Свет
Огромен подземен резервоар со вода пронајден под површината на Марс
Постои можност огромен резервоар со вода да се наоѓа длабоко под површината на Марс, во карпестата надворешна кора на планетата. Резервоарот е толку голем што би можел да наполни океан што би ја покривал површината на целата планета, заклучија научниците врз основа на сеизмички податоци добиени од сондата „Инсајт“ на агенцијата НАСА за време на мисијата што ја истражуваше внатрешноста на Марс.
Водата, која се наоѓа на 11,5 до 20 километри под површината на Марс, потенцијално нуди услови поволни за одржување микробиолошки живот, било во минатото или сега, велат истражувачите, пренесува „Ројтерс“.
„На овие длабочини кората е доволно топла за водата да постои како течност. На помали длабочини водата би била замрзната, како мраз“, изјави научникот од Универзитетот во Калифорнија и главен автор на студијата „Вашингтон рајт“, објавена во понеделникот во списанието Proceedings of the National Academy of Sciences.
„Инсајт“ слета на Марс во 2018 година за да ја проучува внатрешноста на планетата собирајќи податоци за разните слоеви. Мисијата на сондата заврши во 2022 година. Научниците добија податоци, кои укажуваат на присуство на вода.
Површината на Марс денес е студена и неплодна, но некогаш била топла и влажна. Студијата сугерира дека голем дел од водата што се наоѓала на површината на Марс се филтрирала во кората.
Геолошките истражувања покажаа дека пред повеќе од три милијарди години на површината на планетата имало езера, реки и океани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Полскиот премиер: Ако видите германски војници, не паничете
Најлошите поплави што ја погодија централна Европа во најмалку две децении оставија страшна трага на уништување од Романија до Полска, со тони кал и урнатини во градовите, уништени мостови, потопени автомобили и на крајот од драмата во срцето на Европа, сметките за штети ќе се мерат во милијарди долари.
Градовите јужно од Вроцлав, како што е Левин Брзески, веќе ја почувствуваа целата сила на поплавите, принудувајќи ги жителите да минуваат низ водата до половината или да бараат засолниште на покривите на зградите.
Германија им дојде на помош на Полјаците. Тоа беше можност за примеси на хумор во инаку незавидна ситуација. Така полскиот премиер Доналд Туск на хумористичен начин го најави доаѓањето на германски доброволци и војници, кои ќе им помогнат на Полјаците во санирањето на последиците од поплавите.
“If you see German soldiers, don’t panic. They’re here to help,” says Polish PM @donaldtusk after announcing that German troops were volunteering to help tackle the floods in Poland pic.twitter.com/h8XwO2egG3
— Daniel Tilles (@danieltilles1) September 19, 2024
„Ако видите германски војници, не паничете. Дојдоа да помогнат“, рече тој.
Инвазијата на Полска од страна на германските војници на 1 септември 1939 година се смета за почеток на Втората светска војна.
За време на германската окупација, 6 милиони Полјаци ги загубија животите, а повеќе од илјада села и градови беа срамнети со земја.
Свет
Повеќе од 1.000 луѓе евакуирани поради невремето во Италија, училиштата затворени
Реката Сенио се излеа во населбата Кастел Болоњезе кај Равена и водата стигнува до центарот на градот, додека низ регионот Емилија Ромања повеќе од 1.000 луѓе се евакуирани поради влошување на временските услови, соопштија денеска локалните власти.
Покрај 800-те луѓе евакуирани во областа Равена, уште 165 лица биле принудени да ги напуштат своите домови во областа Болоња, пренесува Анса.
Железничкиот сообраќај е во прекин од синоќа меѓу Форли и Фаенца, меѓу Равена и Кастел Болоњезе, Равена и Ферара и меѓу Равена и Фаенца поради временските услови кои можат да доведат до поплави.
Европа
ОН: Руските напади врз енергетската мрежа на Украина го прекршуваат хуманитарното право
Руските воздушни напади врз енергетската мрежа на Украина веројатно го прекршуваат меѓународното хуманитарно право, соопшти набљудувачката мисија на ОН, додека Украинците се подготвуваат за најлошата зима од почетокот на руската инвазија.
За време на инвазијата, Русија истрела стотици проектили и беспилотни летала врз украинските капацитети за производство, пренос и дистрибуција на електрична енергија.
Првиот голем бран удар се случи во есента и зимата 2022 година, неколку месеци откако Русија ја започна својата инвазија. Нападите продолжија во текот на целата војна, иако Москва значително ја засили својата кампања од март.
Секој бран напади ги остави украинските градови без струја.
Набљудувачката мисија на ОН за човекови права во Украина (HRMMU) го фокусираше својот извештај на девет бранови напади помеѓу март и август 2024 година.
„Постојат разумни основи да се верува дека повеќе аспекти на воената кампања за оштетување или уништување на цивилната инфраструктура за производство и пренос на електрична енергија и топлина во Украина ги прекршиле основните принципи на меѓународното хуманитарно право“, се вели во извештајот.