Свет
Поранешниот украински премиер за Трамп и Путин: Ова е вистински пресврт

Поранешниот украински премиер, Арсениј Јацењук, изјави во интервју за „Скај њуз“ дека денес Украина била сведок на „вистински пресврт“ во ставот на американскиот претседател Доналд Трамп кон Владимир Путин.
„Мислам дека ова е целосен пресврт“, му рече Јацењук на водителот Марк Остин, коментирајќи ја објавата на Трамп за испорака на ново оружје во Украина и заканата од дополнителни санкции против Русија. „Имам чувство дека претседателот Трамп сфатил дека Путин се обидел да го измами и излаже“.
„Ова значи дека ова сега е лично прашање за него“, додаде тој.
„Тој сфати дека Путин е насилник и не сака да биде понижен од некој што веќе се смета за воен злосторник на меѓународно ниво“.
Јацењук истакна дека не верува оти рускиот претседател ќе седне на преговарачката маса: „Искрено, не верувам дека тој гад е подготвен за преговори. Но, верувам дека тоа е доволно за да ѝ се помогне на Украина да се бори, да ја зачува својата државност и да победи“.
Зборувајќи за најавениот нов пакет воена помош, тој рече: „Тоа сигурно ќе го зајакне воениот капацитет на Украина. Ќе имаме повеќе алатки во арсеналот и поголема моќ. Ова сериозно ќе влијае и ќе ја ослабне руската војска“.
Изјавите на Јацењук следеа по прес-конференцијата на Доналд Трамп и генералниот секретар на НАТО, Марк Руте, во Белата куќа. Трамп рече дека САД планираат да произведуваат и испраќаат „врвно оружје“ до сојузниците на НАТО, а НАТО ќе одлучи за неговата дистрибуција – вклучително и Украина. Руте потврди дека сите трошоци ќе ги сносат европските земји.
Во исто време, Трамп ѝ постави на Русија ултиматум – доколку Москва не се согласи на договор за прекин на војната во рок од 50 дена, САД ќе воведат 100 отсто царини за рускиот извоз и таканаречени секундарни царини за земјите што тргуваат со Русија, како што се Кина и Индија. Ова е пресвртница во надворешната политика на Трамп кон Украина и Русија, велат аналитичарите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шпанија со закон го забранува извозот на оружје во Израел: „Сакаме да се стави крај на геноцидот во Газа“

Шпанските пратеници денес гласаа за закон со кој се воведува ембарго за извоз на оружје во Израел, мерка што долго време ја заговараше социјалистичкиот премиер Педро Санчез за „запирање на геноцидот“ во Газа.
„За“ гласаа 178 пратеници, а 169 беа против. Малцинската влада на социјалистичкиот премиер конечно ја доби поддршката од четири пратеници од крајно левичарската партија Подемос, која не откри како ќе гласа до денеска наутро.
Шпанското ембарго е на сила од октомври 2023 година, но социјалистичката влада сакаше да ја „зацврсти правно“ одлуката.
Санчез го објави тоа на 8 септември, по што израелската влада реагираше жестоко, но Израел го повлече својот амбасадор од Шпанија во 2024 година, откако Мадрид ја призна Палестина.
Регион
Вучиќ: Турција сонува повторно да ја обнови Отоманската Империја

По пристигнувањето на турските беспилотни летала во Приштина, имаше остра реакција од српскиот претседател Александар Вучиќ, кој ја обвини Турција дека сонува за обнова на Отоманската Империја. Со овој потег, Србија премина од „златно доба“ во односите со Турција и пријателството со Ердоган на отворени политички тензии за само една година, пишува N1.
Косовскиот премиер Албин Курти претходно објави на Фејсбук дека пристигнале беспилотните летала, додавајќи дека десетици безбедносни сили веќе се обучени да ги користат.
Курти објасни дека договорот со турската компанија Бајкар бил потпишан во декември минатата година, а дроновите биле испорачани три месеци пред предвидениот рок. Тој нагласи дека Косово „продолжува да ја зајакнува ударната моќ на својата армија“ со модерна технологија.
Реагирајќи на веста, Вучиќ остро го осуди потегот на Турција, велејќи дека е „ужасен“ и дека тоа „јасно покажува дека Турција не сака стабилност на Западен Балкан“.
„Згрозен сум од однесувањето на Турција и грубото кршење на Повелбата на ОН и Резолуцијата 1244 на Советот за безбедност на ОН, како и од континуираното вооружување на властите во Приштина. Сега е сосема јасно дека Турција не сака стабилност на Западен Балкан и дека сонува за оживување на Отоманската империја. Србија е мала земја, но ние добро ја разбравме пораката“, рече Александар Вучиќ.
Реагираше и владината Канцеларија за Косово и Метохија, а нејзиниот директор Петар Петковиќ ја повтори оценката на Вучиќ дека Србија „ја разбрала пораката“ и дека „не е случајно“ што беспилотните летала биле доставени во Косово три месеци пред предвиденото.
Турција го направи ова, смета Петковиќ, „само неколку дена пред локалните избори“, со цел да му ја обезбеди на премиерот на Приштина „потребната поддршка пред изборите на 12 октомври, за да може да продолжи да го тероризира српскиот народ“.
Петковиќ рече дека Белград „ќе продолжи одговорно да го зачувува мирот и стабилноста, и покрај вооружените сојузи што се создаваат на штета на мирот и претставуваат директна закана“.
Фото: ЕПА
Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.