Европа
Повеќе од 1.100 луѓе во Велика Британија секоја година заболуваат од рак на белите дробови поради загадениот воздух

Повеќе од 1.100 луѓе годишно во Велика Британија го развиваат најчестиот тип на рак на белите дробови, аденокарцином, како резултат на загадениот воздух, пишува „Гардијан“.
Анализата на Светската здравствена организација (СЗО) покажа дека изложеноста на загаден воздух е причината зошто 515 мажи и 590 жени во Велика Британија развиле аденокарцином во 2022 година.
Стапката на овој тип на рак предизвикан од аерозагадувањето е повисока во Велика Британија отколку во САД и Канада, а четири пати поголема отколку во Финска, која има најниска стапка на аденокарцином во Северна Европа, покажува анализата.
Air pollution causing 1,100 cases a year of main form of lung cancer in UKhttps://t.co/kxfYTCi3e7
— Dr Paul Dorfman (@dorfman_p) February 9, 2025
Ова е првпат Меѓународната агенција за истражување на ракот (IARC) да собира и објави такви податоци. Лекарите, еколошките активисти и фондациите за рак велат дека овие наоди се алармантни и треба да бидат повик за будење за министрите во британската влада.
Пола Чадвик, официјално лице од Фондацијата за рак на белите дробови Рој Касл, рече дека овие податоци се шокантни и мора да поттикнат брза акција.
Таа додаде дека британските министри мора да преземат акција за борба против загадувањето на воздухот, во спротивно тоа ќе однесе повеќе животи. На глобално ниво, аденокарциномот сочинувал 45,6 отсто од вкупните случаи на рак на белите дробови кај мажите и 59,7 отсто кај жените во 2022 година.
Според податоците на IARC, дури 70 проценти од случаите на рак на белите дробови кај непушачите е аденокарцином.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ќе се обидеме сами да произведеме патнички авион со широк труп, велат Русите

Русија планира да развие сопствен патнички авион со широк труп, бидејќи плановите за заедничко производство со Кина сè уште не се спроведени, изјави шефот на Ростек, Сергеј Чемезов.
„Кинезите одлучија дека засега ќе го произведуваат сами. Ќе се обидеме и ние да произведуваме наш сопствен авион. Откако ќе го произведеме моторот PD-35, ќе изградиме наш сопствен авион со широк труп“, им рече Чемезов на новинарите во Самара.
Русија и Кина разговараа за заедничкиот развој на руско-кинескиот широкотрупен патнички авион CR929 и во 2014 година потпишаа договор за соработка. Основана е Кинеско-руската меѓународна корпорација за комерцијални авиони (CRAIC), која стана главен оператор на проектот.
Комерцијалните испораки требаше да започнат по 2025 година, но пандемијата на Ковид ги принуди партнерите да го одложат рокот за 2028 или 2029 година. Нова пречка беа западните санкции врз Русија, кои го променија форматот на соработка. Кина го презеде проектот, а Русија стана договорен производител само на одредени делови од авионот.
„Го променивме форматот на учество во проектот, па затоа се потребни соодветни промени и во меѓувладините документи. Со други зборови, приближно како во проектот за хеликоптери, односот ги вклучува клиентот и подизведувачот“, објасни првиот вицепремиер на Русија Денис Мантуров пред новинарите во мај 2024 година.
фото: принтскрин
Европа
Ердоган сака да ја замолчи опозицијата: демонстрантите се судрија со полицијата, фрлен е солзавец

Турската полиција се судри со поддржувачите на турската опозициска партија пред седиштето на Републиканската народна партија (ЦХП) денеска, користејќи солзавец за комесарот, назначен од судот, да може да влезе во зградата.
Властите го блокираа пристапот до канцеларијата на партијата во неделата вечерта откако десетици пратеници и членови на ЦХП се забарикадираа таму за да го спречат комесарот да ја преземе контролата со своите соработници.
Судот минатата недела пресуди да го отстрани раководството на партијата во Истанбул поради наводни нерегуларности на конгресот на партијата во 2023 година.
Поранешниот пратеник на ЦХП, Ѓурсел Текин, официјално ја презеде контролата врз партискиот огранок попладнето. Текин, кој се судри со лидерот на ЦХП, Озгур Озел, ја бранеше пресудата, нарекувајќи ја непристрасна и дека „не е дел од проблемот“.
ЦХП ја обвинува владата на претседателот Таип Ердоган за организирање политичка кампања против нив. Озел го замени долгогодишниот лидер на партијата, Кемал Киличдароглу, пред две години и ја предводеше партијата до неочекувана победа на локалните избори минатата година, обезбедувајќи контрола врз поголемиот дел од градските совети во земјата.
Оттогаш неколку градоначалници од опозицијата се уапсени под обвинение за корупција, вклучувајќи го и градоначалникот на Истанбул, Екрем Имамоглу, клучен ривал на Ердоган.
Озел би можел да биде отстранет со судска наредба на 15 септември. Владата негира дека врши притисок врз судството.
фото: принтскрин
Европа
(Видео) Швајцарските лекари штрајкуваат со глад поради Газа: „Владата е кукавичка“

Швајцарските лекари денес започнаа штрајк со глад пред парламентот поради војната во Газа, барајќи Берн да заземе покритичен став кон израелската војна во палестинската енклава.
Швајцарија ги осуди некои израелски дејствија во конфликтот, како што е нападот врз болница минатиот месец, но се воздржа од преземање посилни чекори што ги бараат демонстрантите, како што се воведување санкции врз Израел или признавање на палестинска држава. Додека продолжува септемвриската сесија на парламентот, лекарите протестираат во парови пред зградата, носејќи стетоскопи и лажни медицински мантили испрскани со крв, менувајќи се во 24-часовен ритам.
Протестот следеше по акциите на швајцарските универзитети и други протести за време на викендот, додека гладот зафаќа делови од Газа. „Можеме да кажеме дека владата во моментов е тивка, неактивна, би рекол доста кукавичка и ѝ недостасува многу храброст. И мислам дека денес е време за промени“, рече професорот Карл Бланше, директор на Женевскиот центар за хуманитарни студии, кој учествува во протестот.
Министерството за надворешни работи сè уште не одговорило на барањето за коментар. Како одговор на протестното писмо на организаторите на протестот, министерството во јули изјави дека е шокирано од страдањето во Газа и повика на прекин на огнот и испорака на хуманитарна помош.
Швајцарија, неутрална земја со блиски врски со Израел, се приклучи на санкциите на Европската Унија против Русија поради Украина, што предизвика обвинувања за двојни стандарди од некои критичари. Двајца швајцарски државјани беа убиени во нападите врз Израел на 7 октомври 2023 година, што ја предизвика војната во Газа.
фото: принтскрин