Свет
Освен од Нагорно-Карабах, Ерменија би се откажала и од ОДКБ
Ерменскиот премиер Никол Пашинјан најави во понеделникот дека неговата земја би можела да се повлече од Организацијата на Договорот за колективна безбедност (ОДКБ) предводена од Москва во најнов изблик на незадоволство поради недоволната поддршка од нејзиниот сојузник Русија, пишува „Москоу тајмс“.
Ереван е сè пофрустриран поради, како што го нарекува, неуспехот на Русија да ја заштити Ерменија која е соочена со воение закани од Азербејџан.
„Не исклучувам дека Ерменија ќе донесе одлука да се повлече од ОДКБ“ ако блокот не ги почитува обврските од договорот,“ рече тој на прес-конференција во Ереван.
Коментарите на Пашинјан дојдоа пред најавените разговори со азербејџанскиот претседател Илхам Алиев во четврток во Москва, каде домаќин ќе им биде рускиот претседател Владимир Путин.
Претходно, ерменскиот премиер најави и големи промени во политиката на неговата земја во однос на нејзиниот клучен непријател Азербејџан по прашањето на мнозински ерменскиот регион Нагорно-Карабах.
„Ерменија е подготвена да ја признае енклавата Нагорно-Карабах како дел од Азербејџан ако Баку ја гарантира безбедноста на своето етничко ерменско население,“ посочи Пашинјан цитиран од руската државна новинска агенција ТАСС и рускиот медиум „Осторожно“.
Во 2020 година, Азербејџан ја презеде контролата врз областите што беа контролирани од етничките Ерменци во и околу планинската енклава и оттогаш периодично го затвора единствениот пристапен пат што го поврзува Нагорно-Карабах со Ерменија, на кој енклавата се потпира за финансиска и воена поддршка.
„Нагорно Карабах опфаќа 86.600 квадратни километри од територијата на Азербејџан. Ако се разбераме како што треба, Ерменија ќе го признае територијалниот интегритет на Азербејџан во наведените граници, а Баку – територијалниот интегритет на Ерменија на 29.800 квадратни километри “, рече Пашинјан.
Нагорно-Карабах е извор на конфликт меѓу двата кавкаски соседа уште од годините пред распадот на Советскиот Сојуз во 1991 година, а меѓу етничките Ерменци и туркиските Азербејџанци повеќе од еден век.
Заглавени во повеќедецениски територијален конфликт, двете земји сега се обидуваат да преговараат за мировен договор и со помош на ЕУ и САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Премиерката на Естонија: Немаме план Б ако Украина ја загуби војната
Естонската премиерка Каја Калас изјави дека Естонија нема план Б доколку Украина ја загуби војната.
„Не треба да се предаваме на песимизмот. Победата во Украина не е само територија. Ако Украина влезе во НАТО, дури и без одредена територија, тогаш тоа е победа бидејќи ќе биде ставена под чадорот на НАТО“, рече Калас во интервју за Би-Би-Си.
Владата на Естонија одвои повеќе од еден процент од естонскиот БДП за воена и финансиска помош за Украина.
„Ако секоја земја на НАТО го направи тоа, Украина ќе победи“, посочува Калас.
Естонија, мала балтичка држава која некогаш беше дел од Советскиот Сојуз, е уверена дека откако ќе завршат борбите во Украина, рускиот претседател Владимир Путин ќе го сврти своето внимание кон Балтикот, барајќи да ги врати земјите како Естонија под контрола на Москва.
Свет
(Видео) Поплави во јужна Германија, жителите евакуирани со хеликоптери
Невреме вчера и денеска погоди големи делови од јужна Германија, предизвикувајќи прекин на сообраќајот, а некои жители мораа да бидат евакуирани со хеликоптер.
Во областа на баварскиот град Аугсбург, жителите мораа да бидат евакуирани поради дефект на насип и брана, соопштија властите.
Поради поплавите, во прекин е железничкиот сообраќај меѓу главниот град на Баварија, Минхен, Брегенц во Австрија и Цирих во Швајцарија.
Во прекин беше и линијата меѓу Улм и Аугсбург, а меѓуградските возови на релација Штутгарт-Минхен беа пренасочени.
Жителите на баварскиот град Фишах, западно од Минхен, биле изнесени со хеликоптер од своите домови откако се излеа реката Шмутер.
Update zum Wehr#Hochwasser pic.twitter.com/lX5hrZp46M
— Bummibaer 🐻 🇺🇦 (@MrBummiBinBaer) June 1, 2024
Водостојот расте, дождот не престанува да паѓа. Прогласена вонредна состојба
Мештаните поинаку не можеа да ги напуштат своите домови, изјави портпаролката на окружните власти. Според полицијата, службите за итни случаи и чамците ќе ги преземат луѓето во поплавените домови. Неколку соседни окрузи прогласија вонредна состојба бидејќи дождот продолжува да паѓа и нивото на водата расте.
Во сојузната покраина Баден Виртемберг, западно од Баварија, ситуацијата брзо се влоши откако реката Ротум почна да се излева на неколку места.
Во малиот град Рајнштетен, 150 служби за итни случаи работат повеќе од 22 часа за да ја ублажат поплавата што се случи по пукањето на браната, изјави градоначалникот Филип Буеркл за ДПА.
Буеркл рече дека противпожарните служби од блиската област пумпаат вода од подрумот и дистрибуираат вреќи со песок. Досега е евакуиран само еден дом за стари и изнемоштени лица во кој престојувале 15 лица.
Училиште во селото Мекенбеурен, во близина на езерото Констанца, мораше да биде евакуирано откако локалната река проби вреќи со песок поставени околу него.
Германската метеоролошка служба предвиде дополнителни грмежи и до 80 литри дожд на метар квадратен во јужните делови на Германија. Невремето се очекува да продолжи и утре.
Свет
Пукање во западна Германија, ранети четири лица, напаѓачот е во бегство
Четири лица се ранети денеска во престрелка во Хаген, во западна Германија, а осомничениот сторител е во бегство, соопшти полицијата. Во потрагата бил вклучен и полициски хеликоптер.
Властите претходно потврдија за ДПА дека двете места на злосторството вклучуваат фризерски салон и блиска станбена зграда во Хаген, јужно од Дортмунд.
Полицијата е на местото на злосторството, а на граѓаните им се препорачува да го избегнуваат просторот околу местото на злосторството.