Свет
По грешка пуштиле 23 патници од крузерот без повторен тест за коронавирус

Владата на Јапонија дозволила да се симнат 23 патници од крузерот „Дајмонд принцес“ без повторно тестирање на коронавирус по истекот на двонеделниот карантин.
Јапонскиот министер за здравство, Кацунобу Като се извини за пропустот.
„Длабоко жалам поради нашата грешка. Ќе направиме се да не ја повториме истата грешка“ рекол министерот пред новинарите.
Истовремено било откриено дека една патничка-Јапонка, по напуштањето на бродот била позитивна на коронавирусот. Таа се симнала од бродот, кој е усидрен кај Јокохама по двонеделниот карантин, но на новиот тест во префектурата Точига било утврдено дека е позитивна на коронавирусот.
Министерството за здравство соопштило дека повторно ќе ги тестира 23 патници, кои се симнале од бродот во средата и четвртокот. Тие последен пат биле тестирани пред 5 февруари и јапонското министерство се обидува да стапи во контакт со нив за повторно да бидат тестирани.
Крузерот со 3700 патници и членови на екипаж беше во карантин од 3 февруари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.
Свет
Пожарникар почина од срцев удар додека гаснеше пожар во Турција

Шумски пожари што беснеат низ Турција со недели му се заканија на четвртиот по големина град во земјата, Бурса, во северозападна Турција, денеска принудувајќи повеќе од 1.700 луѓе да ги напуштат своите домови, и веќе има еден загинат еден пожарникар.
Пожарите што избувнаа во пошумените планини околу Бурса се проширија брзо. Десетици големи шумски пожари ја погодуваат земјата секој ден од крајот на јуни, а владата во петокот прогласи две западни провинции, Измир и Билеџик, за зони погодени од катастрофа.
Канцеларијата на гувернерот на Бурса денеска објави дека 1.765 луѓе се безбедно евакуирани од село на североисток, додека повеќе од 1.900 пожарникари се борат со пламените јазици.
– Пожарникарот почина од срцев удар додека беше на работа, изјави градоначалникот на градот, Мустафа Бозбеј, додавајќи дека пламените јазици изгореле 3.000 хектари околу градот. Орхан Сарибал, опозицискиот парламентарец за покраината, ја опиша сцената како „апокалипса“.
Невообичаено високите температури за оваа сезона, сушните услови и силните ветрови ги поттикнуваат пожарите.