Италија има најголем процент на постари лекари од сите земји на ЕУ, со просечна возраст од 65 или повеќе години, а нивниот удел во вкупниот број медицински персонал е 26,7 отсто, покажуваат податоците на европската статистичка агенција „Евростат“.

На второ место е Унгарија со 22,4 отсто постари лекари, а трета е Естонија со 22,3 отсто, пренесува агенцијата „Анса“.

Германија има најголем процент на лекари на возраст меѓу 55 и 64 години (36,1 отсто), потоа Бугарија со 33,9 отсто и Летонија со 27,4 отсто.

Највисок процент на млади лекари има Малта со 46 отсто, потоа Романија (34,6 отсто) и Холандија (29,7 отсто).

На европско ниво процентот на лекари на возраст од 55 години или повеќе е 40 отсто, соопшти „Евростат“.

Најдобриот светски тенисер, Новак Ѓоковиќ, денеска, по пласманот во осмина-финалето на Австралија опен, својата победа ѝ ја посвети на Соња Поњавиќ, студентката што вчера беше тешко повредена во инцидент на една од блокадите на протестите во Белград.

Имено, Ѓоковиќ по победата со син фломастер на камерата напиша „За Соња“. Тенисерот, потсетува „Н1 Србија“, на крајот на минатата година, по трагедијата во Нови Сад, ги поддржа и студентите во борбата за правда.

Соња Поњавиќ, студентка во прва година на Правниот факултет, беше повредена вчера во центарот на Белград кога возач влетал во група студенти додека тие држеле 15-минутно молчење во чест на загинатите во падот на натстрешникот на железничката станица во Нови Сад.

Од силината на ударот студентката се нашла на покривот од автомобилот, кој продолжил да се движи носејќи ја триесетина метри, а потоа паднала на земјата.

Полицијата соопшти дека го легитимирала и го затекнала возачот М. П. (38), кој е осомничен дека вчера околу пладне со автомобил „форд фокус“ удрил во 20-годишна жена. Се сомнева дека во автомобилот имало уште две лица, соопшти МУП, а „Телеграф“ ја објави неговата фотографија.
Насилникот веќе има досие, а бил осудуван дури седумпати. Сѐ уште не е познато за какви кривични дела е осуден. Сега тој може да биде осуден за тешко убиство во обид, пренесуваат медиумите во соседството.

Ивица Дачиќ, вицепремиер и министер за внатрешни работи на Република Србија, изјави дека белградската полиција во рок од 10 минути го пронашла возилото кое ја соборило 20-годишната девојка. Пет минути потоа, вкупно 15 минути по настанот, пронајдени се возачот на „фордот“ и уште две лица, кои биле во возилото со него, од кои едното малолетно“, рече Дачиќ.

Најмалку 12 Индијци загинаа додека служеа во руските вооружени сили, соопшти индиското Министерство за надворешни работи.

Како што е наведено, уште 18 Индијци во моментот служат во руската армија, од кои 16 се водат за исчезнати, пренесе „Ројтерс“.

Индија минатата година откри голема мрежа за трговија со луѓе, која ги намами младите мажи со ветувања за работа во Русија, а потоа ги принуди да учествуваат во војната во Украина, наведува агенцијата.

Трговската размена меѓу Индија и Русија се зголеми по руската инвазија на Украина во 2022 година, што помогна да се ублажи влијанието на западните санкции врз Москва. Индија сега е втор најголем увозник на руска сурова нафта по Кина. Според статистичките податоци на Министерството за трговија, Индија купила руска нафта во вредност од 46 милијарди долари во последната фискална година.