Москва ги поддржува напорите на унгарскиот премиер Виктор Орбан насочени кон изнаоѓање мирно решение и решавање на хуманитарните прашања поврзани со размената на затвореници, изјави денеска портпаролот на рускиот претседател, Дмитриј Песков.

„Претпоставуваме дека консултациите за воспоставување мир ќе продолжат, целосно ги поддржуваме напорите на Орбан за изнаоѓање мирно решение и решавање на хуманитарните прашања поврзани со размената на затвореници“, рече Песков на прес-конференција, пренесува „РИА новости“.

Како што наведе, премиерот на Унгарија на рускиот претседател Владимир Путин му претставил предлог за размена на заробеници меѓу Русија и Украина и божиќен прекин на огнот.

„За време на вчерашниот телефонски разговор со претседателот Путин, унгарскиот премиер Виктор Орбан даде предлог да се изврши голема размена на затвореници меѓу Русија и Украина пред Божиќ, како и да се објави божиќен прекин на огнот“, рече Песков.

Тој истакна дека украинската страна го отфрлила предлогот за размена на затвореници пред Божиќ. „Судејќи според реакцијата на Зеленски на социјалните мрежи, како и неговата околина, украинската страна ги отфрли сите предлози на Орбан“, изјави Песков за новинарите.

Украина ќе изгуби третина од својата територија во конфликтот со Русија и нема да чека САД и нивните сојузници да ја поканат во НАТО, изјави словачкиот премиер Роберт Фицо, пренесува ТАСС.

Според него, Западот ќе ја жртвува Украина по нејзиниот неуспех, а тие би можеле да ја поделат земјата како Чехословачка во 1938 година.

„Мислам дека Украина ќе изгуби една третина од својата територија, но ќе ѝ бидат понудени безбедносни гаранции, на пример, присуство на странски војници“, рече Фицо во интервју за бразилскиот весник „Фолха де Сао Пауло“.

Како што истакнал, решението на конфликтот во Украина може да биде само прекин на огнот и почнување на преговарачкиот процес.

„Украина дозволи да биде вовлечена во таква приказна која не може да заврши добро за земјата. Ќе ја изгуби својата територија и нема да биде поканета во НАТО“, изјави Фицо и додаде дека секој што е барем малку реален треба да признае дека Русија никогаш нема да се повлече од Крим, ДНР и ЛНР.

Рече дека никогаш нема да го поддржи влезот на Украина во НАТО додека тој е премиер, според медиумот.

Екипа на Си-ен-ен, предводена од репортерката Клариса Вард, влезе во таен затвор на режимот на Асад во Сирија и пронашла затвореник што бил затворен со месеци.

Тамошните новинари трагаа по американскиот новинар Остин Тајс, кој беше затворен во Сирија во последните 12 години, а неговото семејство се надеваше дека ќе го најде по падот на режимот на Башар ал-Асад. Се верува дека бил фатен во близина на Дамаск во август 2012 година додека известувал за сириската граѓанска војна.

Тимот посети скриени места на притвор, каде што голем број цивили биле мачени и претепани до смрт. Тие наишле на ќелиите и забележале дека едната е сè уште заклучена.

Тие пронашле затвореник што бил затворен четири дена без вода, храна и дневна светлина. „Тој дури и не знаеше што се случува во остатокот од земјата. Сè е во ред, сè е во ред. Ние сме новинари, јас сум цивил“, му рекла новинарката.

Затвореникот му рекол на војникот што бил со новинарската екипа дека последните три месеци бил ставен во ќелија. „Фала му на Бога што си спасен. Сега си безбеден, не плаши се, слободен си“, одговорил војникот.

По три месеци затвор без прозорци, поранешниот затвореник, конечно, можел да го види небото. „О Боже мој, светлина, има светлина. Се тресам, ми се тресе лицето“, рекол тој и побарал од толпата да остане со него. Кога му кажале дека Сирија е слободна, тој го бакнал војникот.