Свет
Приземјени сите летови на поголемите аеродроми во Велика Британија поради „откажување на радарот“, туристите заглавени
Сите летови на главните аеродроми во Велика Британија се приземјени поради „откажување на радарот“ на контролата на воздушниот сообраќај. Илјадници патници се заглавени на пистите на најголемите туристички центри во Велика Британија, вклучувајќи ги Хитроу и Гетвик.
Патниците објавуваат фотографии на социјалните мрежи за покажат дека седат заглавени во авионите, а апликацијата „Флајтрадар“ покажува стотици авиони приземјени на лондонскиот аеродром Хитроу.

Aпликацијата „Флајтрадар“ покажува стотици авиони приземјени на лондонскиот аеродром Хитроу
Не работи ни таблата за полетувања иако станува збор за најголемиот аеродром во Европа. На неа стои порака за грешка на веб-страницата „Вашиот избор на лет не може да се најде“.
Други големи аеродроми за кои е потврдено дека се засегнати се Бирмингем, Гетвик и Лутон. Водечкиот снабдувач на услуги за контрола на воздушниот сообраќај во Велика Британија, НАТС, преку соопштение потврди дека има „технички проблем“ во центарот за контрола на воздушниот сообраќај во Свонвик.
„Како резултат на технички проблем, го ограничуваме бројот на авиони што летаат во зоната на контрола во Лондон за да обезбедиме безбедност. Се извинуваме за сите доцнења што може да ги предизвика ова. Нашите инженери работат напорно за да го решат проблемот што е можно побрзо и тесно соработуваме со авиокомпаниите за да помогнеме во минимизирање на прекините. Во оваа фаза не можеме да кажеме колку време ќе помине пред операциите да се вратат во нормала“, стои во соопштението од НАТС.
„Секој лет на југот на Англија моментално е заземјен поради проблеми со контролата на воздушниот сообраќај“, се пожали на социјалните мрежи патник заглавен на Хитроиу.
„Ние сме на лет на ’Изиџет’ од Лутон до Анталија, токму требаше да полетаме. Моментално седам со девојки на летот без поим што ќе се случи“, објави друг патник.
„Лондонскиот воздушен простор е целосно затворен… Нема полетувања од ниту еден од лондонските аеродроми“, стои во една од објавите на заглавените патници.
Преку соопштение аеродромот Гетвик извести дека техничкиот проблем значи дека во моментов нема полетувања додека се решава ситуацијата.
„Технички проблем што влијае на НАТС влијае на сите појдовни летови низ Велика Британија“, соопшти аеродромот на мрежата X.
„Моментално нема полетувања од Лондон Гетвик додека се решава ситуацијата. Работиме со НАТС за да ги продолжиме летовите што е можно побрзо. Дојдовните летови сè уште слетуваат на аеродромот. Патниците треба да го проверат статусот на своите летови со нивната авиокомпанија“, стои во соопштението од аеродромот Гетвик.
Меѓународните летови што пристигнуваат на аеродромот Западен Сасекс се одложени за еден час. Аеродромот Бирмингем, исто така, потврди дека бил засегнат од техничкиот проблем.
НАТС кажа дека денес било предвидено да има повеќе од 3.000 летови што поаѓаат од аеродромите во Велика Британија, што е еквивалентно на над 577.000 патници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во руски напад на Павлоград загинаа 12 лица
Во нападот на руски дронови што утрово беше извршен врз градот Павлоград загинаа 12 лица, а ранети се седуммина, соопшти шефот на воената управа на Дњепропетровската област, Александар Ганжа.
– Непријателско беспилотно летало експлодираше покрај службен автобус на едно од претпријатијата во Павлоградскиот округ. Според прелиминарните информации, 12 лица загинаа, а седуммина се повредени, се наведува во објавата на Ганжа.
Во исто време во руско бомбардирање на градот Славјанск во Доњецката област утрово загина 43-годишна жена, а уште една е ранета.
– Загина 43-годишна жена, жителка на Краматорск. Мое искрено сочувство до нејзиното семејство и пријателите. Една мештанка е повредена, информира началникот на воената управа на Славјанск, Вадим Љах.
Тој потврди дека во нападот се оштетени 14 повеќекатници, три автомобили, филијала на Нова пошта и деловен центар.
Свет
Бројот на жртви во пожарот во Швајцарија се искачи на 41, меѓу жртвите и 18-годишно момче
Почина осумнаесетгодишно момче кое беше повредено во пожарот во барот во Кран-Монтана, соопшти денеска швајцарската новинска агенција Keystone-SDA, повикувајќи се на обвинителството.
Младиот швајцарски државјанин починал во болница во Цирих. Со неговата смрт, бројот на жртви од пожарот во барот „Le Constellation“ во швајцарскиот центар Кран-Монтана се искачи на 41 лице.
Пожарот избувна за време на забава за Нова година, на која присуствувале главно млади луѓе, откако прскалки го запалиле таванот. Пламенот брзо се проширил, а многу луѓе останале заробени во подрумот, не можејќи навреме да побегнат преку тесните скали.
Повеќе од 100 луѓе беа повредени, од кои околу 80 претрпеа тешки изгореници.
Јавното обвинителство води истрага за убиство од небрежност, нанесување телесни повреди и предизвикување пожар.
Свет
Две лица загинаа во најновите руски напади со дронови врз Украина
Маж и жена загинаа во украинскиот град Днипро откако Русија изврши нов бран напади со дронови во текот на ноќта, соопштија денеска официјални лица.
Во нападот избувнал пожар, а една куќа е целосно уништена, изјави воената гувернерка Олександр Ханжа во објава на Телеграм.
Украинските воздухопловни сили соопштија дека Русија во текот на ноќта извршила вкупно 90 напади со дронови низ целата земја, од кои околу десетина завршиле со директни погодоци.
Нападите се случуваат во време кога руски и украински претставници денеска треба да се сретнат во Абу Даби на нови разговори за можен крај на војната.
Разговорите следуваат по слична средба одржана минатата недела, прва по подолга пауза, но овојпат без присуство на американски посредници.
Со цел создавање позитивна основа за разговорите, Русија го прифати барањето на американскиот претседател Доналд Трамп привремено да ги запре нападите врз украинската енергетска инфраструктура, откако претходните напади врз електраните оставија илјадници луѓе без струја, греење и вода, при температури под нулата.
Според Кремљ, ограничениот прекин на огнот треба да трае до денеска.
Во меѓувреме, во Украина продолжуваат работите за обновување на снабдувањето со електрична енергија по вчерашниот прекин, предизвикан од дефект на далноводите.
Градоначалникот на Киев, Виталиј Кличко, изјави дека околу 1.000 домаќинства и натаму се без греење, откако тешкото руско бомбардирање ја оштети електроенергетската и топлинската инфраструктура на главниот град.

