Високиот претставник на ЕУ, Жозеп Борел, оцени дека изборот на Доналд Трамп за претседател на САД ќе има многу општествени, политички и геополитички последици кои ќе го одбележат развојот на светот и за нашите внуци.

Борел во Европскиот парламент истакна дека доаѓањето на Трамп на чело на САД „не е крај на светот, туку почеток на нов, поинаков свет“.

„Мораме да се подготвиме за она што може да следи“, предвиде тој, велејќи дека тоа мора да се направи „разумно, внимателно и без да се остави впечаток дека сме парализирани како елен во ноќта пред фаровите на автомобилот“.

Борел посочи дека партнерите во ЕУ мора да покажат дека не се ниту исплашени, ниту поделени, но додаде дека реалноста покажува дека тие сигурно се, бидејќи, како што додаде, победата на Трамп не била на ист начин добредојдена во сите главните градови на Унијата.

Според него, тоа ќе има последици за односите меѓу ЕУ и САД и објавувањето на американските царини од 10 отсто за европскиот увоз, како што подвлече, несомнено ќе ја загрози конкурентноста на ЕУ, додека многу повисоките давачки за кинеските производи потоа ќе ги пренасочат кинеските стоки во Европа.

Борел особено посочи дека Европа мора финансиски и индустриски да компензира за најавеното американско намалување на воената и економската поддршка за Киев.

Високиот претставник на ЕУ, кој изминативе денови беше во посета на Украина, рече дека воената ситуација таму не е лесна, има големи жртви на двете страни.

„Мораме да избегнеме дипломатско решение на конфликтот што ќе ја турне Украина настрана и ќе не отстрани и нас“, рече тој.

„Договорот меѓу Соединетите Американски Држави на Трамп и Русија на Путин, заобиколувајќи ги Украина и Европската унија, со цел да се запре војната и да се одложи за подоцнежни политички разговори, е она што Украина го отфрла, а ЕУ исто така мора да го отфрли“, додава тој, пренесува Бета.

Шефот на надворешната и безбедносната политика на ЕУ се осврна и на војната во Газа и рече дека со доаѓањето на Трамп во Белата куќа сигурно ќе има повеќе разбирање за експанзионистичките аспирации на израелскиот премиер Бенјамин Нетанјаху, и помала безбедност за Палестинците“.

Европската унија треба да ги преиспита санкциите против Русија бидејќи тие ги држат високите цени на енергијата и ја попречуваат економската конкурентност на блокот, изјави денеска унгарскиот премиер Виктор Орбан.

Лидерите на Европската унија потпишаа декларација за конкурентност на нивниот неформален самит минатата недела.

„Цените на енергијата треба да се намалат на секој начин. Тоа значи дека санкциите треба да се преиспитаат, бидејќи според сегашната политика на санкции, цените на енергијата нема да паднат“, рече Орбан во интервју за унгарското јавно радио.

Орбан рече дека американските компании плаќаат четвртина од она што нивните европски колеги го трошат за гас и електрична енергија, недостаток што не може да се надмине со други средства.

Откако Русија ја нападна Украина на почетокот на 2022 година, Орбан се појави како гласен критичар на санкциите на ЕУ против Москва и финансиската и воената поддршка на блокот за нејзиниот сосед, пишуваат медиумите во регионот.

Според написите, додека западноевропските земји вложија сериозни напори да се оддалечат од руската енергија, Унгарија без излез на море добива 80-85 отсто од својот гас од Русија, а 80 отсто од суровата нафта исто така доаѓа од поранешниот комунистички сојузник.

Хрватскиот премиер, Андреј Пленковиќ го разреши министерот за здравство, Вили Берош, кој утрово беше уапсен.

„Премиерот го разреши Вили Берош од министерските должности. Тој ја назначи Ирена Хрстиќ за државен секретар кој раководи со Министерството за здравство до стапување на функцијата новиот министер“, соопштија од хрватската влада, пренесе „Индекс“.

Хрватската полиција утрово во акција по наредба на Одделот за сузбивање на корупцијата и организиран криминал (УСКОК) го уапси министерот за здравство Вили Берош, јавија хрватските медиуми.

Станува збор за финансиски малверзации со набавка на микроскопи.