Свет
Новинар даде отказ по 18 години во Си-ен-ен; Трамп: Тој е голем губитник

Водителот на Си-ен-ен, Џим Акоста, кој служеше како дописник од Белата куќа за време на мандатите на Барак Обама и Доналд Трамп, рече дека попрво би го напуштил Си-ен-ен отколку да прифати понуда за нов ангажман доцна во ноќта. Акоста го најави своето заминување на крајот од своето едночасовно утринско шоу, порачувајќи им на гледачите: „Не се предавајте на лагите. Не се предавајте на стравот“.
Тој експлицитно не ги поврза своите чувства со Трамп, но импликацијата беше јасна, пишува Асошиејтед прес. Си-ен-ен рече дека одлуката да се премести Акоста од утринскиот во подоцен термин нема никаква врска со политиката.
Помалку од половина час пред објавата на Акоста, Трамп објави на социјалните мрежи дека гласините дека водителот си заминува се добра вест. „Џим е голем губитник кој нема да успее каде и да заврши“, напиша Трамп на својата социјална мрежа „Вистина“.
Си-ен-ен минатата недела објави дека ја менува својата дневна постава, преместувајќи го Волф Блицер во 10 часот наутро, во терминот на Акоста. Мрежата соопшти дека му понудила на Акоста термин на полноќ по источно време и преселба во Лос Анџелес.
Акоста, кој е во Си-ен-ен веќе 18 години, рече дека ја одбил понудата. Тој истакна дека луѓето често го прашуваат дали покривањето на првиот претседателски мандат на Трамп е врв во неговата кариера во Си-ен-ен. Тој тврди дека најважниот момент во неговата кариера било покривањето на патувањето на Обама на Куба во 2016 година и поставувањето прашања на кубанскиот лидер Раул Кастро за политичките затвореници.
„Како син на кубански бегалец, научив дека никогаш не е добро време да му се поклониме на тиранин. Отсекогаш верував дека работата на медиумите е да ја повикаат власта на одговорност. Секогаш се трудев да го сторам тоа во Си-ен-ен и планирам да го направам тоа во иднина“, најави Акоста.
Лошиот однос на Трамп со Акоста за време на неговиот прв мандат кулминираше кога Белата куќа накратко ја суспендираше новинарската пропусница на Акоста во 2018 година. Акоста продолжи да му поставува прашања на Трамп откако Трамп рече „доволно“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Речиси 1.900 камиони со хуманитарна помош пристигнаа во Газа

Израелската воена агенција која ја координира хуманитарната помош денеска соопшти дека во текот на изминатата недела, од палестинската страна на премините Керем Шалом и Зиким се собрани и дистрибуирани речиси 1.900 камиони со хуманитарна помош.
Како што се наведува, повеќе од 1.310 камиони што влегоа во Газа во текот на неделата превезуваа главно прехранбени производи, пренесува „Тајмс оф Израел“.
Агенцијата, која работи во рамките на израелското Министерство за одбрана, наведува дека ќе продолжи да го олеснува доставувањето на хуманитарна помош до цивилното население во Газа, „но не и до Хамас“.
Свет
Конструктивен беше состанокот на советниците за безбедност од Украина и нејзините партнери, вели Зеленски

Украинскиот претседател Володимир Зеленски изјави дека состанокот на советниците за безбедност од Украина и нејзините партнери, што се одржа во Велика Британија, бил конструктивен.
Аргументите на Киев беа слушнати и опасностите беа земени предвид, додаде тој во своето вечерно обраќање до Украинците.
Зеленски истакна дека на средбата учествувале претставници на Велика Британија, САД, Франција, Германија, Италија, Финска и Полска, со цел консолидирање на позициите за постигнување примирје.
„Патот кон мирот за Украина треба да биде определен заедно и само заедно со Украина, тоа е клучен принцип“, нагласи украинскиот претседател.
Свет
Макрон: Иднината на Украина не може да се одлучи без Украинците

Само неколку дена пред планираната средба меѓу рускиот претседател Владимир Путин и американскиот претседател Доналд Трамп, францускиот претседател Емануел Макрон нагласи дека Украина мора да биде вклучена во сите разговори за нејзината иднина.
„Иднината на Украина не може да се одлучи без Украинците, кои се борат за својата слобода и безбедност повеќе од три години“, напиша Макрон на X.
„Бидејќи и нивната безбедност е во прашање, Европејците исто така мора да бидат дел од решението, рече тој.
Макрон претходно разговараше по телефон со украинскиот претседател Володимир Зеленски, германскиот канцелар Фридрих Мерц и британскиот премиер Кир Стармер, напиша тој.
По разговорот со Макрон, Зеленски напиша на X: „Украина, Франција и сите наши партнери се подготвени да работат што е можно попродуктивно за вистински мир“.
Трамп треба да се сретне со Путин во Алјаска во петок. Според „Волстрит џурнал“, Путин бара целосна руска контрола врз источните региони на Украина, Донецк и Луганск, што Зеленски категорично го отфрла.