Претставничкиот дом на американскиот Конгрес усвои закон за одбранбена политика во вредност од 762,9 милијарди евра, кој, покрај мерките за зајакнување на воената подготвеност и зголемување на платите на американските војници, воведува и голем број нови ограничувања, вклучително и забрана за обезбедување здравствена заштита поврзана со промената на полот на припадниците на војската, пишува „Њујорк тајмс“.

Законот беше усвоен со 231 глас „за“. „Њујорк тајмс“ објавува дека републиканците во Конгресот го претворија годишниот документ за одбранбена политика на Пентагон во средство за „наметнување конзервативна социјална политика“.

Официјалната цел на законодавството, според медиумот, беше да се поедностави и модернизира начинот на кој Пентагон ги идентификува и задоволува воените потреби, вклучително и истражување, буџетирање, склучување договори, производство и снабдување. Овој процес беше критикуван и од републиканците и од демократите во Конгресот, а дополнително го налути воено-индустрискиот комплекс.

Иако републиканците и демократите ги пофалија одредбите за кои велат дека ќе ја подобрат способноста на Пентагон да спроведува одбранбени мисии и да ги зајакнат вооружените сили, дебатата беше обележана со контроверзни полемики за социјално конзервативните ограничувања, што републиканската група ги протурка за време на гласањето, главно по партиска линија, според „Њујорк тајмс“.

И покрај силното противење на републиканците на обезбедување воена помош за Украина, законот сепак обезбедува 342 милиона евра за иницијативата на Пентагон за поддршка на украинската безбедност. Претставничкиот дом го отфрли предлогот на Марџори Тејлор Грин за укинување на финансирањето на Украина, при што и републиканците и демократите гласаа против него.

Пратениците исто така додадоа одредба со која се бара од Пентагон да го извести Конгресот доколку администрацијата планира да ја откаже или суспендира воената помош за Украина одобрена од Конгресот.

Фото: принтскрин

Присутните на настанот на кампусот на Универзитетот „Јута Вали“, каде што синоќа беше убиен американскиот конзервативен активист Чарли Кирк, ги опишаа сцените на паника што следуваа по фаталната пукотница. Кирк (31), влијателен човек и близок сојузник на Доналд Трамп, беше убиен со еден куршум во вратот додека држеше говор пред речиси 3.000 луѓе како дел од неговата „Американска турнеја за враќање“, објави „Би-би-си њуз“.

„Го видовме телото како паѓа“

Полицијата верува дека истрелот бил испукан од покривот на блиската зграда, на стотина метри оддалеченост. Видеата од социјалните медиуми го покажуваат Кирк како зборува за насилство со оружје само неколку моменти пред да биде застрелан.

„Моите пријатели и јас се забавувавме само слушајќи што се случува. Одеднаш слушнавме гласен крик, силен тресок, а потоа го видов неговото тело како паѓа во забавена снимка“, изјави еден очевидец за „Би-би-си њуз“.

Портер Лафербер, студент и голем обожавател на Кирк, беше на петнаесетина метри оддалеченост. „Седев таму снимајќи го, престанав да снимам и тогаш го слушнав тој истрел. Не разбираш што се случило сè додека не се случи. Чарли паѓа од столот, сите почнуваат да паничат“, изјави тој за Би-би-си“. Лафербер додаде дека се скрил зад бетонска ограда, а потоа истрчал кон најблиската зграда.

„Не сакам да умрам“

Даниел беше уште поблиску, на помалку од пет метри од сцената. „Беше ужасно. Сѐ што слушнав беше врескање. Видов луѓе како трчаат и си помислив: „Не е безбедно да се трча. Не е безбедно да се станува“… И сѐ што велев беше: „Те молам боже, те молам боже, те молам боже, затоа што не сакам да умрам“, изјави за „Ројтерс“.

Поранешниот американски конгресмен Џејсон Чафец, кој беше на настанот со својата ќерка, ги потврди сцените на хаос. „Куршумот отиде директно во него. Сите беа на подот и трчаа“, изјави тој за „Фокс њуз“.

Адам Бартоломеј, кој интервјуира контрапротестанти на настанот, исто така го опиша општиот хаос. „Имаше хаос и луѓето трчаа кон излезите. Неколку луѓе беа во солзи“, изјави тој за Би-би-си.

Фил Лајман, поранешен конгресмен од Јута, ја делеше сцената со Кирк непосредно пред неговиот говор. „3.000 деца, кои во основа гледаат како некој е застрелан пред нив, тоа е навистина трауматично. Навистина е тешко“, рече тој.

Ема Питс од „Дезерет њуз“, која известуваше од настанот, рече: „Никогаш нема да ја извадам таа слика од главата“. Питс додаде дека била изненадена од недостигот на безбедност. „Никој не ја скенирал нашата опрема, никој не ги скенирал нашите торби, немало обезбедување“, рече таа. Бартоломеј се согласи велејќи дека е и изненаден што никој не му ја проверил торбата.

Универзитетот „Јута Вали“ соопшти дека имало шест обезбедувачи за предавањето, покрај приватното обезбедување на Кирк.

Фото: принтскрин

Американската вселенска агенција НАСА почна да спроведува забрана за кинеските граѓани да работат на нејзините програми, дури и за оние со важечки визи, што дополнително го нагласува интензивирањето на вселенската трка меѓу САД и Кина, пишува „Гардијан“.

Оваа промена на политиката, која првпат ја објави „Блумберг њуз“, ја потврди самата НАСА.

„НАСА презеде внатрешни мерки поврзани со кинеските државјани, вклучително и ограничување на физичкиот и на сајбер-пристапот до нашите објекти, материјали и мрежа за да се обезбеди безбедноста на нашата работа“, изјави портпаролката на агенцијата, Бетани Стивенс.

Според „Блумберг“, на кинеските државјани претходно им било дозволено да работат како надворешни соработници или студенти, кои придонесуваат за истражување, иако не можеле да бидат вработени. Сепак, ситуацијата драстично се промени на 5 септември кога неколку лица, зборувајќи анонимно, потврдија дека одеднаш им е одбиен пристапот до ИТ-системи и им е забрането да присуствуваат на состаноци.

Оваа одлука доаѓа во услови на зголемена антикинеска реторика од администрацијата на претседателот Доналд Трамп во време кога САД и Кина се натпреваруваат кој ќе биде прв што повторно ќе испрати човечки екипаж на Месечината.

Американската програма „Артемис“, наследник на легендарната програма „Аполо“, има цел слетување во 2027 година, но се соочува со пречекорување на трошоците и значителни одложувања.

Од друга страна, Кина планира да ги спушти своите таиконаути на Месечината до 2030 година.

„Во моментот сме во уште една вселенска трка“, изјави минатата недела вршителот на должноста администратор на НАСА, Шон Дафи.

„Кинезите сакаат да се вратат на Месечината пред нас. Тоа нема да се случи. Америка водела во вселената во минатото и ќе продолжиме да водиме во вселената и во иднина“.

Покрај Месечината, Кина има амбиции да стане првата земја што ќе донесе примероци од површината на Марс. Планира оваа роботска мисија да се лансира во 2028 година, а враќањето на Земјата треба да биде веќе во 2031 година.

Во исто време, со својот предлог за буџет администрацијата на Трамп сигнализира дека има намера да ја откаже планираната мисија за донесување примероци од Марс (MSR), што е заеднички проект со Европската вселенска агенција. Оваа задача би можела да ја изврши мисија со екипаж, но конкретните детали сè уште не се познати.

Фото: принтскрин