Висок претставник на Белата куќа рече дека САД веруваат оти Иран се подготвува „веднаш да изврши балистички напад врз Израел“.

„Постојат индиции дека Иран подготвува непосреден балистички напад врз Израел“, се вели во целосната изјава што ја пренесоа „Си-Ен-Ен“ и други светски медиуми.

„Ние активно ги поддржуваме одбранбените подготовки за да го заштитиме Израел од овој напад. Директен воен напад на Иран врз Израел ќе има сериозни последици за Иран“, продолжува изјавата.

„САД се подготвени да направат сè што можат за да му помогнат на Израел да пресретне сè што Иран ќе упати кон него“, изјави американски претставник за „Си-Ен-Ен“.

Да потсетиме, Иран во април лансираше бран беспилотни летала и проектили кон Израел – од кои огромното мнозинство беа успешно пресретнати.

Засега не е јасно колку овој потенцијален напад би бил силен во споредба со оној во април.

Поранешниот претседател на САД, Џими Картер, денеска наполни 100 години и стана првиот претседател кој го прославил тој роденден.

Картер беше претседател од 1977 до 1981 година, а во последните 19 месеци беше во болница во неговата родна држава Џорџија, пишува „Би-би-си“.

Поранешниот фармер, кој првпат влезе во политиката во 1960-тите како државен сенатор, „емотивно е ангажиран и сè уште има искуства, се смее и сака“, рече неговиот внук Џејсон во септември.

Според медиумите, овој стогодишник се уште има политички амбиции.

„Само се обидувам да гласам за (демократскиот претседателски кандидат), Камала Харис – на изборите во ноември, зборовите на Картер ги пренесе неговиот внук.

Маж нападнал и повредил три мали деца кои оделе во градинка во Цирих, соопшти швајцарската полиција. Осомничениот е уапсен.

Нешто попладне полицијата добила дојава за инцидентот во областа Оерликон во најголемиот швајцарски град. Полицијата соопшти дека децата биле на пат кон градинката со жена која работи во установата кога маж ненадејно ги избодел со нож.

Вработената во градинка брзо го совладала напаѓачот со помош на друг маж и го држела додека не дојде полицијата. Полицијата соопшти дека напаѓачот е 23-годишен кинески државјанин, пишува „Асошиејтед прес“.

Три петгодишни момчиња се пренесени во болници, од кои едно со тешки и две со умерени повреди, се вели во соопштението на полицијата. Полицијата не соопшти детали за можниот мотив за нападот.