Свет
Повеќе од половина од Швеѓаните одбиваат да примат повеќе бегалци
Ново истражување за ставовите кон миграцијата низ Европа покажа дека повеќе од половина од Швеѓаните велат дека не сакаат земјата да прима повеќе бегалци, што ја прави една од најскептични земји кон мигрантите, пренесува „Ел Паис“.
На околу 8.000 луѓе во Германија, Полска, Шпанија, Унгарија, Италија, Белгија, Франција и Шведска им биле поставени серија прашања, вклучувајќи го и прашањето: Дали се согласувате со изјавата:” Мојата земја не треба да прима повеќе бегалци од конфликтните области? “, на што 51 отсто од шведските испитаници рекле дека се согласуваат.
Додека Полска и Италија се изедначени со 53 отсто испитаници кои се согласуваат со изјавата,
Шведска ја надмина дури и Унгарија, нација обележана поради нејзиниот силен антимигрантски став и политики, со 49 отсто.
Повеќе од една третина, односно 35 отсто, од испитаниците во сите анкетирани земји изјавиле дека миграцијата е најважното прашање со кое се соочува ЕУ денес, но само 14 отсто рекле дека Унијата успеала соодветно да се справи со мигрантската криза во 2015 и 2016 година.
Од друга страна, 41 отсто од Германците велат дека би примиле повеќе бегалци иако земјата беше најголем примател на мигранти во екот на мигрантската криза, и покрај предизвиците како растечкиот криминал, зголемените трошоци и слабата културна и економска интеграција.
Огромното мнозинство Швеѓани сметаат дека земјата оди во погрешна насока, при што многумина се загрижени за криминалот и имиграцијата.
За Шведска миграцијата, главно прашање на изборите е миграцијата уште од екот на мигрантската криза во 2015 година, а проблемот доминираше на националните избори во 2018 година.
Неколку извештаи во Шведска ги истакнаа проблемите околу масовната миграција, вклучувајќи и непубликуван извештај претходно оваа година, кој покажа дека трошоците за зголемување на миграцијата што ги вети шведската влада претходно годинава ќе бидат многу поголеми од првично најавените.
Друг извештај, од шведскиот радиодифузер СВТ, обелодени дека во период од пет години мигрантите претставуваат 58 отсто од осудените за силување. Бројот се зголемува на 85 отсто кога ќе се земат предвид насилните силувања во кои жртвата претходно не го знаел сторителот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.