Свет
Помпео: Џјинпаинг е поголема закана од Владимир Путин

Поранешниот американски државен секретар Мајк Помпео изјави дека верува оти кинескиот претседател е поголема закана за светот од рускиот претседател Владимир Путин.
Во интервју за „Скај њуз“ тој рече дека кинескиот претседател планира да владее со светот и додаде: „Тој сака да ве поседува“.
„Џјинпинг планира да ги спроведе хегемонистичките намери во светот со својата марксистичко-ленинистичка визија и да воспостави кинеска економска и политичка доминација во секој дел од светот“, рече Помпео, пренесе „Танјуг“.
„Тоа е неговата злобна цел. Имаме обврска кон следната генерација да се спротивставиме“, рече тој.
На прашањето дали кинескиот претседател е поопасен од неговиот руски колега, Помпео одговори: „Апсолутно“.
„Владимир Путин има многу моќна нуклеарна програма и економија што зависи од една индустрија. „Кога би произведувале енергија во Америка, таа индустрија би му била многу помалку вредна“, рече тој.
„Џјинпинг е поинакво суштество. Од тоа зависи глобалната економија. Има 1,4 милијард луѓе и економија која е конкурентна по големина со онаа на САД, многу способна просторна, воена и сајбер-програма“, посочи Помпео.
Тој изјави дека иако Путин верува во голема Русија, тој „нема илузии за неговата способност да доминира со светот“, додека Џјинпинг верува во тоа.
„Ова се два фундаментално спротивни ризици за нашиот начин на живеење во Европа, САД, Азија, Блискиот Исток, насекаде“, рече Помпео.
Мајк Помпео беше државен секретар меѓу 2018 и 2021 година за време на мандатот на Доналд Трамп.
Тој беше офицер во американската армија и директор на Централната разузнавачка агенција (ЦИА) од јануари 2017 до април 2018 година, пренесе „Денес.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Позитивна средба меѓу Трамп, Зеленски, Макрон и Стармер – Доналд си заминал од Рим

На маргините од испраќањето на папата Франциск во Рим, претседателите на САД, Доналд Трамп, Украина, Володимир Зеленски, Франција, Емануел Макрон и британскиот премиер Кир Стармер остварија „позитивна“ размена на мислења за ситуацијата во Украина, соопшти Елисејската палата.
„Потврдувам дека имаше размена на мислења меѓу претседателот и Трамп, Зеленски и Стармер, што беше позитивно“, изјави советник од Елисејската палата.
Иако постоеше можност за нова средба помеѓу Трамп и Зеленски по церемонијата, американскиот претседател го напушти Рим без дополнителна средба, јавуваат агенциите.
Претходно, Зеленски и Трамп накратко се сретнале во базиликата „Свети Петар“, седејќи на две столчиња без советници околу нив. Белата куќа соопшти дека разговорот бил „многу продуктивен“, особено во контекст на обидите за ставање крај на конфликтот меѓу Украина и Русија.
Трамп, кој интензивно врши притисок врз двете страни да постигнат прекин на огнот, во петокот изјави дека неговиот претставник остварил „продуктивни“ разговори со руското раководство. Тој повика на итен состанок на високо ниво меѓу Киев и Москва за финализирање на мировен договор.
Трамп веќе ги предупреди страните дека неговата администрација ќе се повлече од напорите за постигнување мир ако не се постигне договор наскоро. Средбата во Рим е прва лична средба меѓу Трамп и Зеленски откако во февруари имаа жестока расправија во Овалната соба.
Свет
(Фото+Видео) Папата погребан со едноставна церемонија во „Санта Марија Маџоре“

