Свет
Однесувањето на Путин покажува дека е загрижен, велат од Иститутот за војна

Рускиот претседател Владимир Путин направи неколку значајни симболични гестови за време на неговата вчерашна средба со Александар Лукашенко, соопшти Институтот за проучување на војната во својот најнов извештај.
Путин го одведе Лукашенко да го посети Кронштат во Санкт Петербург, историски значајната тврдина, каде што руските војници и морнари водеа неуспешен антиболшевички бунт на почетокот на 1921 година, кој на крајот беше уништен од советската влада.
Состанокот, според институтот, сугерирал дека Путин се обидел да проектира моќ и доверба во сопствената надмоќ над фракцијата поврзана со Евгениј Пригожин со седиште во Санкт Петербург. Путин и Лукашенко го посетија Кронштад со гувернерот на Санкт Петербург, Александар Беглов, и помладата ќерка на рускиот министер за одбрана, Сергеј Шојгу, Ксенија.
„Беглов и Шојгу се лични непријатели на Пригожин, а јавната средба на Путин со Беглов, ќерката на Шојгу и со Лукашенко на историската основа на неуспешното востание во Кронштат речиси сигурно имаше цел да ја сигнализира надмоќта на Путин и неговите лојални кадри по вооружениот бунт на Пригожин“, велат од Институтот.
Аналитичарите забележаа дека Путин се трудел да се фотографира со голем број локални руски граѓани, вклучително и деца, додека бил во Кронштат.
„Веројатно, за да се претстави како популарен и сакан лидер меѓу рускиот народ, се фотографира со народот. Овие симболични гестови покажуваат дека Путин е загрижен за својата согледана популарност, безбедноста на неговиот режим и за низата фракции, кои се борат за власт во горните кадри на руската администрација“, заклучува институцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Црна Гора обвиткана во чад, снимка од воздух ги покажува ужасните размери на пожарот кај Буљарицa

Пожарот што избувна неодамна откако автомобил се запали на главниот пат во Буљарица се прошири на непристапен терен и стигна до областа над Чањ.
Пожарникарите од Будва, заедно со колегите од другите приморски општини, се на терен од вчера за да го изгаснат пожарот што го зафати ридот над Буљарица.
Во гаснењето на пожарот беа вклучени и авиони, хеликоптер и „Ер трактор“, пишува РТЦГ.
Денес низ цела Црна Гора беа регистрирани неколку големи пожари, а во Горњи Рогами неколку семејства беа евакуирани откако пожарот се приближи до домаќинствата.
Во текот на утрото, огромен шумски пожар избувна во ридовите над Чањ. Како што може да се види на социјалните мрежи, има многу густа зимзелена шума.
Пожарот се шири со голема брзина, а ширењето е поткрепено од силниот северен ветер.
Свет
ЕУ сака консултации со Трамп пред неговата средба со Путин за Украина

Европските лидери, кои тврдат дека Русија претставува егзистенцијална закана за континентот, бараат консултации со американскиот претседател Доналд Трамп за да ги исцртаат европските „црвени линии“ пред неговата средба со рускиот претседател Владимир Путин во петок во Алјаска, на која ќе разговараат за војната во Украина.
Барањето за формални консултации е еден од очекуваните заклучоци од вонредниот виртуелен состанок на министрите за надворешни работи на ЕУ, кој го свика високата претставничка на Унијата за надворешна политика, Каја Калас.
Калас пред состанокот изјави: „Претседателот Трамп е во право кога вели дека Русија мора да ја заврши војната против Украина. Соединетите Американски Држави имаат моќ да ја принудат Русија на сериозни преговори“.
Таа додаде дека „секој договор меѓу САД и Русија мора да ги вклучи Украина и ЕУ, бидејќи тоа е безбедносно прашање, и за Украина и за цела Европа“.
Полскиот министер за надворешни работи Радослав Сикорски, исто така, ја нагласи важноста на Европа: „Европа плаќа за одбраната на Украина и ја одржува украинската држава. Ова е прашање на егзистенцијалната безбедност на Европа. Ги цениме напорите на претседателот Трамп, но ќе носиме одлуки тука во Европа. За да се постигне праведен мир, Русија мора да ги ограничи своите воени цели.“
Белата куќа вели дека целта на состанокот во Алјаска е да се утврди дали Путин е подготвен да направи отстапки за мир, вклучително и прифаќање на западните безбедносни гаранции за Украина, што би значело признавање на долгорочниот легитимитет на владата во Киев предводена од Зеленски.
Трамп, кој во последните месеци станува сè понетрпелив со рускиот лидер, долго време тврди дека нема да има прекин на огнот сè додека лично не се сретне со Путин.
Свет
Германија: Татко ја убил партнерката, па влегол во автомобилот со децата и предизвикал страшна несреќа, бебето починало

Страшно злосторство ја потресе германската покраина Баден-Виртемберг. Во неделата навечер, околу 20:00 часот, во градот Валдахтал се случил крвав семеен конфликт кој завршил со тројна трагедија.
Според „Билд“, за време на жестока расправија во станот, 37-годишен маж ја убил својата 34-годишна партнерка „користејќи остро оружје“. После тоа, седнал зад воланот на автомобилот во кој биле и нивните деца – тримесечно бебе и 22-месечно момче, објавува „Хојте“.
Истражителите се сомневаат дека мажот намерно го возел својот автомобил во спротивната лента, каде што се судрил челно со Фолксваген управуван од 29-годишна жена. Тој и бебето починале на самото место од повредите. Двегодишното дете и возачот на Фолксвагенот се тешко повредени и итно префрлени во болница, но нивните животи се надвор од опасност.
Двете возила се запленети, а патот каде што се случила несреќата бил затворен неколку часа. Истрагата е започната истата вечер, а во работата е вклучена и судска медицина од Тибинген за да се утврди точната причина за смртта на жената.
Обвинителството и полицијата наведуваат дека мотивот за овој крвав чин сè уште е непознат.