Свет
Патрушев: Расте ризикот од употреба на нуклеарно, хемиско или биолошко оружје

Кремљ денеска соопшти дека Западот ја покажал својата агресија кон Русија, но кога станува збор за нуклеарното оружје, Москва има своја доктрина и тоа нема да се промени. Секретарот на рускиот совет за безбедност, Николај Патрушев, моќен сојузник на рускиот претседател Владимир Путин, претходно денеска изјави дека деструктивната политика на САД и нивните сојузници го зголемува ризикот од употреба на нуклеарно, хемиско или биолошко оружје.
Запрашан да ги коментира изјавите, портпаролот на Кремљ, Дмитриј Песков, рече: „Патрушев е секретар на Советот за безбедност. Тој е дел од Кремљ. А неговите изјави се изјави од Кремљ. Што се однесува до Руската Федерација, ние имаме доктрина дека јасно кажува сè. Нема промени. Тоа го потврди и претседателот“, рече Песков.
Како секретар на Советот за безбедност на Русија, Патрушев е во центарот на одлучувањето за надворешната и безбедносната политика. Патрушев не даде конкретни детали за тоа каде би можело да се користи оружјето за масовно уништување, но го обвини Вашингтон дека не успеал да донесе мир на Блискиот Исток и дека ја ескалирал војната во Украина со поддршката на Киев.
Патрушев рече дека Западот со години ја подготвувал Украина за војна со Русија и дека Украина се обидела да ги нападне руските нуклеарни централи, вклучувајќи ги електраните ‘Ленинград’, ‘Калининград’ и ‘Курск’. „На 26 октомври украински UAV (беспилотно летало) удри во складиште за нуклеарен отпад во областа на нуклеарната централа ‘Курск’“, рече тој на државната телевизија.
„Ројтерс“ не можеше да ги потврди неговите тврдења за кои тој не понуди конкретни докази. Украина веднаш не коментира. Патрушев (72) е поранешен офицер на КГБ, кој го познава Путин од 70-тите кога работеле заедно во советската служба за безбедност. Неговите изјави даваат увид во начинот на размислување во самиот врв на елитата на Кремљ, според „Ројтерс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Објавени последните зборови на папата

Последните зборови на папата Франциско беа благодарност до неговиот здравствен асистент кој му помогна да ги поздрави верниците на плоштадот Свети Петар на Велигден, соопшти Ватикан.
„Ви благодарам што ме доведовте на плоштадот“, му рекол Франциско на Масимилијано Страпети, кој во изминатиот период му обезбедуваше 24-часовна нега на папата.
Папата Франциско (88) почина вчера по мозочен удар и срцева слабост. Претходно оваа година, тој помина пет недели во болница со двојно воспаление на белите дробови, но се врати во Ватикан пред речиси еден месец и оттогаш се чинеше дека се опоравува.
Последните денови ги поминал работејќи, спротивно на советите на лекарите кои го советувале да мирува најмалку два месеци за да му овозможи на телото да закрепне.
Погребот на папата ќе се одржи в сабота.
Свет
Голем број верници се собраа во Рим за да му оддадат почит на папата: „Тој беше посебен, на сите христијани ќе им недостига“

Голем број граѓани на Италија и од други земји се собраа во базиликата „Света Марија Велика“ во Рим, каде што ќе бидат положени посмртните останки на папата Франциско, за да му оддадат почит на починатиот поглавар на Римокатоличката црква.
На тоа место се собраа голем број медиуми од целиот свет, а има и такви на плоштадот пред базиликата „Свети Петар“, каде што ќе се одржи погребот на папата Франциско в сабота, 26 април.
Меѓу собраните е и Евертон Коелјо од Бразил, кој моментно живее во Германија.
„Вчераутро пристигнавме во Рим. Кога вчера шетавме во градот, ја слушнавме многу тажната вест дека папата Франциско починал. Бевме изненадени и многу тажни. Тој беше харизматичен папа. Беше од Аргентина, Јужна Америка. И ние доаѓаме од Јужна Америка, па затоа чувствуваме дека е уште поблизок до нас. Беше приземен, многу близок до луѓето. Не живееше во замок, живееше едноставен живот“, изјави Коелјо за „Танјуг“.
Коелјо понатаму наведува дека ова е најголемата порака што папата Франциско ја остава зад себе.
„На христијаните многу ќе им недостига. Пред да дојдеме се обидовме да присуствуваме на мисата. За жал, минатата недела добивме порака дека папата нема да може да присуствува и дека ја откажале. А сега кога слушнавме дека нè напушта, многу е тажно“, рече Коелјо.
Друг Бразилец, кој денес беше во Рим, за „Танјуг“ вели дека го памети папата Франциско како едноставна личност, но и како некој што го сака фудбалот.
„Се сеќавам дека папата беше навивач на ‘Сан Лоренцо’ во Аргентина. Папата беше одлична личност за мене“, рече соговорникот.
Жителка од Рим за „Танјуг“ вели дека се сеќава на многу од она што го кажал папата Франциско оценувајќи го како неверојатно.
„Мислам дека ќе биде тешко да се најде замена за него“, рече тој.
Погребот на папата Франциско ќе се одржи в сабота, 26 април, во 10 часот наутро на плоштадот пред базиликата „Свети Петар“.
Претходно денес, беше објавено дека телото на починатиот папа ќе биде однесено во базиликата „Свети Петар“ в среда во 9 часот наутро.
Свет
ММФ: Светската економија значително ќе забави, на САД драстично

Меѓународниот монетарен фонд (ММФ) ги намали своите прогнози за економски раст за 2025 година велејќи дека зголемувањето на царините и општата неизвесност ќе доведат до значително забавување.
Во својата најнова глобална прогноза,ММФ предвидува дека светската економија ќе порасне за 2,8 процента оваа година, што е намалување во однос на претходната проценка од 3,3 проценти.
Најголем пад меѓу развиените економии забележаа Соединетите Американски Држави – сега се очекува раст од 1,8 процент во споредба со претходната процена од 2,7 процента.
Прогнозата за раст за Обединетото Кралство е исто така намалена – од претходните 1,6 процент на 1,1 процент во 2025 година.