Свет
ОН: Иран користи електрошокови врз ЛГБТ-децата
Тортурата со струја е често применувана врз лезбиските, хомосексуалните, бисексуалните и трансродовите деца во Иран, се вели во извештајот на Обединетите нации за кршењето на човековите права во Исламската Република објавен во средата.
Специјалниот известувач за состојбата со човековите права во Исламската Република Иран, Џаваид Реман, изрази загриженост за начинот на лекување на лезбиските, хомосексуалните, бисексуалните и трансродовите (ЛГБТ) деца.
„Специјалниот известувач е загрижен и за извештаите дека лезбиските, хомосексуалните, бисексуалните и трансродовите деца биле подложени на електрошокови и терапија со хормони и со силни психоактивни лекови. Овие практики претставуваат тортура и сурово, нехумано и понижувачко постапување и ги кршат обврските на државата во согласност со меѓународниот пакт за граѓански и политички права и Конвенцијата за правата на детето“, се вели во извештајот.
Извештајот нагласува дека ЛГБТ-лицата доживуваат дискриминација и се подложени на репаративни терапии во Иран и може да се соочат со смртна казна за хомосексуални активности. Тие исто така се измачувани, тепани и силувани од органите на прогонот и одмаздниците, се додава во извештајот.
The United Nations' Special Rapporteur on #HumanRights in #Iran reports that under the Islamic Republic, "lesbian, gay, bisexual and transgender children were subjected to electric shocks."@khamenei_ir is waging a war on the #LGBTQ community.https://t.co/lGK8ciVtnd pic.twitter.com/r49eiaOCQm
— National Union for Democracy in Iran (@NUFDIran) February 12, 2021
Високи службеници ја опишуваат ЛГТБ-заедницата со изрази на омраза, вклучително и со етикетирање поединци, како помалку од луѓе и болни. Во извештајот се вели дека тие дела во голема мера се недоволно пријавени поради стравот на жртвите од прогон.
Транссексуалноста е легализирана во Иран во 1987 година. Иран е втора земја во светот по бројот на трансродови операции. Но, истакнати активисти на ЛГБТ велат дека овие постапки се дел од вознемирувачка програма поттикната од хомофобијата бидејќи хомосексуалноста е нелегална.
Активистот Шади Амин вели дека иранскиот режим смета оти хомосексуалниста е болест и дека единствениот лек е промена на полот на лицето.
„Владата верува дека ако сте геј, вашата душа е на жена, треба и да го промените вашето тело. Сметаме дека ова им е начин да се борат против постоењето хомосексуални луѓе затоа што им го менуваат телото и го решаваат проблемот“, рече Амин.
Според шеријатскиот закон во Иран, хомосексуалните односи меѓу мажите може да бидат казнети со смрт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.