Свет
Откриена двоглава звечарка во Њу Џерси
Во шумата Пин Барен во Њу Џерси е пронајдена штотуку родена звечарка со две глави, а научниците откриле дека има два мозока кои работат независно еден од друг.
Боб Запалорти од Херпетолошкото друштво рекол дека змијата ја откриле двајца работници во легло на крајот на август, дури по нејзиното изведување, пренесува АП.
Таа е единствената таква змија досега откриена во Њу Џерси и, најверојатно, не би преживеала во дивината затоа што нејзините глави би можеле да удрат во нешто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Кадиров: Руски пратеници го нарачаа моето убиство, можеби ќе нарачам крвна одмазда
Чеченскиот лидер Рамзан Кадиров ги обвини руските пратеници од соседните региони Дагестан и Ингушетија дека го подготвуваат неговиот атентат и им се закани со крвна одмазда доколку не ја докажат својата невиност.
„Има сведоци, луѓе од кои го нарачале убиството. Прашаа колку би сакале за нарачката“, рече Кадиров за време на состанокот со чеченските безбедносни сили.
Кадиров како одговорни за наводниот заговор ги именуваше дагестанскиот сенатор Сулејман Керимов и двајцата пратеници на Државната дума, Бехан Барахоев од Ингушетија и Ризван Курбанов од Дагестан.
„Ако не го докажат спротивното, официјално ќе наредам крвна одмазда“, рече тој. Крвната одмазда во Чеченија се однесува на чинот на одмазда на непријателот со нивно убивање или убивање на нивните роднини, пишува Политико.
На истиот состанок, Кадиров, исто така, ги обвини тројцата дека се одговорни за пукањето во септември во московската канцеларија на Wildberries, најголемиот руски онлајн трговец на мало.
Свет
Израел се обиде да го убие политичкиот лидер на Хезболах во центарот на Бејрут: „Тој преживеа“
Вчера во израелски напади во центарот на Бејрут загинаа 22 лица, а повеќе од 100 се повредени, соопштија либанските власти, додека висок функционер на Хезболах за влакно избегнал израелски обид за атентат, потврдија три безбедносни извори.
Во јужен Либан, двајца мировници на Обединетите нации беа повредени кога израелски тенк пукаше на набљудувачка станица во седиштето на силите во Рас ал-Накура, поради што ОН соопштија дека нивниот персонал се соочува со зголемена опасност.
Конфликтот меѓу Израел и Хезболах избувна пред една година кога групата поддржана од Иран отвори оган во поддршка на палестинската милитантна група Хамас на почетокот на војната во Газа. Тоа драматично се засили во последниве недели кога Израел почна да ги бомбардира јужните предградија на Бејрут, јужниот дел и долината Бека, при што загинаа многу од највисоките лидери на Хезболах.
Вафик Сафа, кој ја предводи единицата за врски и координација на Хезболах одговорна за соработка со либанските безбедносни агенции, вчера вечерта беше цел на Израел, но преживеа, соопштија безбедносни извори.
Израелските напади погодија густо населена станбена зона со станбени згради и мали продавници во срцето на Бејрут.
Израел не издаде предупредувања за евакуација пред нападот и претходно не ја напаѓал областа, која е далеку од јужните предградија на Бејрут каде Израел постојано го бомбардираше седиштето на Хезболах.
Либанското Министерство за здравство извести за 22 загинати и 117 ранети, а меѓу загинатите има и осумчлено семејство. Обидот за атентат врз Сафа, чија улога ги спојува безбедносните и политичките прашања, означи проширување на израелските цели меѓу претставниците на Хезболах, кои претходно се фокусираа на воените команданти и врвните лидери на групата.
Израел веднаш не го коментираше инцидентот. Меѓутоа, Израел објави дека го убил Мухамед Абдула, водачот на мрежата Исламски џихад во палестинскиот бегалски камп Нур Шамс.
Европа
(Фото) Литванија постави „змејски заби“ на границата со Русија
Литванија постави противтенковски бариери познати како „змејски заби“ на мостовите што ја поврзуваат земјата со Русија. Министерството за одбрана соопшти и дека е поставено „огнено оружје“ околу вториот утврден мост на реката Неман за да се спречи евентуален руски напад.
„Тврдините ќе бидат поддржани со огнена моќ, доколку е потребно, за да се запре и уништи непријателот“, се вели во соопштението. Реката Неман е дел од границата меѓу Литванија и руската ексклава Калининград. Долга е 930 километри и тече од Белорусија преку Литванија, а потоа се влева во море.
„Змејски заби“ се користат за забавување на тенковите и оставање возила ранливи на непријателски напади. За прв пат се користени за време на Втората светска војна, а се направени од армиран бетон.
Фотографиите од осветлениот мост над реката Неман покажуваат десетици триаголни бетонски блокови кои го блокираат патот.
Lithuania is testing iron anti-tank obstacles that will soon reinforce the dragon’s teeth, fortifying bridges on the Kaliningrad route. These barriers are proven to effectively block heavy vehicles, significantly slowing any advance. If needed, firepower will be ready to support. pic.twitter.com/tBKhb1wLWD
— Lithuanian MOD 🇱🇹 (@Lithuanian_MoD) October 10, 2024
Извештаите укажуваат дека биле поставени и мини, митралези, бодликава жица и метални бариери. „Ова е превентивен чекор за да се обезбеди поефикасна одбрана“, соопшти литванското Министерство за одбрана.
Откако Кремљ ја нападна Украина во 2022 година, границата меѓу Калининград, Полска и Литванија стана една од најзацврстените во Европа.
Минатиот месец Литванија постави и „змејски заби“ на мостот изграден во 1907 година, кој ја минува реката Неман и го поврзува рускиот град Советск во регионот Калининград со литванското село Панемуне.
Лауринас Кашчиунас, министер за одбрана на Литванија, оваа недела рече дека поставувањето „змејски заби“ е дел од одбранбените мерки на сите литвански мостови. „Некои мостови ќе бидат зацврстени, а други ќе бидат подготвени за уривање“, рече тој.
Другите земји од ЕУ и НАТО кои граничат со Русија и Белорусија инвестираа милиони во зајакнувањето на нивните граници. Најобемна е полската програма наречена „Источен штит“, која ќе чини околу 1,8 милијарди фунти, а делумно е финансирана од ЕУ.