Свет
Новоизбраниот претседател на Бразил најави преселување на амбасадата од Тел Авив во Ерусалим
Новоизбраниот претседател на Бразил, Жаир Болсонаро, за еден израелски весник изјавил дека има намера да ја пресели амбасадата на неговата земја од Тел Авив во Ерусалим.
Бразил на тој начин ќе стане втора голема земја по САД што ќе го стори тоа.
Одговарајќи на прашањето во интервју за денешното издание на списанието „Израел нaјом“ дали тој ќе ја пресели Амбасадата на Бразил како што најави за време на својата кампања, Болсонаро изјави дека Израел треба да се одлучи каде му се наоѓа главниот град.
„Кога ме прашаа за време на кампањата кога ќе станам претседател дали би го направил тоа, реков да, оној што одлучува за главен град на Израел си ти, а не друга земја“, изјави бразилскиот претседател кој го поддржува премиерот на Израел, Бенјамин Нетанјаху.
Израел го освои источен Ерусалим во шестдневната војна во 1967 година, а подоцна го анектира, што меѓународната заедница никогаш не го призна.
Палестинците планираат во тој дел од Ерусалим да биде главниот град на нивната земја. Меѓутоа, израелските водачи сметаат дека Ерусалим е нивниот главен град.
Претседателот на САД, Доналд Трамп, во декември отстапи од децениската политика на неговата земја и го призна Ерусалим како главен град на Израел поради тоа палестинскиот претседател, Махмуд Абас, сега ја блокира владата на Трамп.
По победата на Болсонаро, официјален претставник во владата на Нетанјаху за АФП изјави дека израелскиот премиер, најверојатно, ќе присуствува на инаугурацијата на новиот бразилски претседател, која ќе биде во јануари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дете најдено живо по два дена од поплавите во Јабланица под урнатините на семејната куќа
Продолжува борбата на голем број спасувачи за пронаоѓање на живите исчезнати лица по катастрофалната поплава што пред два дена се случи во Јабланица и во околните населени места.
Според официјалните информации, досега животот го загубиле 18 лица, а по голем број се уште се трага.
Сепак се појави и една добра вест, спасувачите пронашле дете под урнатините на неговата семејна куќа. Успеале да го извлечат и итно бил пренесен во болница.
Момчето било пронајдено под плочата тешка два тона која се срушила одозгора.
Европа
Поради планирање на терористички напад обвиненија добија трoјца тинејџери во Германија
Суд во германската провинција Северна Рајна-Вестфалија поднесе обвиненија против тројца тинејџери за планирање на терористички напад, пренесува ДПА.
Осомничените, на возраст од 15 и 16 години, беа уапсени во април за време на велигденските празници. Тие планирале напад во согласност со целите на терористичката група „Исламска држава“.
Обвинителството тврди дека тинејџерите ги разменувале плановите преку апликацијата „Телеграм“ и разговарале за напади во цркви и полициски станици.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.