Свет
Орбан против влезот на Украина во ЕУ: „Ќе ги проголтаат сите евра“

Унгарскиот премиер Виктор Орбан повторно го критикува потенцијалниот влез на Украина во Европската Унија ветувајќи дека ќе направи сè за да ја спречи Украина да му се приклучи на блокот.
Будимпешта го блокира отворањето на кластерот за преговорите за пристапување на Украина во ЕУ и сигнализира понатамошни опструкции во последните недели откога украинската безбедносна служба (SBU) соопшти дека открила унгарска шпионска мрежа во западна Украина.
Орбан го нарече проширувањето на Европската Унија благородна идеја, но ги критикува бирократите во Брисел за промовирање на членството на Украина. „За Брисел, пристапувањето на Украина е клучно прашање: контрола на политичката штета и добар бизнис во средината на изгубена војна“, напиша тој.
Орбан тврди дека членството на Киев ќе им наштети на унгарските интереси и ќе има економски последици за Европа.
„Украина би ги проголтала секое евро, форинта и злота што досега ги потрошивме за зајакнување на европските семејства, европските земјоделци и европската индустрија. За 10 години, не би можел да бидам мирен пред себе, моите деца и земјата ако не направам сè сега за да ги заштитам Унгарија и Европската Унија од сонот на Брисел за пристапување на Украина“, изјави тој.
Киев официјално аплицира за членство во 2022 година и ги почна преговорите за пристапување во јуни 2024 година. Лидерите на ЕУ ја поставија 2030 година како прелиминарен датум за потенцијален влез на Украина. Како земја членка Унгарија има право на вето во секоја фаза од процесот.
Шефицата за надворешна политика на ЕУ, Каја Калас, на 9 мај изјави дека иако Брисел би претпочитал да обезбеди едногласна поддршка, има алтернативни планови доколку Унгарија стави вето на пристапувањето на Украина во блокот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Свет
(Видео) „Летечки Чернобил“ во акција: Русите активираат иновативни крстосувачки ракети на нуклеарен погон, Американците внимателно ја следат ситуацијата

Русија, според сателитските снимки и зголемената активност на тест-полигонот „Арктик Панково“ во архипелагот Новаја Земја, веројатно се подготвува за уште еден тест на крстосувачката ракета со нуклеарен погон „Буревјешник“, која американските претставници ја нарекуваат „Летечки Чернобил“.
Ова оружје го претстави рускиот претседател Владимир Путин во 2018 година како дел од новата генерација стратешко оружје.
Како дополнителен знак дека тестот се приближува американските воздухопловни сили го распоредија својот специјализиран авион WC-135R Constant Phoenix, кој е дизајниран да детектира радиоактивни честички во атмосферата.
Имено, според податоците од FlightRadar, авионот со оружје полетал од базата на RAF, Милденхол, во Велика Британија и поминал приближно 14 часа над Баренцовото Море, во близина на Мурманск и западно од Новаја Земја. Американските разузнавачки служби проценуваат дека од октомври 2023 година Русија извршила 13 тест-лета на „Буревјешник“, без да постигне одржлив успех. Најдолгиот регистриран тест траел две минути и поминал помалку од 35 километри, објавува „Вечерњи лист“.
За време на тестот во 2019 година ракетата се урна во Баренцовото Море, а за време на спасувачката мисија се случи експлозија, во која животот го загубија седум лица, вклучувајќи експерти од нуклеарниот центар „Саров“, пишува United24media.
Облакот од радиоактивни честички се прошири до градот Северодвинск, а подоцна беше откриен во делови од Скандинавија. Понатаму, во 2020 година специјалниот претставник на САД за контрола на оружјето, Маршал Билингсли, во Сенатот ја повика Москва да го запре развојот на проектот предупредувајќи на еколошките ризици бидејќи нуклеарната централа може да ослободи радиоактивен материјал за време на летот и да ги контаминира местата на падот.
Во октомври 2023 година Путин изјави дека последниот тест е успешен и додаде дека развојот на „Буревјешник“ е речиси завршен.
Ракетата треба да има неограничен дострел и нуклеарен погон, што би ѝ овозможило да комбинира стратешки дострел со нуклеарен товар. Сепак, повторените неуспеси и безбедносните проблеми предизвикаа меѓународни дебати за одржливоста и за опасностите од ова оружје.
Уште во 2020 година, тогашниот претставник на САД за контрола на оружјето, Маршал Билингсли, ја повика Русија да го запре развојот на ракетата предупредувајќи на огромни еколошки ризици. Тој нагласи дека нуклеарната централа може да ослободи радиоактивен материјал за време на летот и да ги контаминира областите за слетување.
За разлика од стандардните крстосувачки ракети, кои се напојуваат со млазни мотори, ракетата користи нуклеарен реактор за погон и треба да стане првата оперативна ракета од ваков вид. САД го истражуваа концептот на ракети на нуклеарен погон во 50-тите и од 60-тите како дел од проектот „Плутон“, но сите беа откажани поради загриженост за опасноста што системот би ја претставувал за американското население.
Напредниот погонски систем на „Буревјешник“ и речиси неограничениот дострел би можеле да ѝ овозможат на Русија да ја користи ракетата на радикално нови начини. Директорот на одбранбената разузнавачка служба на Велика Британија, генерал Џејмс Хокенхал, им рече на новинарите во 2020 година дека Москва тестира систем на крстосувачки ракети на нуклеарен погон со „глобален дострел, што му овозможува да напаѓа од неочекувани насоки“ и „речиси неограничено време на крстарење“. Ова значи дека ракетата би можела да орбитира околу одредена цел долго време пред ударот, потенцијално дури и да орбитира околу целата Земја, објавува „Фајненшл тајмс“.
Пред неколку дена Русија привремено го затвори воздушниот простор над полигонот Капустин Јар, а по повлекувањето од договорот за ИНФ, Дмитриј Медведев најави дека ќе следуваат понатамошни чекори.
Фото: принтскрин