Свет
Обвиниле невин човек дека е педофил, па го мачеле и го снимиле: затворска казна им се заканува на двајца Британци

Двајца ловци на педофили од Њукасл, кои понижија татко на „Фејсбук“ во живо обвинувајќи го за силување, се обвинети и се соочуваат со затворски казни.
Сем Милер (29) и Џејмс Мос (58) би можеле да станат првите во Велика Британија што ќе бидат затворени поради лов на педофили откога се соочиле со невин човек во неговиот дом, објави судот.
Го собориле на земја, му впериле светлина во очите, а потоа го обвиниле дека разменувал пораки со девојчето. Испрашувањето, кое траело 14 минути, директно на „Фејсбук“ го пренесувале двајцата обвинети.
Обвинителството соопшти дека двајцата му рекле на мажот дека го гледаат голем број луѓе, а со тоа дополнително ја продлабочиле неговата траума.
За време на сослушувањето беше објавено дека Сем и Џејмс повикале и полиција, човекот бил испрашуван и поминал 17 часа во притвор пред да биде ослободен, пишува „Метро њуз“.
Несреќниот маж, чиј идентитет не се открива, рекол дека имал самоубиствени мисли, дека неговото семејство претрпело голема штета, а потоа тоа што му се случило го нарече сајбер-малтретирање.
„Кога некој е уапсен, тој е невин додека не се докаже вината. Но, во нивни очи јас веднаш бев виновен“, рече тој.
Сем и Џејмс цело време се бранеле велејќи дека работат во јавен интерес.
Иако утре требаше да им биде изречена пресудата, судењето е одложено за 23 јуни.
„Сите опции се на маса“, рече судијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макронови: Кандис Овенс лаже дека Брижит е родена како маж за да добие влијание на интернет

Емануел и Брижит Макрон ја обвинија десничарската подкастерка Кандис Овенс дека намерно шири лажни тврдења дека првата дама е родена како маж, со цел да ја зголеми својата видливост на интернет.
Семејството Макрон веќе поднесе тужба за клевета во САД, која сега е проширена на 250 страници. Според нив, Овенс продолжува да ја користи својата платформа за ширење лаги, продавање производи што ги исмејуваат и прибирање донации.
Овенс, која има милиони следбеници на „Икс“ и „Јутјуб“, во септември објави нова сезона на серијата Стани Брижит. Таа дури тврдела дека постои завера во која се вклучени и Макронови.
Тврдењата потекнуваат од мал француски десничарски магазин, а авторката Натача Реј во 2024 беше осудена за клевета. Сепак, тоа не ја спречи Овенс да ја продолжи приказната.
Во тужбата се вели дека брачната двојка е изложена на немилосрдно светско малтретирање. Овенс, пак, ја отфрла тужбата и најавува жестока правна битка.
Свет
Европска комисија испратила инспекција во компанија за вакцини

Европската комисија соопшти дека ненадејно извршила претрес во простории на една компанија од секторот за вакцини, поради сомнеж за кршење на правилата за конкуренција преку „омаловажување“ на ривалите. Не се открива името на компанијата, ниту земјата членка.
Во соопштението се потсетува дека неодамна се заклучени две истраги во фармацевтскиот сектор – против израелската Teva (лекот Copaxone за мултипла склероза) и против Vifor (лекот Monofer за недостаток на железо).
Teva минатата година доби казна од 462,2 милиони евра за злоупотреба на доминантна позиција во неколку земји на ЕУ, а во јануари 2025 поднесе жалба пред Општиот суд на ЕУ.
Свет
Трамп: Хамас има три или четири дена да одговори, ако не го стори тоа ќе биде тажен крај

Американскиот претседател Доналд Трамп изјави дека палестинската милитантна група Хамас има околу три или четири дена да одговори на неговиот мировен предлог за Појасот Газа или ќе се соочи со последиците.
На заминување од Белата куќа, Трамп им рече на новинарите дека израелските и арапските лидери го прифатиле планот и дека само се чека Хамас. Тој рече дека Хамас има околу „три или четири дена“ да одговори.
„Хамас ќе го стори тоа или не, а ако не го стори тоа, тоа ќе биде многу тажен крај“, рече тој. На прашањето дали има простор за преговори за мировен план, Трамп одговори: „Не многу“.
Мировниот план на Белата куќа за Газа предвидува, меѓу другото, крај на конфликтот меѓу Израел и Хамас и враќање на сите заложници, мртви или живи, во рок од 72 часа откако Израел јавно ќе го прифати договорот. Откако ќе бидат ослободени заложниците, Израел, според американскиот план, би ослободил повеќе од 1.000 палестински затвореници, вклучувајќи неколку стотици осудени на доживотен затвор.
Палестинската територија би била управувана од привремена „технократска и аполитична“ влада која би управувала со секојдневните работи. Хамас би бил исклучен од таа влада. Привремената влада предвидена со американскиот предлог би била под надзор на „мировен комитет“ со кој претседава самиот Доналд Трамп, а во кој би играл улога и поранешниот британски премиер Тони Блер.
Планот наведува дека „членовите на Хамас кои ќе се обврзат на мирен соживот со Израел и ќе го предадат своето оружје ќе бидат амнестирани“, а оние кои „сакаат да ја напуштат Газа ќе имаат заштитен премин до нивните земји на дестинација“, пренесуваат светските медиуми.
Фото: принтскрин