Свет
Почина поранешниот папа Бенедикт XVI
Поранешниот папа Бенедикт XVI почина во својата резиденција во Ватикан на 95-годишна возраст, речиси една деценија откако се повлече од функцијата поради нарушено здравје.
Тој ја водеше Католичката црква помалку од осум години додека, во 2013 година, стана првиот папа што поднесе оставка по Григориј XII во 1415 година.
Бенедикт ги поминал своите последни години во манастирот Mater Ecclesiae во рамките на ѕидините на Ватикан.
„Со тага ве известуваме дека почесниот папа Бенедикт Шеснаесетти почина денеска во 9:34 часот во манастирот Mater Ecclesiae во Ватикан“, соопшти Ватикан во соопштение за медиумите.
Иако поранешниот папа бил болен извесно време, Светата столица соопшти дека неговата состојба се влошила поради староста.
Во средата, папата Франциск на својата последна аудиенција годинава во Ватикан апелираше сите „да кажат посебна молитва за почесниот папа Бенедикт“, за кој рече дека е многу болен.
Папата Бенедикт XVI, со вистинско име Јозеф Рацингер, е роден во Германија. Имаше 78 години кога стана еден од најстарите папи некогаш избран во 2005 година. За време на поголемиот дел од неговото папство, Католичката црква се соочи со обвинувања за децениска злоупотреба на деца.
Претходно оваа година, поранешниот папа призна дека биле направени грешки во справувањето со случаите на злоупотреба додека бил надбискуп на Минхен помеѓу 1977 и 1982 година.
Јозеф Рацингер, кој го зел името Бенедикт XVI како папа, е роден на 16 април 1927 година во Марктл, Баварија. Неговиот татко бил полицаец, а Рацингер поголемиот дел од своето детство го поминал во Траунштајн, каде посетувал средно училиште.
Бенедикт XVI. беше првиот папа кој се откажа од своите должности по 598 години, што ги изненади и шокираше верниците во светот, но и неговиот најтесен круг во Ватикан.
Неговиот понтификат официјално заврши на 28 февруари 2013 година по седум години, десет месеци и девет дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах тврди дека го нападнал седиштето на Мосад; Израел: Не е точно, тие водат психолошка војна
Портпаролот на израелската војска Надав Шошани го отфрли тврдењето на Хезболах дека го нападнале штабот на Мосад во близина на Тел Авив.
„Водат психолошка војна, затоа го изјавија тоа“, рече тој.
Милитантната група претходно соопшти дека истрелала проектил врз израелската разузнавачка агенција Мосад, која ја обвинуваат за неодамнешната серија намерни убиства на нејзините највисоки команданти и за нападите во Либан минатата недела. Но, потполковникот Шошани рече дека не може да потврди која била целта на Хезболах.
„Резултатот беше тежок проектил, кој се движеше кон Тел Авив, кон цивилните области во Тел Авив. Главниот штаб на Мосад не е во таа област“, рече тој.
Хезболах претходно ја презеде одговорноста за ракетниот напад врз централниот дел на Израел утринава, тврдејќи дека балистичката ракета Кадер 1 го нападнала седиштето на Мосад во близина на Тел Авив.
Во соопштението се наведува дека „нападот е одговор на експлозиите на пејџери и воки-токи и убиствата на врвните команданти“ на оваа терористичка група.
Свет
СЗО: Европските деца се изложени на ризик од проблематично користење на социјалните мрежи
Светската здравствена организација (СЗО) предупреди дека проблематичното користење на социјалните мрежи е во пораст кај децата во Европа и дека постои опасност кај нив да се развие зависност од онлајн игри.
„Потребна ни е итна и одржлива акција за да им помогнеме на адолесцентите да престанат со потенцијално штетната употреба на социјалните мрежи, за кои се покажа дека доведува до депресија, малтретирање, анксиозност и слаби училишни резултати“, рече директорот на СЗО за Европа, Ханс Клуге.
Во 2022 година, 11 проценти од адолесцентите (13 проценти од девојчињата и 9 проценти од момчињата) имале знаци на проблематично користење на социјалните мрежи, додека четири години претходно имало седум проценти.
Податоците се добиени во истражување кое опфатило 280.000 деца на возраст од 11, 13 и 15 години од 44 земји во Европа, Централна Азија и Канада.
Кај нив се забележани симптоми слични на оние на зависност, а тоа се неможноста да се контролира прекумерната употреба, чувството на повлекување и напуштање на другите активности во корист на социјалните мрежи и негативните последици од прекумерната употреба во секојдневниот живот.
Оваа појава е најраспространета кај романските адолесценти на возраст од 13 и 15 години, каде што погодува 28 отсто од нив, а најмалку е кај холандските адолесценти (три отсто).
Причината за загриженост е тоа што една третина од адолесцентите играат онлајн секој ден, а 22 отсто од нив играат најмалку четири часа, покажуваат податоците на СЗО.
Околу 12 проценти од адолесцентите имаат проблематично однесување поврзано со онлајн игрите, од кои 16 проценти се момчиња, а 7 проценти се девојчиња.
Европа
Нова експлозија одекна во Келн: изгоре кафуле среде ноќ, жителите евакуирани
Кафулето за кое се вели дека неодамна било отворено во Келн, вечерва околу 2 часот и 45 минути целосно изгорело. Пред тоа дошло до експлозија во зградата, а жителите пријавиле силен тресок во текот на ноќта.
Набргу потоа кафулето било во пламен, а прозорците биле испукани.
Зградата е евакуирана додека пожарникарите го гаснеле пожарот. Околу еден час подоцна, околу 4 часот наутро, 25 станари можеле да се вратат во своите станови.
Две лица наводно биле полесно повредени, пишува Билд.
На терен се голем број полицајци и пожарникари. Засега не е позната позадината на експлозијата, ниту е поврзана со претходните две кои одекнаа во Келн минатата недела.