Европа
Оштетен фински гасовод, НАТО се вклучи во истрагата

Оштетувањето на подводниот гасовод и телекомуникацискиот кабел што ги поврзува Финска и Естонија под Балтичкото Море е резултат на „надворешна активност“, објави финската влада.
Генералниот секретар на НАТО Јенс Столтенберг рече дека НАТО ги споделува своите информации поврзани со штетите и дека е подготвен да застане со сојузниците. Финска влезе во НАТО во април оваа година, додека Естонија е членка од 2004 година.
„Веројатно оштетувањето на гасоводот и комуникацискиот кабел е резултат на надворешна активност. Причината за штетата се уште не е јасна, истрагата продолжува во соработка со Финска и Естонија“, изјави претседателот Саули Нинисто.
„Разговарав со генералниот секретар на НАТО Јенс Столтенберг денеска. НАТО е подготвен да помогне во истрагата“, рече тој.
Гасоводот Балтички конектор, долг 77 километри, беше затворен рано во неделата поради загриженост дека тече гас. Финскиот оператор Гасгрид рече дека поправките може да траат со месеци или повеќе.
„Падот на притисокот во гасоводот беше доста брз, што покажува дека не се работи за мала пукнатина. Но, причината не е јасна“, изјави за Ројтерс, балтички службеник за енергетика, запознаен со ситуацијата, кој сакаше да остане анонимен.
Финските медиуми пишуваат дека постои сомневање дека Русија го извршила нападот и го оштетила гасоводот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.