Свет
Папата во Луксембург: Помогнете им на земјите во развој и имајте повеќе деца

Папата Франциско денеска ги повика лидерите на Луксембург, мала нација со развиена економија и најголем број милионери во светот, да им помогнат на земјите во развој.
Папата, кој е во еднодневна посета на земјата, рече дека зголемувањето на помошта може да помогне да се ограничи протокот на бегалци и мигранти во Европа.
„Да не заборавиме дека поседувањето богатство повлекува одговорност“, рече папата на собирот на политички и цивилни претставници во палатата „Серкл сите“.
„Повикувам на постојана будност за да им се помогне на најсиромашните нации да излезат од сиромаштијата“, додаде тој.
Папата истакна дека Луксембург „е пример за тоа како мигрантите и бегалците треба да бидат примени и интегрирани“. Речиси половина од 654.000 жители на Луксембург се странци, пред сè, од Франција, Белгија и Германија.
Папата исто така ги повика Луксембуржаните да имаат повеќе деца со оглед на нивната ниска стапка на наталитет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп го повика Хамас да ги ослободи заложниците и навести можен крај на војната во Газа

Американскиот претседател Доналд Трамп денес го повтори својот повик до Хамас да ги ослободи сите заложници, сугерирајќи дека војната на Израел во Газа би завршила ако го сторат тоа.
„Кажете му на Хамас веднаш да ги ослободи сите 20 заложници, а не 2, 5 или 7, и работите брзо ќе се променат. Ќе заврши!“, рече Трамп во објава на социјалната мрежа Truth Social.
Израелската војска вели дека Хамас сè уште има мрежа од подземни тунели во соседството, која не успеа да ја прекине и покрај повторените напади.
Израелскиот премиер Бенјамин Нетанјаху инсистира дека Хамас, кој владее со Газа речиси две децении, но сега контролира само делови од територијата, мора да биде поразен освен ако не го положи оружјето и не се предаде.
фото: принтскрин
Свет
Нетанјаху ја одби посетата на Макрон на Израел по објавата дека ќе ја признаат Палестина

Израелскиот премиер Бенјамин Нетанјаху го отфрли барањето на францускиот претседател Емануел Макрон да го посети Израел пред очекуваното признавање на палестинската држава од страна на Франција подоцна овој месец, објави израелскиот јавен радиодифузер Кан.
Се вели дека Макрон сакал да оствари кратка посета на Израел пред Генералното собрание на Обединетите нации, каде што се очекува Франција да им се придружи на другите западни земји во признавањето на палестинската држава.
Сепак, Нетанјаху ја услови посетата со повлекувањето на Макрон од признавањето на Палестина, што францускиот претседател го одби.
Макрон објави на 24 јули дека Франција ќе ја признае Палестина како независна држава.
Тој рече дека официјалното признавање треба да следи во септември на Генералното собрание на Обединетите нации.
Макрон рече дека ова е одговор на сè поочајната ситуација во Појасот Газа.
фото: принтскрин
Свет
Ким по средбата со Путин: Целосно ја поддржуваме Русија, тоа е наша братска должност

Севернокорејскиот лидер Ким Џонг Ун изјави дека неговата земја ќе продолжи „целосно да ја поддржува“ Русија и нејзината војска како „братска должност“, објави државната новинска агенција КЦНА.
Ким се сретна со рускиот претседател Владимир Путин вчера во Пекинг на маргините од прославата на капитулацијата на Јапонија во Втората светска војна. Путин изрази „длабоко почитување“ кон севернокорејските војници кои се борат против Украина, додаде агенцијата.
Северна Кореја испрати војници, артилериска муниција и ракети во Русија за да ѝ помогне во војната со Украина.
Јужнокорејското разузнавање верува дека северниот сосед планира да испрати уште 6.000 војници, покрај тие илјада што веќе се во Русија. Исто така, објавија дека во рускиот регион Курск, каде што учествувале во борбите, досега загинале околу 2.000 од нив.
фото: принтскрин