Поворката со ковчегот на папата Франциск пристигна во базиликата „Санта Марија Маџоре“ во Рим, каде што поглаварот на Католичката црква ќе биде погребан. Погребната поворка, која го носеше ковчегот на Франциск во пренаменет папамобил, тргна од базиликата „Свети Петар“ кон неговата последна дестинација, додека илјадници верници, собрани на улиците на Рим, му оддаваа почит.
На рутата долга околу 5,5 километри од плоштадот „Свети Петар“, поворката помина покрај бројни познати римски споменици, вклучувајќи го и Колосеумот, а насобраните граѓани аплаудираа додека ковчегот минуваше.
Пред базиликата „Санта Марија Маџоре“, папата Франциск беше пречекан од четириесет претставници на маргинализирани групи – мигранти, бездомници, затвореници и трансродови лица – кои му оддадоа последна почит.
Погребот на папата ќе биде приватен, според неговите сопствени желби. Франциск ќе биде погребан во базиликата од петтиот век, лоцирана во центарот на Рим, во мала ниша на подот. Надгробната плоча, изработена од лигурски мермер, ќе го носи само неговото име на латински јазик – Franciscus.
Во истата базилика е погребан и прочуениот архитект и скулптор Џан Лоренцо Бернини, авторот на колонадите на плоштадот „Свети Петар“, каде што се одржа и погребната миса за папата Франциск.
Целиот церемонијал се одржа по едноставна постапка, како што тој лично посакувал.
Последниот папа што бил погребан надвор од ватиканските ѕидини бил Лав XIII, кој починал во 1903 година и бил погребан во базиликата „Свети Јован Латерански“. Последен пат, папа бил погребан во базиликата „Санта Марија Маџоре“ во 1669 година, кога таму бил положен Климент IX.
Кардинал Батиста Ре: Папата Франциск беше близок до народот и посакуваше Црква за сите
Италијанскиот кардинал Џовани Батиста Ре, на церемонијата на збогување на плоштадот „Свети Петар“, изјави дека папата Франциск бил „папа близок до народот“, кој посакувал Црква отворена за сите. Како што истакна кардиналот, водечката нишка на 12-годишниот понтификат на Франциск била идејата за „Црквата како дом за сите“.
Батиста Ре, 91-годишниот декан на Колеџот на кардинали кој ја предводеше погребната миса за покојниот поглавар на Римокатоличката црква, нагласи дека Франциск сакал да биде меѓу народот, со „отворено срце за сите“. Тој додаде дека папата бил особено чувствителен на она што се случувало во општеството, но и на инспирацијата која, како што рече, Светиот Дух ја внесувал во животот на Црквата.
Во своето обраќање пред насобраните верници и светски лидери, Батиста Ре го опиша Франциск како „многу спонтан човек“, со „неформален начин на комуникација со сите“, вклучително и со оние кои биле далеку од верата. „Полн со човечка топлина и длабоко чувствителен на раните од денешницата, папата Франциск навистина ги сподели грижите, страдањата и надежите на нашето време“, рече кардиналот.
Франциск, според него, се залагал за Црква што се грижи за проблемите што го разоруваат современиот свет, Црква што ќе се наведне над секој човек, без разлика на неговата вера или животни околности.
Кардиналот потсети дека папата бил најмногу загрижен за маргинализираните – сиромашните, мигрантите и бегалците. Прво патување како папа Франциск го направил токму на Лампедуза, остров кој стана симбол на трагедијата на миграцијата.
Батиста Ре ги спомена и дел од 47-те апостолски патувања на Франциск, вклучително и посетата на грчкиот остров Лезбос заедно со претставници на други цркви, мисата на границата меѓу Мексико и САД, како и ризичното патување во Ирак во 2021 година.
Следејќи ја визијата на Франциск, кој постојано повикуваше на „градење мостови, а не ѕидови“, италијанскиот кардинал испрати силна порака за важноста на мирот.
„Војната секогаш го остава светот полош отколку што беше порано. Војната е секогаш болен и трагичен пораз за сите“, рече Батиста Ре, обраќајќи се пред околу педесет светски лидери кои пристигнаа во Ватикан за да му оддадат последна почит на папата Франциск.
Свет
Трамп и Зеленски разговараа 15 минути пред погребот, нова средба подоцна

Портпаролот на украинскиот претседател, Сергеј Никифоров, изјави дека Володимир Зеленски и американскиот претседател Доналд Трамп денеска ќе одржат уште една средба.
Двајцата лидери веќе имаа краток, 15-минутен разговор во базиликата Свети Петар, непосредно пред почетокот на погребот на папата Франциск.
„Лидерите се согласија да ги продолжат разговорите денеска. Тимовите работат на организирање на продолжението на состанокот,“ изјави Никифоров.