Свет
Првиот човек на Путин преживеал обид за атентат со труење, му се слошило по работа но го спасиле

Од синоќа меѓународните медиуми известуваат за наводниот обид за атентат врз Николај Патрушев (71), поранешен шеф на тајната служба ФСБ и секретар на Советот за безбедност на Кремљ, кој наводно бил итно пренесен во болница во последните денови откако се чувствувал лошо.
Резултатите од токсиколошките тестови откриле дека Патрушев бил погоден со „синтетички отров“, но на крајот го преживеал наводниот обид за атентат.
Се вели дека поранешниот шеф на ФСБ е десната рака на Путин и на кого Путин му ја предава власта кога тој е отсутен поради медицински причини, пишува „Дејли мејл“.
„Неодамна е извршен атентат врз секретарот на Советот за безбедност на Руската Федерација, Николај Патрушев“ – објави каналот Телеграм, повикувајќи се на извори од Кремљ.
Се додава дека „информациите за самиот обид за атентат и истрагата се чуваат строго доверливи“.
„Познато е дека Николај Патрушев се чувствувал лошо вечерта по работа, речиси веднаш откако си заминал дома. Обезбедувањето брзо реагирало и веднаш повикало лекарска екипа кај него. По укажаната помош, Патрушев во стабилна состојба е пренесен дома. Резултатите од неговата анализа потврдија дека токсичната супстанција е синтетички отров“ – наведува каналот Телеграм.
Во извештајот се наведува дека Патрушев „се спасил со навремена медицинска помош и, веројатно, со недоволно висока концентрација на отровната материја која преку кожата влегла во телото“.
Истиот канал додава дека на Путин му кажале за нападот „само кога животот на Патрушев повеќе не бил во опасност“.
Овој канал не кажува кога се случил наводниот напад.
Сепак, нема докази или независна потврда за тврдењето за труење, а Кремљ не ги коментираше шпекулациите.
Патрушев бил виден на 5 и 6 јули на источните територии на Русија, но оттогаш не се појавил во јавноста сè додека, наводно, во петокот не присуствувал на телевизиска видеоконференција на руски официјални претставници. Тој, наводно, присуствувал на состанокот на Советот за безбедност во петокот, иако не бил јасно сликан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.
Свет
Откриен можниот мотив на убиецот од Њујорк – оставил проштално писмо

Шејн Девон Тамура (27), напаѓачот кој вчера уби четири лица во деловна зграда во Њујорк, пред да си го одземе животот, оставил проштално писмо во кое тврдел дека боледува од хронична трауматска енцефалопатија (ЦTE) и побарал неговиот мозок да биде анализиран по смртта, јавува „Си-ен-ен“.
Во краткото писмо од три страници, пронајдено во неговиот џеб по пукањето, Тамура напишал: „Тери Лонг и американскиот фудбал ми ја донесоа ЦTE, поради што испив литри антифриз. Не можете да се борите против NFL – ќе ве згази.“ Тери Лонг, поранешен играч на Pittsburgh Steelers, беше дијагностициран со ЦTE и изврши самоубиство во 2005 година.
Тамура во пораката додал: „Ве молам, проучете ми го мозокот. Жал ми е. Кажете им дека ми е жал за сè.“
Според извори на „Си-ен-ен“, Тамура во младоста играл американски фудбал, што дополнително го поддржува неговото тврдење дека страдал од ЦTE – болест што најчесто се поврзува со повторувачки удари во глава кај спортисти, дури и без забележани потреси на мозокот.
Според досегашните сознанија, Тамура бил незадоволен од начинот на кој Националната лига за американски фудбал (NFL) со години го игнорира проблемот со ЦTE, кој е потврден кај бројни поранешни играчи по нивната смрт, а многумина имаат проблеми и додека се живи. Полицијата претходно објави дека Тамура имал „историја на ментални нарушувања“.
Тој влегол со пушка во зградата каде се наоѓа седиштето на NFL и почнал да пука во фоајето, а потоа и на 33. кат, пред да си го одземе животот. Еден вработен во NFL е тешко повреден, додека останатите биле навреме евакуирани.
Пријател од училишните денови, Калеб Кларк, го опишал Тамура како „најголемиот шегаџија во одделението, полн со енергија“. „Никогаш не би помислил дека би можел да биде поврзан со насилство. Луѓето му велеа дека е талентиран и посебен, но тој никогаш не кажуваше дека ќе игра во NFL,“ изјавил Кларк.
Во 2015 година, Тамура се преселил во Гранада Хилс и работел во казино во Лас Вегас, каде што поседувал дозвола за носење оружје.
Свет
Кремљ: Путин му се јави на Нетанјаху, разговараа за Сирија и за Иран

Претседателот на Русија, Владимир Путин, разговараше по телефон со израелскиот премиер Бенјамин Нетанјаху, објави прес-службата на Кремљ. Според руските власти, лидерите на двете земји разговарале за напнатата ситуација на Блискиот Исток.
„Руската страна ја потврди својата цврста позиција во корист на исклучиво мирно решавање на проблемите и конфликтите што постојат во регионот“, вели Кремљ. Путин ја нагласи важноста од поддршка на единството, суверенитетот и територијалниот интегритет на Сирија.
Рускиот претседател исто така ја изрази подготвеноста на Русија да помогне во наоѓањето преговарачки решенија поврзани со нуклеарната програма на Иран.