Свет
Орбан: Сите гледаат дека војната во Украина е изгубена, позицијата на Унгарија може да стане мнозинство
Унгарскиот премиер Виктор Орбан денеска изјави дека секој може да види оти војната во Украина е изгубена и дека е лоша одлука да се влезе во неа.
Тој додаде дека секое унгарско домаќинство изгубило речиси 6.000 евра поради војната, а богатите земји изгубиле уште повеќе, пренесе МТИ.
Орбан денеска за унгарските јавни медиуми изјави дека Унгарија не треба да се плаши од ситуации во кои застапува поинаква позиција од другите 26 членки на Европската Унија бидејќи нејзината позиција во иднина може да стане мнозинство.
Тој го изјави ова откога претходната вечер стави вето на друга изјава на ЕУ во врска со Украина.
Тој потсети дека Унгарија претходно беше единствената земја што се спротивстави на миграцијата, изгради ограда на границата и влезе во конфликт по ова прашање.
„Осум или девет премиери, кои претходно протестираа против сегашните правила за бегалците, во четвртокот буквално го повторија она што Унгарија го кажа и направи пред десет години“, рече Орбан.
Тој додаде дека унгарските ставови во врска со војната сега се во слична ситуација.
„Сè уште сме далеку од мнозинството бидејќи мнозинството земји членки вчера одлучија да ја продолжат војната испраќајќи уште повеќе пари и оружје во Украина, но таа одлука повеќе не е цврста и непоколеблива како порано“, посочи тој.
Орбан рече дека е убеден оти, како и во случајот со миграцијата, „ќе дојде момент кога унгарската позиција ќе стане заедничка позиција на Европа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија потврди дека извршила напад врз украински воени и енергетски објекти
Руското Министерство за одбрана соопшти денеска дека Москва синоќа извршила напад врз украинските воено-индустриски и енергетски објекти како одговор на тоа што го нарече „терористички напади“, објавија светските агенции.
„Како одговор на терористичките напади на Украина врз цивилни објекти на руска територија, синоќа вооружените сили на Руската Федерација извршија напад со високопрецизно оружје и беспилотни летала врз претпријатија од воено-индустрискиот комплекс на Украина и енергетски објекти кои го обезбедуваат нивното работење. Целите на нападот се исполнети. Сите целни објекти се погодени“, се вели во соопштението на министерството.
Во меѓувреме, Каспискиот козорциум за гасовод (КТК) денеска соопшти дека ги прекинал своите операции откако неговото пристаниште во Русија на брегот на Црното Море било сериозно оштетено во напад од украински воени беспилотни летала.
Свет
162 лица загинаа во поплавите во јужен Тајланд
Портпаролот на тајландската Влада, Сирипонг Ангкасакулкиат денеска изјави дека 162 лица го загубиле животот во поплавите во јужен Тајланд, пренесуваат агенциите.
Околу еден милион домаќинства и повеќе од три милиони луѓе се погодени во поплавите во 12 провинции во јужен Тајланд предизвикани од обилните дождови во последните неколку дена.
Тајландскиот премиер Анутин Чарнвиракул претходно прогласи вонредна состојба во провинцијата Сонгкла. Поплавите го погодија и најголемиот град во јужен Тајланд, Хат Јаи.
Свет
Без струја останаа повеќе од 600.000 луѓе по руските напади во Украина
Повеќе од 600.000 луѓе останаа без електрична енергија во Украина по руските напади со ракети и беспилотни летала, соопшти украинското Министерство за енергетика.
„Како резултат на нападите, повеќе од 500.000 потрошувачи во Киев и повеќе од 100.000 потрошувачи во неговиот регион останаа утринава без електрична енергија“, наведе Министерството.
Како што беше додадено, речиси 8.000 луѓе во регионот на Харков останаа без електрична енергија. Нападите започнаа синоќа и продолжија утрово.

