Свет
Пеколни температури во Италија: има жртви, африканскиот систем Камила гори

Во рок од 24 часа во понеделникот и вторникот пет лица загинаа на плажите во Саленто, крајбрежната област на Јадранското Море на југот од регионот Апулија во Италија.
Сомнежите се дека смртните случаи се поврзани со високите летни температури, кои, според извештаите на медиумите, ќе се искачат на над 40 Целзиусови степени во регионот оваа недела.
Во вторникот двајца туристи ги загубија животите. Околу пладне маж во шеесеттите години починал додека пливал во морето во Торе дел’Орсо, дел од крајбрежниот одморалиште Мелендуњо. Други пливачи го забележале неговото неподвижно тело во водата и ги известиле спасувачите. И покрај брзото пристигнување на болничарите и итните обиди за реанимација, човекот не можел да се спаси.
Недолго пред тоа сличен инцидент се случил во Торе Инсералјо. Осумдесет и двегодишен маж, кој бил на одмор, доживеал срцев удар на плажата на одморалиштето. И тука пливачите, спасувачите и медицинскиот персонал реагирале веднаш, но без успех. Карабинерите и крајбрежната стража почнале истрага; телото ѝ било дадено на сопругата.
Уште три смртни случаи веќе се случија во понеделникот: 79-годишен маж почина на плажа во туристичкото одморалиште Порто Чезарео; 66-годишен бизнисмен од градот Остуни почина на својот брод. Претходно, 19-годишна девојка од Молдавија, која беше на одмор со своите родители во Италија, го загуби животот.
Целиот јужен дел од Италија во моментот е погоден од топлотен бран, кој се очекува да продолжи и во наредните денови, што предизвикува загриженост за можни понатамошни топлотни вонредни состојби. Африканскиот систем со висок притисок, кој метеоролозите го нарекуваат Камила, носи температури до 42 или дури 45 Целзиусови степени во јужна Италија.
Екстремно високи температури се очекуваат на Сицилија до сабота. Максимални температури над 40 Целзиусови степени се очекуваат и во Апулија, Базиликати и во Калабрија.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија обвинува: НАТО со трупи во Романија, цел е Молдавија

Руската надворешна разузнавачка служба (СВР) тврди дека НАТО концентрира воени единици во Романија во близина на границата со Молдавија и дека постои план за истоварување и во украинската Одеската област. Според соопштението, целта е окупација на Молдавија и притисок врз регионот Приднестровје.
Разузнавањето наведува дека први војници од Франција и од Велика Британија веќе пристигнале, а Европската Унија наводно е „одлучна да ја задржи Молдавија во рамките на својата политика по секоја цена“.
Инаку, во недела во Молдавија ќе се одржат парламентарни избори, на кои граѓаните ќе избираат меѓу европскиот пат и поблиски врски со Москва.
Приднестровје е сепаратистички регион што се одвои од Молдавија во 1992 година со поддршка од Москва и функционира како де факто независна држава со своја власт, армија и валута.
Свет
Откриен по 30 години: ноќниот предатор призна вина за сексуалните напади во Сиднеј

Австралиецот Глен Гери Камерон (61), познат како ноќниот предатор, призна вина за серија сексуални напади врз жени во Сиднеј на почетокот од 90-тите.
Камерон беше уапсен минатата година на аеродромот во Сиднеј кога полицијата со нови ДНК-анализи ги поврза старите случаи. Тој се изјасни виновен за 13 од вкупно 36 дела, меѓу кои – 11 обвинувања за тешки сексуални напади со закана со оружје.
Жртвите, осум жени на возраст од 17 до 45 години, најчесто биле мамени со лажни понуди за работа и нападнати во близина на железнички станици и паркови. Пресудата се очекува следниот месец.
Фото: судски цртач/суд во Сиднеј
Свет
Птичји грип потврден во Полска

Полска пријави појава на високопатоген птичји грип H5N1 на две живинарски фарми, објави вчера Светската организација за здравје на животните (WOAH).
Вирусот е откриен на фарма за гуски и на фарма за мисирки во градот Суш и уби приближно 4.000 птици, објави WOAH повикувајќи се на извештај од полските власти.
Во мај Варшава го потисна вирусот H5N1, според WOAH.
Во меѓувреме, вирусот повторно почна да се шири во Европа и од крајот на август Норвешка, Германија, Португалија и Бугарија пријавија појава на птичји грип. Во средината на јули болеста се појави и на фарма за мисирки во Шпанија.
Птичјиот грип обично се шири меѓу живината во Европа на почетокот на есента, забележува „Ројтерс“.
Варшава минатата недела изјави дека се надева дека ќе ги продолжи испораките во Кина во рок од еден месец по потпишувањето на договорот со Пекинг. Извозот беше суспендиран поради ширењето на птичјиот грип во 2023 година.
Вредноста на извозот на полска живина во Кина се проценува на две милијарди злоти (470,69 милиони евра).