Свет
Огромни поплави по течението на Урал, илјадници евакуирани

Поплавите се зголемија денеска во подрачјето на два града во рускиот Урал, откако третата најдолга река во Европа ја проби браната, поплавувајќи најмалку 6.000 домови и принудувајќи илјадници да избегаат само со своите миленици и неколку работи.
Портпаролот на Кремљ, Дмитриј Песков, изјави дека поплавите во руските региони Курган и Тјумен се „неизбежни“ поради поплавите во уралскиот планински регион Оренбург, пренесе државната новинска агенција Тас. Песков рече и дека рускиот претседател Владимир Путин телефонски разговарал со гувернерите на двата региона.
Голем број руски региони на планините Урал, во областа на Сибир и во делови на соседен Казахстан се погодени од незапаметени поплави во последните години.
Реката Урал, која извира од планините Урал и се влева во Каспиското Море, во петокот за само неколку часа се крена неколку метри, а во тоа помогна и топењето на мразот. Реката го проби насипот на браната во градот Орск, на околу 1.800 километри источно од Москва.
Повеќе од 4.000 жители беа евакуирани од предградијата на градот. Поплавени се големи делови од Орск, град со 230.000 жители.
Снимките објавени од Министерството за вонредни состојби покажуваат како жителите минуваат низ вода длабока до вратот, спасуваат заглавени кучиња и пловат по поплавените патишта со чамци и кануа.
Гувернерот на регионот Оренбург, Денис Паслер, изјави дека ова е најтешката поплава во регионот откако се бележат такви податоци. Тој рече и дека се поплавени цели области по целото течение на реката Урал, долга 2428 километри, која тече низ регионот Оренбург, но и низ Казахстан и се влева во Каспиското Море.
Претседателот на Казахстан, Касим-Жомарт Токајев во саботата изјави дека овогодинешните поплави, според обемот и последиците, се најголемата природна катастрофа што ја погодила неговата земја во последните 80 години.
Предупредувања за поплави беа издадени и во други руски региони, а Куренков рече дека ситуацијата може многу брзо да се влоши. „Водата сè уште расте, а нивото ќе се зголемува само во наредните денови. Ситуацијата е сè уште критична“, рече Сергеј Салмин, градоначалник на Оренбург, град со околу 550.000 жители.
Локалните власти известија дека браната во Орск е изградена за да се справи со нивото на водата од 5,5 метри, но реката Урал се искачи на 9,6 метри. Федералните истражители отворија кривична постапка за небрежност и прекршување на безбедноста во 2010 година, кога се градеше браната. Обвинителите тогаш рекоа дека браната не се одржува како што треба.
Во неделата поради поплавата престана со работа и рафинеријата за нафта во Орск. Таа рафинерија лани преработила 4,5 милиони тони нафта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Објавени последните зборови на папата

Последните зборови на папата Франциско беа благодарност до неговиот здравствен асистент кој му помогна да ги поздрави верниците на плоштадот Свети Петар на Велигден, соопшти Ватикан.
„Ви благодарам што ме доведовте на плоштадот“, му рекол Франциско на Масимилијано Страпети, кој во изминатиот период му обезбедуваше 24-часовна нега на папата.
Папата Франциско (88) почина вчера по мозочен удар и срцева слабост. Претходно оваа година, тој помина пет недели во болница со двојно воспаление на белите дробови, но се врати во Ватикан пред речиси еден месец и оттогаш се чинеше дека се опоравува.
Последните денови ги поминал работејќи, спротивно на советите на лекарите кои го советувале да мирува најмалку два месеци за да му овозможи на телото да закрепне.
Погребот на папата ќе се одржи в сабота.
Свет
Голем број верници се собраа во Рим за да му оддадат почит на папата: „Тој беше посебен, на сите христијани ќе им недостига“

Голем број граѓани на Италија и од други земји се собраа во базиликата „Света Марија Велика“ во Рим, каде што ќе бидат положени посмртните останки на папата Франциско, за да му оддадат почит на починатиот поглавар на Римокатоличката црква.
На тоа место се собраа голем број медиуми од целиот свет, а има и такви на плоштадот пред базиликата „Свети Петар“, каде што ќе се одржи погребот на папата Франциско в сабота, 26 април.
Меѓу собраните е и Евертон Коелјо од Бразил, кој моментно живее во Германија.
„Вчераутро пристигнавме во Рим. Кога вчера шетавме во градот, ја слушнавме многу тажната вест дека папата Франциско починал. Бевме изненадени и многу тажни. Тој беше харизматичен папа. Беше од Аргентина, Јужна Америка. И ние доаѓаме од Јужна Америка, па затоа чувствуваме дека е уште поблизок до нас. Беше приземен, многу близок до луѓето. Не живееше во замок, живееше едноставен живот“, изјави Коелјо за „Танјуг“.
Коелјо понатаму наведува дека ова е најголемата порака што папата Франциско ја остава зад себе.
„На христијаните многу ќе им недостига. Пред да дојдеме се обидовме да присуствуваме на мисата. За жал, минатата недела добивме порака дека папата нема да може да присуствува и дека ја откажале. А сега кога слушнавме дека нè напушта, многу е тажно“, рече Коелјо.
Друг Бразилец, кој денес беше во Рим, за „Танјуг“ вели дека го памети папата Франциско како едноставна личност, но и како некој што го сака фудбалот.
„Се сеќавам дека папата беше навивач на ‘Сан Лоренцо’ во Аргентина. Папата беше одлична личност за мене“, рече соговорникот.
Жителка од Рим за „Танјуг“ вели дека се сеќава на многу од она што го кажал папата Франциско оценувајќи го како неверојатно.
„Мислам дека ќе биде тешко да се најде замена за него“, рече тој.
Погребот на папата Франциско ќе се одржи в сабота, 26 април, во 10 часот наутро на плоштадот пред базиликата „Свети Петар“.
Претходно денес, беше објавено дека телото на починатиот папа ќе биде однесено во базиликата „Свети Петар“ в среда во 9 часот наутро.
Свет
ММФ: Светската економија значително ќе забави, на САД драстично

Меѓународниот монетарен фонд (ММФ) ги намали своите прогнози за економски раст за 2025 година велејќи дека зголемувањето на царините и општата неизвесност ќе доведат до значително забавување.
Во својата најнова глобална прогноза,ММФ предвидува дека светската економија ќе порасне за 2,8 процента оваа година, што е намалување во однос на претходната проценка од 3,3 проценти.
Најголем пад меѓу развиените економии забележаа Соединетите Американски Држави – сега се очекува раст од 1,8 процент во споредба со претходната процена од 2,7 процента.
Прогнозата за раст за Обединетото Кралство е исто така намалена – од претходните 1,6 процент на 1,1 процент во 2025 година.