Свет
Повеќе од 3.000 мигранти тргнаа на протестен марш во Мексико
Речиси 3.000 мигранти во неделата тргнаа во, како што ја нарекуваат, масовна протестна поворка во јужниот дел на Мексико за да побараат затворање на притворските центри како оној што се запали минатиот месец, при што загинаа 40 мигранти, пренесува „Хил“.
Пожарот во Сјудад Хуарез, преку границата од Ел Пасо, Тексас, почнал кога мигрант наводно запалил душеци од пена во знак на протест поради неговиот трансфер. Огнот набргу го наполнил објектот со чад, но никој не ги пуштил мигрантите надвор.
Мигрантите тргнале од градот Тапачула, во близина на границата со Гватемала, а нивната цел е да стигнат до Мексико Сити за да побараат промени во третманот на мигрантите.
„Можеше да биде секој од нас. Всушност, загинаа многу наши сонародници. Единственото што го бараме е правда“, вели мигрантката од Салвадор Миријам Аргуета за загинатите во пожарот.
Сепак, во минатото, многу вакви маршеви продолжуваа до границата со САД, што речиси секогаш е нивна цел. Мигрантите се главно од Централна Америка, Куба, Венецуела, Еквадор и од Колумбија.
Мексиканските власти наметнаа ограничувања со документи и подигнаа контролни пунктови на автопатот за да задржат десетици илјади фрустрирани мигранти во Тапачула, што им го отежнува патувањето до границата со САД.
Аргуета објаснува дека кога мигрантите бараат работа во Тапачула, тие добиваат работни места што можеби не се понижувачки, но Мексиканците сепак не прифаќаат напорна работа што се плаќа многу малку.
Организаторот на маршот Иринео Мухика вели дека мигрантите бараат распуштање на Агенцијата за имиграција во земјата, чии претставници се обвинети – некои се обвинети за убиство – за пожарот на 27 март. Мухика ги нарече притворските центри за мигранти затвори.
Мексиканското Обвинителство најави дека ќе поднесе обвиненија против клучниот човек во Агенцијата за имиграција, Франциско Гардуњо, кој не ја спречил катастрофата во Сјудад Хуарез и покрај претходните индикации за проблеми во притворскиите центри на неговата агенција.
Владините ревизии откриле „шеми на неодговорно однесување и повторени пропусти“ во институтот за имиграција.
Шест вработени на Националниот институт за имиграција, чувар во центарот и венецуелскиот мигрант обвинет за подметнување на пожарот веќе се во притвор и се соочуваат со обвиненија за убиство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с