Свет
Претседателот на украинскиот Врховен суд уапсен за поткуп од 3 милиони долари

Националното биро за борба против корупцијата на Украина (НАБУ) го приведе претседателот на Врховниот суд на Украина, Всеволод Књазев, пренесуваат локалните медиуми.
Књазев, наводно, е осомничен за примање поткуп од 2,7 милиони долари како дел од шема која најверојатно вклучува и други функционери.
Во објава на „Фејсбук“ доцна во понеделникот, НАБУ соопшти дека во Врховниот суд открила корупција од големи размери – шема која им овозможувала на раководството и на судиите да дојдат до незаконски профит.
Бирото додаде дека е во тек итна истрага и дека наскоро ќе излезат со детали. Во одделна порака во вторникот, НАБУ најави прес-конференција за случајот напладне по локално време во Киев.
Иако официјалните лица не откриваат имиња, неколку украински медиуми излегоа со тврдење дека бил приведен Књазев повикувајќи се на анонимни извори.
Највисокото правосудно тело на Украина индиректно ја потврди веста во објава на „Фејсбук“ во која се наведува дека „во светло на она што се случува околу претседателот на Врховниот суд Књазев, на 16 мај 2023 година ќе се одржи вонреден состанок на пленумот на Врховниот суд“.
Според ZN.UA, од каде што цитираат неименувани извори во НАБУ, властите извршиле претреси на имоти што им припаѓаат на 18 други судии од Врховниот суд.
Сергеј Лешенко, советник на шефот на кабинет на украинскиот претседател, наведе поткуп од вкупно 3 милиони долари кога го коментирал апсењето на Књазев за медиумите додека според Виталиј Ким, гувернер на Николаевската област, таа сума изнесува 2,7 милиони долари.
Според „Страна“, Књазев ги добил парите од украинскиот олигарх Константин Жеваго, кој моментално се наоѓа во Франција, но се бара во Украина поради неговата улога во колапсот на една банка.
Претходно месецов, Високиот антикорупциски суд на Украина нареди апсење на градоначалникот на Одеса, Генадиј Труханов, поради наводи за злоупотреба на градските средства кои датираат од 2017 година. НАБУ во април спроведе рации во регионалните воени администрации во Житомирски и Харков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Вознемирувачко фото+видео) Пукање среде ден во Лавов, убиен Андриј Парубиј, херојот на Евромајдан

Поранешениот претседател на Врховната рада и една од клучните фигури на револуцијата на Евромајдан, Андриј Парубиј беше убиен со огнено оружје во својот роден град Лавов.
Националната полиција соопшти дека пукотници одекнале околу пладне во јужниот дел на градот, во округот Франкивски. Жртвата починала на лице место, и покрај брзата реакција на службите за итна помош.
Првите информации беа потврдени од пратеничката Ирина Херашченко, која за „Киев Индепендент“ изјави дека убиениот политичар е токму Парубиј.
Неколку часа подоцна, украинскиот претседател Володимир Зеленски соопшти:
„Министерот за внатрешни работи и главниот државен обвинител ме информираа за првите околности на страшното убиство. Убиен е Андриј Парубиј. Изразувам длабоко сочувство до неговото семејство и најблиските“.
Зеленски додаде дека сите потребни ресурси се вклучени во истрагата и во потрагата по сторителот. Засега, властите не соопштуваат детали за можни осомничени или за мотивот на злосторството.
Парубиј важеше за еден од симболите на отпорот и демократските промени во Украина, особено по неговата улога во протестите на Евромајдан и неговото политичко лидерство во најкритичните години на државата.
Случајот предизвика силни реакции низ цела Украина, со бројни пораки на осуда и повици за брзо расветлување на убиството.
Регион
Српската туристка која исчезна додека пливала кај Солун е пронајдена мртва

Жена (76) од Србија, која се водеше како исчезната од синоќа во близина на Солун, е пронајдена мртва утрово кратко по 8 часот, во морскиот регион, јавува „Прототема“, пренесува „Танјуг“.
Грчката крајбрежна стража вчеравечер ја започна потрага по исчезната пливачка во близина на градот Агиа Триада, во близина на Солун.
Порталот „Прототема“ објавија дека жената отишла на пливање со двајца пријатели, а крајбрежната стража била известена за нејзиното исчезнување околу 21:30 часот по локално време.
Во спасувачката операција учествувале два брода на крајбрежната стража, брод во близина и рибарски чамец. На барање на крајбрежната стража беше мобилизиран и грчки спасувачки тим, кој пристигнал за да помогне, заедно со екипаж од четири члена волонтери и спасувачкиот брод „Один“.
Спасувачките екипи продолжуваат со пребарување на околуниот дел од морскиот брег и отвореното море во надеж дека ќе ја најдат исчезнатата туристка жива и здрава.
Свет
Турција целосно ја прекинува трговијата со Израел по геноцидот во Газа

Министерот за надворешни работи на Турција, Хакан Фидан, денеска објави дека неговата земја целосно ги прекинува сите трговски односи со Израел и го затвора својот воздушен простор за израелските авиони, како одговор на настаните во Појасот Газа.
„Целосно ја прекинавме трговијата со Израел. Ги затворивме нашите пристаништа за израелските бродови. Не им дозволуваме на турските бродови да пловат кон израелски пристаништа. Турција не им дозволува на контејнерските бродови што пренесуваат оружје и муниција за Израел да пловат кон нашите пристаништа, ниту пак дозволуваме авиони да летаат во нашиот воздушен простор“, изјави Фидан на парламентарна седница во Анкара.
Според турскиот министер, мерките се дел од сеопфатен пакет дипломатски, правни и економски постапки воведени поради конфликтот во Газа. Турција постојано ја означува војната како „геноцид“.
Според податоците од палестинското Министерство за здравство, повеќе од 62.000 Палестинци загинале во конфликтот, а Турција претходно најави ограничување на трговијата со Израел, која не се одвивала од мај 2024 година. Во 2023 година, трговијата меѓу двете земји изнесувала седум милијарди долари, според Турскиот институт за статистика.
Анкара истакнува дека со овие мерки испраќа силна порака и се придржува до меѓународното право, додека целата ситуација се смета за најостра дипломатска постапка против Израел од страна на која било друга земја досега.