Свет
Полицијата во Калифорнија со помош на ДНК го реши бруталното убиство на една млада жена во 1983 година
Маж е уапсен и обвинет за убиство откога ДНК го поврза со жена што беше брутално претепана и оставена да умре во парк во Северна Калифорнија пред четири децении.
ДНК-доказите го поврзуваат Алфредо Каретеро Јуниор од Лејкпорт, Калифорнија, во убиството на 37-годишната Ноел Русо, според канцеларијата на окружниот обвинител на округот Сонома.
Претходно ,беше објавено дека Каретеро можеби има корисни информации за случајот, но тој дури сега е официјално обвинет.
Русо, која беше крунисана за мис во 1962 година, последен пат беше видена на 24 јуни 1983 година. Пријателите рекле дека се скарала со своето момче и заминала во куќата на својата пријателка во Санта Роса, пренесува „Индипендент“.
Еден пријател наводно ја возел за да може да се врати со автобус до нејзиниот стан во паркот Ронерт. Три дена откако последен пат беше видена, седумгодишно момче го откри нејзиното голо и претепано тело зад канцеларијата за недвижности во областа Ронерт Парк – мало гратче на 80-ина километри северно од Сан Франциско.
Русо била претепана до смрт со дрвен предмет. Единицата за истраги за насилни злосторства во тоа време почна истрага за убиство. Иако во текот на годините беа собрани значителен број докази што доведоа до одредени сомнежи, немаше уапсени, соопштија од канцеларијата на шерифот на округот Сонома.
Немаше напредок во случајот до 2010 година кога детективите почнаа да испраќаат докази за ДНК-анализа до лабораторијата за криминал во округот Санта Клара и Институтот за серолошки истражувања. Канцеларијата на шерифот вели дека Каретеро бил еден од првите луѓе поврзани со случајот.
ДНК и други докази сега го идентификуваа како осомничен, додадоа од канцеларијата на шерифот.
65-годишниот Каретеро се наоѓа во затворот за возрасни во округот Сонома и е задржан без кауција. Неговото следно судење е закажано за 18 октомври. Не е јасно дали ја познавал жртвата. Детективите веруваат дека Русо можеби налетала на некого додека чекала автобус до паркот Ронерт, пренесува SFGate.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Стинг и „Колдплеј“ бараат ослободување на иранскиот рапер осуден на смрт
Активистите за човекови права, заедно со 100 музичари, вклучувајќи ги Стинг и „Колдплеј“, бараат ослободување на иранскиот рапер Тумај Салехи, осуден на смрт поради поддршка на масовните протести во Иран есента 2022 година. „Смртната пресуда на Салехи е кулминација на три години судско вознемирување вклучувајќи апсење, затворање и тортура“, се вели во петицијата на лондонската организација Index on Censorship.
Во многу од неговите песни пејачот го привлече вниманието на состојбата со човековите права во Иран. Во октомври 2023 година на Салехи му беше доделена наградата за слобода на изразување од страна на Index on Censorship.
„Мора да се дозволи уметноста да критикува, провоцира, преиспитува и предизвикува авторитет“, велат потписниците.
„Ниту еден уметник не треба да биде подложен на каков било вид судско малтретирање поради остварување на своето право на слобода на изразување, а камоли да биде осуден на смрт“.
Смртната казна за Салехи беше објавена на крајот на април. Оваа вест предизвика незадоволство во Иран и други земји во светот. Властите донесоа одлука во врска со поддршката на Салехи за масовните протести во Иран во есента 2022 година. Во минатото раперот со своите текстови ги критикува социјалните и политичките проблеми во земјата.
Свет
Папата ги повика владите на демографски политики: „Не недостигаат кучињата и мачките, туку децата“
„Владите мора да спроведат сериозни и ефективни политики за благосостојбата на семејствата за да се спротивстават на падот на наталитетот и стареењето на населението“, рече денеска папата Франциско и ги повика младите да имаат верба во иднината.
Говорејќи на конференцијата за сè потешката демографска криза, папата рече дека бројот на првите раѓања е показател за надежта на луѓето и дека Европа сè повеќе се претвора во „стар, уморен и резигниран“ континент.
„Потребни се ефективни политики, храбри, конкретни и долгорочни одлуки. Потребна е поголема посветеност на сите влади за помладите генерации да ги остварат своите легитимни соништа“, рече папата.
Стапката на наталитет во Европа минатата деценија падна на 1,5 раѓање на жена. Ова е повисоко од најниските нивоа, како оние во источна Азија, но многу помалку од 2,1 потребни за одржување на населението.
„Постои факт што ми го кажа еден демограф. Моментно, инвестициите со најмногу приходи се оние во фабриките за оружје и контрацепција. Едниот го уништува животот, другиот го спречува. Каква иднина имаме? Тоа е лошо“, вели папата.
Бројот на раѓања во Италија падна на рекордно ниско ниво во 2023 година и се намалува веќе 15-та година по ред.
„Домовите се полни со предмети, но без деца, стануваат многу тажни места. Не недостигаат мали кучиња, мачки. Нема недостиг од тоа. Има недостиг од деца“, рече папата.
Тој предложи политики што нема да ги принудуваат мајките да избираат помеѓу кариерата и грижата за децата и кои на младите парови ќе им обезбедат стабилни работни места и можност за купување недвижен имот.
„Знам дека за многумина од вас иднината изгледа неизвесна и дека поради падот на наталитетот, војните, пандемиите и климатските промени, не е лесно да се одржи надежта жива. Но, не откажувајте се, имајте верба “, им рече тој на младите.
Свет
Египет ги повика Хамас и Израел да покажат флексибилност и да постигнат договор за прекин на огнот во Газа што е можно побргу
Египет апелира до Хамас и Израел да покажат флексибилност за што побргу да се постигне прекин на огнот во борбите во Газа, соопшти утрово египетското Министерство за надворешни работи. Египет смета дека преговорите во Каиро не доведоа до прекин на огнот. Тие во моментот се во деликатна фаза, а делегациите на Хамас и Израел го напуштија главниот град на Египет, се наведува во соопштението.
Во телефонски разговор со американскиот државен секретар Ентони Блинкен египетскиот министер за надворешни работи Самех Шукри ја нагласи „важноста да се повикаат страните да покажат флексибилност и да ги направат сите неопходни напори за постигнување договор за прекин на огнот и на тој начин да се стави крај на хуманитарната трагедија во Газа, соопшти Министерството.
Каиро стравува од опасноста израелската операција во Рафа да ги загрози стабилноста и безбедноста на регионот, се додава во соопштението на египетската дипломатија.
Блинкен потврди дека Соединетите Американски Држави се против голема воена операција во Рафа и какво било принудно раселување на Палестинците од Газа, изјави неговиот портпарол, Метју Милер.
Израелската армија во вторникот распореди тенкови во Рафа и ја презеде контролата на граничниот премин со Египет блокирајќи го главниот премин за конвои со хуманитарна помош кон опколената палестинска територија.