Свет
Одложено примирјето и ослободувањето на заложниците од Хамас; Израелците нападнаа со авиони и артилерија, според палестинските медиуми
Ослободувањето на заложниците според привремениот договор за прекин на огнот меѓу Израел и милитантите на Хамас нема да се случи пред петок, изјави синоќа израелскиот советник за национална безбедност. Израел и Хамас рано вчера се договорија за прекин на огнот во Газа за најмалку четири дена за да се овозможи пристигнување помош и ослободување најмалку 50 заложници, кои ги држат милитантите во палестинската енклава, во замена за најмалку 150 Палестинци затворени во Израел.
Времето на прекинот на огнот и ослободувањето на заложниците што Хамас ги зеде за време на нападот врз Израел на 7 октомври допрва треба официјално да биде објавено. Извор од египетските безбедносни сили рече дека посредниците побарале тој да почне денеска во 10 часот. Израелскиот јавен радиодифузен сервис „Кан“, цитирајќи израелски функционер, објави дека имало 24-часовно доцнење во спроведувањето на договорот бидејќи сè уште не е потпишан од Хамас и посредникот Катар.
Официјалниот претставник рече дека се оптимисти оти договорот ќе се спроведе по потпишувањето. „Преговорите за ослободување на нашите затвореници напредуваат и продолжуваат цело време“, рече израелскиот советник за национална безбедност, Цачи Ханегби, во изјавата објавена од кабинетот на премиерот.
„Ослободувањето почнува според првичниот договор меѓу страните, ама не пред петок“, рече Ханегби.
Првото примирје во речиси седумнеделната војна, со посредство на Катар, беше поздравено во светот како знак на напредок што може да ги олесни страдањата на цивилите во опколената израелска Газа и да донесе повеќе израелски затвореници дома. Арапските министри го пофалија договорот, но рекоа дека тој треба да стане првиот чекор кон целосен прекин на огнот.
Израел рече дека прекинот на огнот може дополнително да се продолжи доколку се ослободат повеќе заложници, а палестински извор рече дека вкупно 100 заложници би можеле да бидат ослободени до крајот на месецот. Хамас и неговите поврзани групи зедоа околу 240 заложници кога вооружени исламисти дивееја во градовите во јужен Израел на 7 октомври. Претходно Хамас ослободи само четворица.
Палестинските медиуми рано утринава објавија дека израелската авијација и артилерија го гранатирале јужниот град Кан Јунис во најмалку два брана, при што загинале 15 лица. Напади беа пријавени и во неколку други делови на Газа вклучувајќи го бегалскиот камп „Џабалија“, северно од градот Газа, и кампот „Нусејрат“ во центарот на Газа.
Израел не ги коментира информациите, а „Ројтерс“ не можеше независно да ги потврди извештаите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.