Човекот обвинет за силување и убиство на шестгодишната Пакистанка Заинаб Ансари е обесен.

Ирман Али, кој беше уапсен откако телото на девојчето беше пронајдено на депонија, беше егзекутиран во Лахор во средата, соопшти полицијата.

На неговото убиство присуствуваа таткото на девојчето и други нејзини роднини, објави Би-би-си.

Инаку, откако беше осуден на смрт за убиството и силувањето на Заинаб, Али е обвинет и за злосторства врз уште шест други девојчиња.

Заинаб исчезна на 4 јануари, а нејзиното тело беше пронајдено на депонија пет дена подоцна.

Полицијата соопшти дека имало неколку слични убиства на деца во претходните две години во Касур, но нејзиното убиство се покажало како критичен пресврт. Злосторот предизвика протести ширум Пакистан, а две лица ги загубија своите животи во конфликти.

Семејството на шестгодишното девојче тврди дека полицијата не презела никаква акција пет дена додека девојчето се водело како исчезнато, односно сè до денот кога нејзиното тело било пронајдено. Токму нејзиното семејство, а не полицијатата, дојде и до видеоснимка на која се забележани последните моменти од животот на девојчето, на која се гледа дека е придружено од возрасен маж.

Ирман Али (24) беше уапсен на 23  јануари врз основа на ДНК-докази. Во февруари тој беше осуден на смрт.