни количини резерви на Украина од почетокот на руската инвазија. Ние не сме ‘Амазон’, тоа им го кажав минатата година кога возев 11 часа за да ми дадат список со барања за повеќе оружје“, изјави Валас.
Запрашан за расправијата, премиерот Риши Сунак се огради од коментарите велејќи дека украинскиот претседател Володимир Зеленски постојано ја изразувал својата благодарност.
„Мислам дека секој може да види како тој се чувствува“, рече тој.
Премиерот рече дека луѓето во Украина се борат за своите животи и за слободата секој ден и плаќаат ужасна цена за тоа додавајќи дека ја разбира желбата на Зеленски да направи сè што може за да го заштити својот народ.
Претседателот Зеленски за забелешките на Валас за „Амазон“ рече дека не знае на што конкретно мисли министерот Валас, а даде објаснување за благодарноста.
„Верувам дека секогаш бевме благодарни на Обединетото Кралство, бевме благодарни на премиерите и на министерот за одбрана затоа што народот во Обединетото Кралство отсекогаш даваше поддршка, ние сме благодарни за ова“, додаде Зеленски.
Ова следуваше по обидите на западните лидери да ги смират тензиите со Украина откако претседателот Зеленски во вторникот сензационално ја обвини алијансата за апсурдно одложување на процесот за членство на неговата земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Аргентинците излегуваат на избори, Трамп порача: Ако не победи Милеј, нема ни долар помош
Аргентина, втората најголема држава во Јужна Америка, утре ќе одржи избори на кои се избира половина од пратениците во долниот и третина од сенаторите во горниот дом на Конгресот. Изборите се сметаат за тест на поддршката на претседателот Хавиер Милеј, но и како референдум за американската финансиска помош.
Американскиот претседател Доналд Трамп јасно порача дека ако победи Милеј, ќе продолжи американската поддршка и нов заем од 20 милијарди долари за стабилизирање на валутата, а ако загуби – помош нема да има.
„Нема да си го трошиме времето ако Милеј не победи“, изјави Трамп при средбата со аргентинскиот лидер во Белата куќа.
Опозицијата во Аргентина го обвини Милеј за предавство, а Трамп за уцена и колонијализам. „Ројтерс“ јави дека ваквите изјави го зголемиле незадоволството во земјата и поттикнале критики за „американско мешање во изборите“.
Според „Би-Би-Си“ и „Гардијан“, Трамп ја води политиката на поддршка само за сојузниците, но предупредуваат дека таквиот пристап може да предизвика нестабилност ако опозицијата победи и се сврти кон Кина или ЕУ.
Милеј влезе во политиката како радикален реформатор и по преземањето на власта спроведе длабоки економски резови – ги намали државните трошоци за околу 30%, укина голем број министерства и субвенции и отпушти многу јавни службеници. Тој го нарекува својот пристап „моторна пила“ за остри реформи.
Иако рејтингот на државата порасна, економијата влезе во рецесија, а сиромаштијата се зголеми. Реалните плати во јавниот сектор паднаа за 15 отсто, а од почетокот на неговиот мандат се одржаа три генерални штрајка.
Анкетите му даваат на Милеј околу 50 проценти поддршка, но општеството е силно поделено – богатите и младите ги поддржуваат реформите, а работничката класа ги смета за прегруби.
На изборите ќе се гласа за 127 пратеници и 24 сенатори. Анкетите предвидуваат дека партијата на Милеј, може да освои најмногу гласови, но ќе мора да бара коалиција за продолжување на реформите.
Според американските најави, ветените 20 милијарди долари би се користеле за стабилизирање на аргентинскиот песо преку доларска поддршка на централната банка.
Во Аргентина има околу 36 милиони регистрирани гласачи, а гласањето е задолжително за сите од 18 до 70 години.
Свет
Шефот на НАТО: Путин ја губи војната, сега е време за притисок
Генералниот секретар на НАТО, Марк Руте, изјави дека рускиот претседател Владимир Путин е пред крај со ресурсите за да ја продолжи војната против Украина и дека е време да се зголеми притисокот врз Русија за да се постигне праведен мир. Тој ја даде изјавата на прес-конференција по состанокот на Коалицијата на волјата во Лондон.
Руте верува дека ситуацијата на контактната линија јасно ја покажува неефикасноста на руската стратегија и огромната цена што Москва ја плаќа за незначителен напредок на терен.
„Во Украина, Путин добива многу малку нова територија на бојното поле, а каде што има маргинални добивки, тие доаѓаат со огромна цена. Стотици илјади Руси умираат поради лудата агресија на Путин. Украина продолжува храбро да се брани, нашата поддршка им помага. Вистината е дека на Путин му снемуваат пари, војници и идеи“, рече Руте.
Тој нагласи дека токму сега е моментот да се зголеми притисокот врз Русија. Во овој контекст, ги поздрави неодамнешните најави од европските сојузници и Канада за обезбедување дополнителна воена помош за Украина, како и одобрувањето на 19-тиот пакет санкции.
„Развојот на настаните на бојното поле покажува дека нашата поддршка за Украина функционира и ние мора да ја продолжиме. Мора да ја поврземе оваа поддршка со санкции и економски притисок врз Русија“, нагласи тој.
Генералниот секретар на НАТО изрази оптимизам за западното единство, наведувајќи ги „добрите дискусии“ оваа недела во Вашингтон, Брисел и Лондон, за кои верува дека укажуваат на движење во вистинската насока за завршување на војната.
Свет
Трамп воведе санкции врз колумбискиот претседател и неговото семејство
Соединетите Американски Држави воведоа санкции врз колумбискиот претседател Густаво Петро, објави Канцеларијата за контрола на странски средства на Министерството за финансии на САД. Неговата сопруга Вероника Алкосер, синот Николас Петро и министерот за внатрешни работи Армандо Бенедети се исто така на списокот на санкционираните, што дополнително ги затегнува односите меѓу САД и Колумбија.
Санкциите се засноваат на претседателскиот декрет EO14059, кој е насочен кон меѓународната трговија со дрога и организираниот криминал. Ова значи дека сите средства на Петро и неговите најблиски роднини во САД ќе бидат замрзнати, а на граѓаните и компаниите на САД им е забрането да соработуваат со нив.
САД го обвинуваат Петро дека дозволил производството на кокаин во Колумбија да порасне на највисоко ниво за една деценија за време на неговиот мандат, преплавувајќи го американскиот пазар и штетејќи му на американското општество.
Министерот за финансии Скот Бесент изјави дека претседателот Петро им дозволил на нарко-картелите да цветаат и одбил да ја запре оваа активност, поради што администрацијата на претседателот Доналд Трамп презема строги мерки за заштита на земјата од трговија со дрога.

