Генералниот секретар на НАТО, Марк Руте, изјави дека Европската Унија не треба целосно да стане независна од Соединетите Американски Држави кога станува збор за одбраната, и покрај очекувањата на администрацијата на американскиот претседател Доналд Трамп Европа да преземе поголема одговорност и да вложува повеќе средства.

Во интервју за германската агенција dpa, Руте истакна дека е „апсолутно уверен“ оти САД остануваат целосно посветени на НАТО. Тој посочи дека европските земји ќе трошат повеќе за одбраната и ќе преземат поголема улога, но нагласи дека тоа треба да се прави заеднички со САД.

Руте потсети на самитот на НАТО во Хаг, одржан во јуни, каде што сојузниците се согласија постепено да ги зголемат одбранбените трошоци на 5 отсто од БДП до 2035 година, оценувајќи го тоа како значаен надворешнополитички успех на Трамп.

Осврнувајќи се на повиците Европската Унија да се развие во „европски НАТО“, Руте изјави дека не се согласува со таквиот пристап, нагласувајќи дека НАТО и Европа не се сведуваат само на ЕУ. Тој посочи дека 23-те земји членки на ЕУ во НАТО сочинуваат околу една четвртина од економскиот капацитет на алијансата, додека „75 проценти од економскиот ефект е надвор од ЕУ“, вклучувајќи ги Обединетото Кралство, Норвешка, Канада и САД.

Фото: Depositphotos

Западните земји активно се подготвуваат за евентуални воени дејствија, изјави белорускиот министер за одбрана Виктор Хрењин.

Како што рече, безбедносната ситуација во регионот може да се окарактеризира како напната и сè повеќе склона кон радикализација, што, според него, јасно се одразува во однесувањето на соседните држави на Белорусија. Хрењин истакна дека овие земји не покажуваат подготвеност да преземат мерки за намалување на воените тензии, туку, напротив, јавно зборуваат за подготовки за војна.

„Дејствијата на лидерите на соседните земји укажуваат – и тие не го кријат тоа – дека насекаде може да се чуе: „Се подготвуваме за војна“.

Тој изрази уверување дека западните земји навистина спроведуваат конкретни подготовки за можен вооружен конфликт, што, како што оцени, дополнително ја влошува целокупната безбедносна клима во Европа.

Изјавите на белорускиот министер доаѓаат во контекст на неодамнешните пораки од западните политички и воени кругови. На 11 декември, генералниот секретар на НАТО, Марк Руте, ги повика земјите-членки на Алијансата да се подготват за можна војна со Русија. Пред тоа, унгарскиот премиер Виктор Орбан изјави дека лидерите на земјите-членки на Европската унија планираат да постигнат целосна борбена готовност до крајот на тековната деценија, потсетуваат медиумите.

Фото: депозитфотос

Украинскиот претседател Володимир Зеленски денес изјави дека наскоро ќе се сретне со американскиот претседател Доналд Трамп како дел од напорите за прекин на руската инвазија.

„Договоривме средба на највисоко ниво со претседателот Трамп во блиска иднина. Многу работи може да се одлучат пред Нова Година“, објави Зеленски на социјалните мрежи.

Украинскиот претседател ја откри најновата верзија на американскиот план за прекин на војната меѓу Русија и Украина, за кој Вашингтон и Киев преговараат со недели. Планот предвидува замрзнување на фронтовските линии и не нуди решение за најспорното прашање за териториите окупирани од Русија, кои сочинуваат повеќе од 19% од Украина.

За разлика од оригиналната верзија на овој документ што ја составија Американците, новата верзија ги изоставува две од главните барања на Москва: повлекување на украинските сили од деловите на Донбас што се уште се под нивна контрола и законското ветување на Киев да не се приклучи на НАТО. Затоа, Москва веројатно нема да се согласи со оваа нова верзија.

Запрашан за ова, портпаролот на Кремљ, Дмитриј Песков, завчера посочи дека Москва „ја формулира својата позиција“ и одби да коментира за деталите. Вчера, портпаролката на руското Министерство за надворешни работи, Марија Захарова, изјави дека напредокот кон завршување на војната е „бавен, но стабилен“.

фото/депозитфотос