Свет
Поранешниот директор на ЦИА го предупреди Западот: „Русија ќе војува со НАТО ако победи во Украина“

Поранешниот директор на американската Централна разузнавачка агенција (ЦИА) Дејвид Петреус денеска ги предупреди западните земји да се разбудат затоа што рускиот претседател Владимир Путин ќе влезе во војна со НАТО доколку победи во војната во Украина.
– Тој беше многу јасен и мислам дека е јасно, гледајќи наназад, дека требаше да го слушаме тој поединец (Путин). Ни кажува во што верува – изјави Петреус во интервју за Sun.
За да го победи Путин, истакна Петреус, Западот мора да направи се што е можно за да и помогне на Украина.
– Украинската војна може да се прошири во регионот доколку Путин успее во Украина. Тој нема да се задоволи да застане во Украина. Следна очигледно би била Молдавија, а после тоа би можела да биде Литванија или некоја од балтичките држави – изјави Петреус.
Тој оцени дека клучот за победата на Украина е брзото зголемување на бројот на војници и воена моќ со помош на нејзините западни сојузници.
– Реалноста е тешка и тоа е дополнителна причина зошто треба да направиме се што можеме за да и помогнеме на Украина на секој можен начин – рече Петреус.
Тој додаде дека Украина мора да направи и голем технолошки напредок, потсетувајќи на нејзиниот успех во поразот на руската флота во Црното Море.
– Имајте на ум дека тие (Украинците) го направија она што го направија во Црното Море, не со помош на бродови или морнари, туку со беспилотни летала. Поморските беспилотни летала, воздушните беспилотни летала и противбродските проектили им овозможија да потонат третина од флотата во Црното Море – рече Петреус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Фото) Аеродромот во Загреб затворен за сообраќај – мал авион слета надвор од пистата

Аеродромот „Фрањо Туѓман“ во Загреб денеска попладне беше затворен за сообраќај поради инцидент со приватен авион кој се излизгал од пистата, пишува Индекс.
Инцидентот се случил околу 15:21 часот, при слетување на приватен авион од типот Cessna 525.
Леталото проклизнало и завршило на тревната површина покрај пистата.
Според информации од авиокомпанијата, авионот бил празен и во инцидентот нема повредени.
Во моментот се преземаат мерки за отстранување на леталото од пистата, а аеродромот останува затворен до понатамошно известување.
Од Аеродромот „Фрањо Туѓман“ се извинија на патниците за доцнењата на пристигнувачките и поаѓачките летови и најавија дека јавноста ќе биде навремено информирана кога сообраќајот повторно ќе биде воспоставен.
Свет
Масовни протести во Шпанија против корупција

Повеќе од десетици илјади луѓе се собраа денес во Мадрид на демонстрации организирани од главната конзервативна опозициска партија, против владата на социјалистичкиот премиер Педро Санчез, обвинувајќи ја за корупција.
Демонстрантите се собраа на Шпанскиот плоштад во центарот на главниот град, велејќи му на Санчез да „поднесе оставка“.
Народната партија го свика собирот откако протечените аудио снимки наводно покажуваат дека член на Социјалистичката партија води кампања за клевета против полициска единица што истражува обвинувања за корупција, во која наводно се вклучени сопругата, братот и поранешната десна рака на Педро Санчез.
Социјалистичката членка ги негираше обвинувањата, кажувајќи им на новинарите дека спроведувала истражување за книгата и дека не работи во име на партијата или на Педро Санчез, а потоа ја напуштила Социјалистичката партија.
Лидерот на Народната партија, Алберто Нуњез Феихо, ја обвини владата за „мафијашки практики“ во аферата, тврдејќи дека Санчез е во центарот на повеќе корупциски скандали.
Народната партија процени дека повеќе од 100.000 луѓе присуствувале на денешниот митинг под слоганот „Мафија или демократија“.
Владин претставник во Мадрид процени дека на демонстрациите имало помеѓу 45.000 и 50.000 луѓе.
Свет
Тропската бура Барбара се формираше покрај брегот на Мексико

Тропската бура Барбара се формираше покрај југозападниот брег на Мексико, соопшти Националниот центар за урагани во Мајами рано утрово. Не се издадени предупредувања за крајбрежна опасност.
Брзината на ветерот беше околу 75 километри на час со повремени силни налети. Се очекува бурата да прерасне во ураган во понеделник.
Во делови од мексиканските држави Гереро, Мичоакан, Колима и Халиско можни се обилни врнежи од дожд од 5 до 10 сантиметри, а на некои места и до 15 сантиметри. Врнежите од дожд можат да доведат до поплави и лизгање на земјиштето.