Свет
Писма со рицин до Пентагон и Трамп испраќал морнарички ветеран

ФБИ уапси американски морнарички ветеран под сомнение дека до високи американски официјални лица испраќал писма за кои се стравува дека го содржеле отровот рицин. Ова го соопшти канцеларијата на јавниот обвинител во Солт Лејк Сити.
Триесет и деветгодишниот Вилијам Клајд Ален бил уапсен во неговиот дом во Логан (Јута) и против него в петок ќе биде покренето обвинение, изјави портпаролката. Ален служел во американската морнарица од октомври 1998 до 2002 година.
Ален е под истрага за писма испратени до претставници на Пентагон и претседателот Доналд Трамп, соопшти друг извор.
Американски официјални лица во средата објавија дека веднаш е отфрлена можноста дека станува збор за терористички акт, за случајот кога во канцеларијата за сортирање пошта во Пентагон биле доставени коверти што биле позитивни на рицин.
Портпаролката на Пентагон изјави дека тестирањето на рицин било позитивно поради семките од рицинус кои биле во коверот, а не поради смртоносниот отров.
Рицин е природна состојка на растението рицинус, но само преку преработка се трансформира во биолошко оружје. Рицинот може да предизвика смрт за 36 до 72 часа по изложеноста, а за него досега не е откриен противотров.
Едно од писмата било упатено до американскиот секретар за одбрана Џим Матис, а Американската тајна служба соопшти дека истражува сомнителен коверт адресиран и до Трамп, кој бил доставен во понеделникот, но воопшто не влегол во Белата куќа.
ФБИ информираше дека истражува потенцијално опасни хемикалии во Логан, околу 106 километри северно од Солт Лејк Сити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Силен скок на цената на нафтата на светските пазари

По две недели пад, цените на нафтата нагло пораснаа на светските пазари, за повеќе од шест проценти, поддржани од постигнувањето трговски договори од страна на САД со некои од нивните најважни трговски партнери, и ќе се покачеа уште повеќе доколку ОПЕК+ не ги зголеми своите производствени квоти.
Цената на барел на лондонскиот пазар скокна за 6 проценти минатата недела, на 69,67 долари, а на американскиот пазар за 6,3 проценти, на 67,33 долари.
Трговците со нафта поголемиот дел од неделата беа фокусирани на потенцијалното влијание на американските тарифи, при што повисоките тарифи за американските трговски партнери најчесто треба да стапат на сила следниот петок.
Трамп, всушност, потпиша извршна наредба во четвртокот со која се наметнуваат тарифи во опсег од 10 до 41 процент за увозот од САД од десетици земји и странски територии кои не успеаја да постигнат трговски договори до неговиот рок на 1 август, вклучувајќи ги Канада, Индија и Тајван. Партнерите кои успеаја да обезбедат трговски договори се Европската Унија, Јужна Кореја, Јапонија и Велика Британија.
Цените беа поддржани и минатата недела од заканите на Трамп за воведување царини од 100 проценти за купувачите на руска сурова нафта во обид да изврши притисок врз Русија да ја прекине војната во Украина. Тоа предизвика загриженост за потенцијални нарушувања на трговските текови со нафта и отстранување на дел од нафтата од пазарот.
Во четврток, аналитичарите на JP Morgan рекоа дека заканите на Трамп да ги казни Кина и Индија за купување руска нафта потенцијално загрозуваат 2,75 милиони барели дневно (bpd) од извозот на руска нафта по море. Кина и Индија се втор и трет најголем потрошувач на сурова нафта во светот.
Свет
Трамп се закани: Путин има рок до петок

Американскиот претседател Доналд Трамп изјави дека неговиот специјален претставник Стив Виткоф би можел да отпатува во Русија, можеби в среда или в четврток, предупредувајќи дека ќе воведе санкции кон Русија ако Москва не се согласи на прекин на огнот во Украина до петок.
„Ќе има санкции, но се чини дека се доста добри во нивно избегнување. Тие се лукави ликови и се доста добри во избегнувањето санкции, па ќе видиме што ќе се случи“, рече Трамп во разговор со новинарите, објави „Ројтерс“.
Претходно, Трамп изјави дека наредил распоредување две нуклеарни подморници во она што ги нарече „соодветни региони“ како одговор на „глупавите и провокативни“ нуклеарни закани од поранешниот руски претседател, Дмитриј Медведев.
Фото: ЕПА
Свет
Русија и Кина одржуваат воени вежби во морето крај Јапонија

Русија и морнариците на Кина одржуваат заеднички артилериски и противподморнички вежби во Јапонското Море како дел од планираните воени маневри, објавија руските власти.
Вежбите, наречени „Морнаричка интеракција 2025“, започнаа два дена откако американскиот претседател Доналд Трамп изјави дека наредил распоредување на две нуклеарни подморници во она што ги нарече „соодветни региони“ како одговор на „глупавите и провокативни“ нуклеарни закани од поранешниот руски претседател Дмитриј Медведев.
Руските власти нагласија дека вежбите биле договорени и планирани многу пред изјавата на Трамп.
Според руските државни медиуми, во вежбата учествува заедничка група воени бродови од двете земји, вклучувајќи голем руски противподморнички брод и два кинески разорувачи. Дизел-електрични подморници од двете страни, како и кинески брод за спасување подморници, исто така учествуваат во маневрите.
Вежбите, кои треба да завршат утре, вклучуваат артилериски оган, обука за борба против подморници, операции за воздушна одбрана и заеднички мисии за пребарување и спасување.
Русија и Кина потпишаа „неограничено“ стратешко партнерство кратко пред Москва да започне целосна инвазија на Украина во 2022 година. Оттогаш, двете земји дополнително ги продлабочија воените и економските врски.
Иако Пекинг тврди дека е неутрален во војната во Украина, тој стана еден од клучните бедеми на Русија, обезбедувајќи одбранбена опрема и купувајќи големи количини руска нафта.
На 1 август, Трамп рече дека наредил распоредување на подморници како одговор на „многу провокативните“ забелешки на Медведев за можноста за војна меѓу нуклеарно вооружените сили.
Соединетите Американски Држави и Русија имаат најголеми нуклеарни арсенали во светот и ретко откриваат детали за движењата на нивните подморници.
Изјавата на Трамп доаѓа во време на зголемени тензии со Москва и фрустрација поради недостатокот на напредок во завршувањето на војната во Украина.
Фото: ЕПА