Свет
Пекинг му врачи демарш на Вашингтон: „Изјавата на Бајден е политичка провокација“

Кинеската влада упати протест до американскиот амбасадор во Кина поради коментарите на претседателот Џо Бајден, кој го нарече кинескиот претседател Шји Џјинпинг диктатор.
Николас Барнс ја добил дипломатската нота неколку часа по изјавата на Бајден за Шји за време на донаторска конференција во Калифорнија, пренесе „Волстрит журнал“, цитирајќи тројца неименувани американски претставници.
На собирот во вторникот, Бајден рече дека Шји не знаел за наводниот кинески шпионски балон што бил соборен во воздушниот простор на САД во февруари, додавајќи: „Тоа е голем срам за диктаторите. Кога не знаат што се случува“.
Портпаролот на кинеското Министерство за надворешни работи, Мао Нинг, во средата изјави дека крајно апсурдните коментари на Бајден сериозно му наштетиле на политичкото достоинство на Кина и претставуваат политичка провокација.
Но, американските официјални лица кои ја објавија веста за протестот на Пекинг до Барнс, забележаа дека кинеските државни медиуми не ја објавиле дипломатската нота, позната како демарш, за да ја зачуваат добрата атмосфера создадена од посетата на американскиот државен секретар Ентони Блинкен на Кина.
Изјавата на Бајден дојде еден ден откако Блинкен се сретна со Шји во долгоочекуваната посета со цел да се запре надолната спирала во односите меѓу САД и Кина.
Американскиот претседател рече дека се уште очекува да се сретне со Шји во блиска иднина и ја пофали посетата на Блинкен на Пекинг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Гор: „Администрацијата на Трамп е како нацистичка Германија“

Поранешниот потпретседател на Соединетите Американски Држави, Ал Гор, ја спореди администрацијата на Доналд Трамп со нацистичка Германија.
Зборувајќи на митингот по повод почетокот на Неделата на климата во Сан Франциско, тој рече дека администрацијата на Трамп се обидува да создаде своја преферирана верзија на реалноста со цел да ги постигне своите сеопфатни цели слични на нацистичката партија на Адолф Хитлер во 30-тите и 40-тите, објавува „Политико“.
„Многу добро разбирам зошто е погрешно да се споредува Третиот Рајх на Адолф Хитлер со кое било друго движење. Тоа беше уникатно зло, точка. Сфаќам. Но, постојат важни лекции од историјата на тоа зло што се појави“, рече Гор, кој беше потпретседател под Бил Клинтон.
Претставниците на Белата куќа не ги коментираа изјавите на Гор.
Свет
Путин нема да присуствува на погребот на папата

Руската државна агенција ТАСС објави дека претседателот Владимир Путин не планира да присуствува на погребот на папата Франциско повикувајќи се на портпаролот на Кремљ, Дмитриј Песков.
„Претседателот нема такви планови“, изјави Песков пред новинарите, според агенцијата, додавајќи дека сè уште не е донесена одлука за тоа кој ќе ја претставува Русија на испраќањето во Ватикан.
Путин последен пат го посети папата Франциско во Ватикан во јули 2019 година.
Телото на папата Франциско ќе биде префрлено во базиликата „Свети Петар“ в среда наутро во 9 часот, објави Ватикан.
Неговото тело моментно е положено во ковчег во капелата на Каса Санта Марта, каде што живеел за време на своето 12-годишно папство.
Ватикан денес објави дека погребот на папата Франциско ќе се одржи в сабота во 10 часот на плоштадот Свети Петар. Тој ќе биде погребан во базиликата „Света Марија Голема“ во Рим.
На последното збогување ќе присуствуваат стотици илјади верници, како и странски лидери, како што се американскиот претседател Доналд Трамп, францускиот претседател Емануел Макрон и украинскиот претседател Володимир Зеленски.
Свет
Недостиг на лекови во Газа: ОН предупредува на катастрофа

Палестинските пациенти во Газа се во сè полоша ситуација поради израелската блокада, а недостигот од клучни лекови и медицински потрошен материјал доведува многу животи на работ на смртта.
Затворањето на граничните премини од 2 март ги исцрпе болничките резерви на основни потреби создавајќи ситуации опасни за животот за сите на кои им е потребна терапија – од хронични болести до повреди од војната.
Министерството за здравство на Газа постојано предупредува на влошување на кризата поради недостиг на лекови, што дополнително ги оптоварува веќе слабите капацитети на здравствениот систем.
Во разговор за агенцијата „Анадолијањ, Ала Хилес, директор на Одделот за болничка фармација при Министерството за здравство на Газа, изјави дека повеќе од 37 проценти од основните лекови и најмалку 59 проценти од медицинските потрошни материјали моментно не се достапни во магацините на Министерството.
„Овој недостиг директно влијае на сите медицински услуги вклучувајќи ги ракот и крвните заболувања“, рече Хилес додавајќи дека 54 проценти од лековите за овие болести се исто така недостапни.
Тој исто така истакна дека повеќе од 24 проценти од лековите што им се потребни на пациентите на дијализа во моментот не се достапни.
Хилес изјави дека Министерството редовно поднесува извештаи за недостиг на лекови до релевантни меѓународни организации, вклучувајќи ги Меѓународниот комитет на Црвениот крст и Светската здравствена организација.
Во оваа криза Министерството за здравство се обидува да најде медицински алтернативи за ублажување на последиците од недостигот и намалување на компликациите за пациентите. Но, Хилес предупредува дека овие алтернативи не се секогаш соодветни и дека менувањето на лековите може да претставува дополнителен ризик за здравјето на пациентите.
Обединетите нации во понеделникот одбележаа 50 дена откога Израел целосно ја блокира хуманитарната помош за Газа предупредувајќи на брзо влошување на ситуацијата, што сериозно ги загрозува животите на цивилите.
„Денес, се навршуваат 50 дена откога израелските власти целосно го запреа протокот на какви било резерви во Газа“, изјави портпаролот на ОН, Стефан Дужарик, на прес-конференција.
Повикувајќи се на Канцеларијата на ОН за координација на хуманитарни прашања (OCHA), Дужарик нагласи: „Од почетокот на март на ниеден камион што носи храна, гориво, лекови или други потребни работи не му е дозволено да влезе во Газа, без разлика колку се важни овие резерви за опстанокот на луѓето“.