Најсмртоносниот индустриски пожар во историјата на Пакистан, во кој загинаа повеќе од 280 работници во текстилна фабрика во септември 2012 година, не беше несреќен случај, соопшти пакистанскиот суд, осудувајќи на смрт двајца поранешни политички активисти за подметнување пожар.

Судот за борба против тероризмот утврди дека двајцата мажи го подметнале пожарот, бидејќи сопствениците не се согласиле да им плаќаат рекет на уценувачите.

Пожарот во фабриката за текстил „Али Ентерпрајз“, во четирикатна зграда во Карачи, предизвика огромен скандал во пакистанската јавност, бидејќи се појавија сведоштва од преживеани за заклучените врати на фабриката и несоодветните противпожарни мерки.

Меѓу осумте обвинети во случајот, четворица беа прогласени за виновни, додека четворица беа ослободени, меѓу кои и тогашниот регионален министер за индустрија Рауф Садики.

Тој е член на движењето Мутахида Кауми (MQM), партија која со години е поврзувана со насилно политичко ривалство во Карачи, и сега е партнер во коалициската влада на премиерот Имран Кан.

Двајцата мажи одговорни за подметнување пожар се осудени на смрт – Реман Бола и Зубаир Чарија – биле активисти на MQM.

За време на осумгодишното судење, беа испитани 400 сведоци и беа одржани 171 рочиште.

MQM, во меѓувреме, се подели на неколку фракции, а денешното раководство негира каква било поврзаност со пожарот во 2012 година.