Свет
Објавени договорите за влез на четирите нови региони во Русија
Границите на регионите ДНР, ЛНР, Херсон и Запорожје, поврзани со територијата на странски земји, се државни граници на Русија, според договорите за прием на четири региони во Русија и формирање нови ентитети.
На 30 септември документите беа потпишани во Кремљ од рускиот претседател Владимир Путин и лидерите од регионот.
Во договорите, меѓу другото, стои:
– До 1 јануари 2026 година во сите четири нови субјекти ќе важи преоден рок за решавање на прашањето за воената обврска и служењето на воениот рок;
– Исто така, дотогаш треба да се решат прашањата за интеграција на новите региони во економскиот, финансискиот, кредитниот и на правниот систем на Русија, како и во системот на владините тела;
– Руското законодавство и другите нормативни правни акти влегуваат во сила во новите региони од денот на нивниот прием во Русија;
– Нормативните правни акти на регионите Херсон и Запорожје не се применуваат доколку се во спротивност со Уставот на Русија;
– Во исто време нормативните правни акти на ДНР и ЛНР важат до крајот на преодниот период или усвојувањето на соодветниот правен акт на Русија;
– Владите на ДНР и ЛНР ќе продолжат со својата работа до формирање нови администрации на вршители на должност шефови на републиките;
– Владите на регионите Херсон и Запорожје треба да формираат управи на вршители на должност гувернери во согласност со руските закони.
Договорите привремено се применуваат од датумот на потпишување, а влегуваат во сила од датумот на ратификација.
Се очекува денеска да се одржи седница на државната Дума за да се ратификува договорот, а разгледувањето на договорот во Советот на Федерацијата е закажано за утре.
„Договор меѓу Русија и Запорошката област за прием на Запорожје во Русија и формирање нов ентитет во Русија од 30 септември 2022 година“, „договор меѓу Русија и ЛНР за прием на ЛНР во Русија и формирање нов ентитет во Русија од 30 септември 2022 година“, „договор меѓу Русија и Херсонската област за прием на Херсонската област во Русија и формирање нов ентитет во Русија од 30 септември 2022 година“, „договор меѓу Русија и ДНР за прием на ДНР во Русија и формирање нов ентитет во Русија од 30 септември 2022 година“, беа објавени на официјалниот портал за правни информации, пренесе „Информер.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.