Свет
Повеќе од 100 Колумбијци уапсени во Ел Салвадор, нуделе кредити за да исперат пари

Полицијата во Салвадор уапси повеќе од стотина Колумбијци за наводна вмешаност во водење мрежа за измама со заеми, која перела пари од шверц на дрога и активности на банди, соопштија безбедносните власти. Според официјални лица, криминалната група наводно им давала заеми на поединци и мали бизниси со камата од 20 проценти користејќи незаконски стекнати средства.
Владата на претседателот Најиб Букеле зазеде строг став кон бандите од минатата година затворајќи околу 70.000 осомничени, што исто така доведе до голем пад на насилниот криминал. Борбата против бандите, која беше осудена од многу групи за човекови права, сепак му донесе на Букеле неверојатно високо ниво на поддршка пред неговата кандидатура за реизбор на почетокот на следната година.
„Колумбијците се наши браќа. Сепак, овие луѓе ќе мора да се соочат со салвадорската правда“, напиша Букеле вчера на „Твитер“.
Главниот државен обвинител Родолфо Делгадо на новинарите на прес-конференција им рече дека членовите на организацијата ќе ги заплашат жртвите, кога не може да ги вратат парите, да им ги дадат информациите за нивната банкарска сметка, кои потоа ги користеле за да ги префрлат парите во странство.
Околу 20 милиони долари поврзани со бандите за шверц на дрога се испратени преку мрежата во Колумбија од 2021 година, додаде Делгадо.
Колумбиското Министерство за надворешни работи соопшти дека е во преговори со амбасадата и конзулатот во Ел Салвадор за апсењата, но не понуди дополнителни коментари за обвиненијата со кои се соочуваат колумбиските државјани. Во акцијата беа уапсени и тројца Салвадорци, еден Гватемаланец и еден Аргентинец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.