Свет
ОН стравуваат: Воените операции на Израел во Рафа може да доведат до масакр
Израелските воени операции во градот Рафа во Појасот Газа, дом на повеќе од еден милион бегалци, „може да доведат до масакр“, предупреди потсекретарот на ОН за хуманитарни прашања Мартин Грифитс, повикувајќи го Израел „да престане да ги игнорира“ повиците од меѓународната заедница да не го напаѓа Рафах.
„Повеќе од половина од населението на Газа, повеќе од еден милион луѓе, се во Рафах и ја гледаат претстојната смрт. Тие имаат малку храна, практично немаат пристап до медицинска нега, немаат место за спиење, немаат безбедно место“, рече Грифитс, додавајќи дека израелските напади се неспоредливи „по сила, бруталност и обем“.
Грифитс рече дека ОН не можат да обезбедат хуманитарна помош за тоа население и додаде дека „воените операции во Рафах може да доведат до масакр во Газа“, како и до крај на и онака кревките хуманитарни операции.
„Немаме ниту безбедносни гаранции, ниту набавки, ниту персонал неопходен за одржување на тие операции. Меѓународната заедница предупреди на опасните последици од каква било копнена инвазија во Рафах. Владата на Израел не може да продолжи да ги игнорира овие повици“, изјави високиот претставник на ОН, додавајќи дека војната во Појасот Газа мора да заврши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белата куќа: Когнитивниот тест не е неопходен за Бајден
Когнитивниот тест не е неопходен за американскиот претседател Џозеф Бајден, изјави портпаролката на Белата куќа Карин Жан-Пјер по жестоката јавна дебата за здравјето на актуелниот американски претседател.
„Тој знае како да се опорави“, рече портпаролката на прес-конференција, по неодамнешниот разочарувачки настап на Бајден во дебатата против републиканецот Доналд Трамп.
Тој настап беше означен како катастрофален.
Портпаролката на Белата куќа додаде дека нема апсолутно ништо скриено за здравјето на Бајден (81).
Лојд Догет, претставник на Американската демократска партија од Тексас, претходно денеска го повика Бајден да се повлече од трката за претседателските избори, по споменатата ТВ дебата со Трамп.
Од друга страна, високата функционерка на демократите, Ненси Пелоси денеска оцени дека е легитимно да се поставуваат прашања за здравствената состојба на Бајден, кој подолго време е под лупа на јавноста.
Свет
Во Австралија се трага по 12-годишно момче – додека пливало, било нападнато од крокодил
Австралиската полиција трага по 12-годишно момче кое било нападнато од крокодил додека пливало.
Алармот бил вклучен доцна синоќа во Палумпа, оддалечен град во северната територија, јавува „Скај њуз“.
Полицијата соопшти дека 12-годишното момче последен пат било видено како плива и дека „првичните извештаи се дека било нападнато од крокодил“. Беше почната потрага во која беа вклучени официјални лица и локални жители.
„Локалните полицајци се на местото на настанот и нашите мисли се со семејството и заедницата“, рече постариот наредник Ерика Гибсон.
„Полициските службеници во моментов ја пребаруваат областа со брод и благодариме на заедницата за континуираната помош“, додаде таа.
На северната територија има повеќе од 100.000 крокодили, а некои се големи и до шест метри. Сепак, фаталните напади врз луѓето се релативно ретки.
Во таа област се присутни и морски и слатководни крокодили. Морските крокодили се поголеми, поопасни и поагресивни кон луѓето и можат да пораснат до шест метри во должина. Слатководните крокодили можат да достигнат три метри во должина, а познато е и дека ги напаѓаат луѓето.
Свет
Полицаец во Германија останал без работа откако украл сирење од превртен камион
Полицаец во Германија останал без работа откако украл околу 180 килограми чедар од контејнер на превртен камион по сообраќајна несреќа.
На германскиот полицаец, кој беше отпуштен откако украде 180 килограми чедар од камион кој се преврте во сообраќајна несреќа, судот не му дозволи да се жали на пресудата.
Полицаецот, кој требало да го обезбеди местото на несреќата, му наредил на спасувачот да му даде девет пакувања од по 20 килограми сирење, чија вкупна вредност била околу 550 евра.
Тој однел некои од пакетите во својата канцеларија, но на некои пакети му се губи трагата, соопштија од судот во германскиот град Кобленц.
Се верува дека четирите пакети ги чувал за себе или за своите пријатели и роднини.
Полицаецот, кој рече дека не сака ни чедар, ја обжали пресудата.