Американскиот медиум „Политико“ претходно денеска објави дека претседателот на Соединетите Американски Држави, Доналд Трамп, им рекол на своите блиски соработници дека милијардерот Илон Маск наскоро ќе ја напушти владината функција.

Белата куќа ја нарече веста „ѓубре“, а портпаролката на Трамп, Керолин Ливит, на социјалната мрежа „Икс“ објави дека Маск „ќе го нема кога ќе ја заврши својата работа“, иако таа не прецизираше временска рамка.

Должината на улогата на Маск во Одделот за владина ефективност, каде што тој ги надгледува големите намалувања на американската влада, никогаш не била јасно дефинирана.

Маск има статус на „специјален вработен во владата“, што му ја ограничува службата на 130 дена годишно. Во неодамнешното интервју за Фокс њуз, Маск рече дека верува оти службата ќе го заврши најголемиот дел од работата во таа временска рамка.

Извештајот на „Политико“ доаѓа откако Маск доживеа голем политички неуспех на изборите во Висконсин, каде што потроши 20 милиони долари за поддршка на конзервативен судија кој загуби во трката за место во највисокиот суд во државата.

Млад човек (26) е извлечен жив од урнатините на хотел во Мјанмар, пет дена откако разорниот земјотрес срамни со земја цели населби и уништи храмови, мостови и автопати.

Заеднички спасувачки тим од Мјанмар и Турција по полноќ го пронашле 26-годишникот во урнатините на зградата во главниот град Најпидав, соопштија противпожарната служба и владејачката хунта во земјата.

Повеќе од 2.700 луѓе загинаа во катастрофата, а бројот на жртвите се очекува да надмине 3.000.

Агенциитеги повикаа другите земји да ја зголемат помошта пред монсунските дождови, пишува Гардијан.

Во близина на епицентарот, во опустошените градови Мандалеј и Сагаинг, трауматизираните преживеани спиеле на улиците, додека се шири смрдеата на трупови заробени под урнатините.

Има недостиг од вода, храна и лекови, а монсуните би можеле да ја погодат земјата веќе во мај.

Науса на Парос, скапоцен камен на островите Киклади и една од најпосетуваните туристички дестинации во Грција, се обидува да заздрави откако силно невреме го погоди островот во понеделникот попладне.

Интензивниот дожд за неколку минути ги претвори улиците во порои, додека штетите на имотите и инфраструктурните објекти предизвикаа загриженост кај локалното население и претприемачите, кои гледаат како се приближува Велигден и незапирливо истекува времето.

Катастрофата беше широко распространета, што резултираше со поплавени домови и продавници, одрони од кал на улиците, соборени дрвја и превртени возила – од кои некои дури завршија во морето. Прекрасното пристаниште Науса, кое ќе биде домаќин на илјадници посетители во наредните недели, се претвори во огромна јама од кал.

Најголемиот проблем е концентриран на едно единствено место: една единствена улица што води до пристаништето. Станува збор за улица која според мештаните била изградена на стар поток – природен порој кој со текот на времето се пополнувал и асфалтирал, но без предвид за правилно одведување на водата. Резултат? Секој силен дожд го претвора ова место во стапица, заробувајќи возила и луѓе.

„Не може секогаш кога врне да се плашиме да не се удавиме. Таму е потокот, само го покривме со асфалт. Некој треба сериозно да го разгледа ова пред да ги загубиме животите“, изјавува револтиран локален жител.

Проблемот, познат со децении, останува нерешен. Еднонасочниот сообраќај на таа улица, заедно со немањето алтернативен пристап до Науса, ја влошуваат состојбата. И покрај постојаните барања на жителите за решение, не е направен суштински план за заштита на просторот од вакви појави.

Харис Гиурцидес, одговорен за цивилната заштита на општина Парос, за „Прототема“ изјави дека се преземени сите неопходни мерки за предупредување на граѓаните.

„Испративме известувања за возилат паркирани на патот кон пристаништето, за жал, многумина не ги следеа, па возилата беа поплавени“, посочува тој.

Сепак, сликата што ја пренесуваат мештаните е поинаква и открива недостаток на реална информираност и превенција.

„Не може секојпат одговорноста да падне врз граѓаните, општината мора да преземе реални мерки и да не спроведува само половични чекори“, велат тие.

Од вторникот во раните утрински часови, екипи на општината со машини почнаа со реконструктивните работи, со цел чистење на улиците, отстранување на калта и наталожените материјали и што поскоро враќање на пристапот до пристаништето. Бизнисите во областа, рестораните и туристичките работници, исто така, прават паралелни напори за да ја вратат Науса „во функција“ до Велигден.

Оваа природна катастрофа на најтешкиот начин потсети дека туристичките дестинации треба да го спојат развојот со основната безбедност на нивната инфраструктура. Сега се повикани општинските власти да се соочат со проблемот и да преземат реални мерки за заштитата од поплави. Случајот со улицата што минува низ прекрасното пристаниште Науса веќе не може да се игнорира: целата област е изложена на опасност и постоењето на единствената улица, изградена на затрупан поток, претставува „темпирана бомба“.

На жителите на овој прекрасен приморски град им поминува само една мисла: Замислете што ќе се случеше доколку оваа природна катастрофа се случеше за време на велигденскиот викенд, со илјадници посетители на островот? Кој би управувал со хаосот тогаш?